Zɔbu 42 - LAWA A BOO SONBORE

Zɔbu n kaarɛ diɛ Lawa nɛ

¹ Zɔbu tɔ́n Dɛnaa Lawaa lɛ si á pɛ:

² – Má dɔ̃ máa n tá boe sii din tumaa la, sii kɔn ba piɛ̃ n ganaa wa.

³ «Die n boe la a n sii yɔrɔ bɔn sàabaa ka baãnaabaa ǹ boo ne?» Taãn nɛ, man má boo da, má n ma ba a giala miɛ wa. Sii mɛn bɛ́ gole ma ganaa, man má bɛ boo da, má n ma a doɛ̃ wa.

⁴ «Bǐɛ̃ kɔ n nə n too kɔ ma lon, man die nɔ̀n diɛ n la, nsɛ masɛ daraa kəni.»

⁵ Man má goã n boo miɛ ka ma too ne. Sɛnɛ sisia, ma din yii nə́ n yɛ.

⁶ Bɛ lɛ nɛ, ma nə n gɔ́ɔ̃ bii maa da ǹ boon lɛ-a, man lɛ koe maa san ganaa ma á n gɔ́ɔ̃ bii, ma giã tan tii laanka ton li foo ziziɛ̃ gɔn.

Lawa foo yoo Zɔbu a giaáran li

⁷ Dɛnaa Lawa bɛ́ á boo da ka Zɔbu ni á nya, á tɔ́n pɛ a giaára Temaan Elifaazi ni: «Ma foo á yoo ne n laanka n giaára min paa kɛ li. A giala, ka sonbore goon pɛ maa wɔ paǹ li wa. Maa dí-nyali Zɔbu dinsɔɔ̃ na á sonbore pɛ.

⁸ A bɛ́ miɛ̃, ka dii gɔ̀lɔ̀ sɔbaa kũ ka sère gɔ̀lɔ̀ sɔbaa nɛ, ka wo ǹ ne maa dí-nyali Zɔbu li, ka baa *wúlu màn tiɛ̃ lɛa. Maa dí-nyali Zɔbu á re Lawa nyankoe kaa lɛa. A Lawa nyankɔ lɛ a lɛa, a laanɛ ka boo sonbore da masɛ wɔ paǹ li ka Zɔbu wɔ bɛ́ lɔn wa, ma a re ka kuĩ bɛ li wa.»

⁹ Elifaazi ke boe Teman, Bildaadi ni boe Suwaa, ka Sofaara nɛ boe Naaman, ǹ nə́ bɛa wúlu lɛ bɔ, ka Dɛnaa Lawaa bɛ́ á pɛ ǹ nɛ lɔn. Dɛnaa Lawa Zɔbu a nyankɔ lɛ si sɔnbɔraanɛ.

Zɔbu wusoo á pàãma baa

¹⁰ Zɔbu bɛ́ á Lawa nyankɔ a giaáran lɛn lɛa, Dɛnaa Lawa wusoo á Zɔbu saa á da lon. Á gɔn màn kɔ la, bɛ́ la lɛlɛ ǹ wɔ kɛ-n gunyin paa.

¹¹ Bɛa biikoo li kəni, ǹ dɔɔ̃nɔn tumaa, ǹ miãnɛnɛn tumaa, a doɛ̃ wolen tumaa, ǹ tumaa woo n yii kɔ a ganaa a piɛ, ǹ nə́ màn bii kun ni. Dɛnaa Lawa koe mɛn tumaa bɔ a ganaa, ǹ nə́ bɛa gu wɔ la, ǹ ná a foo wɔraa. Didie gɔ ka wɔrɔ nɛ, ka sana kaaran nɛ.

¹² Dɛnaa Lawa wusoo á barka da Zɔbu ganaa bɛ kio, á la a lɛlɛ ǹ nɛ. A sèren man duu fulu sii (14 000), nyɔɔmaa duu sɔrɔ (6 000), buu kɔsɔ ǹ dii duu paa (2 000), ka dundun dan duu goon (1 000).

¹³ Á wusoo á nɛgiĩ sɔbaa laanka nɛlɔ sɔɔ yɛ.

¹⁴ Á nɛlɔ lɛ a bibinaa tɔ kɔ mà Zemina (Zɛrɛkantoan), á ná a paabaa ǹ wɔ tɔ kɔ mà Kesia (Da buũ giĩ kɔɔ̃n), a ná a sɔɔbaa ǹ wɔ tɔ kɔ mà Kerɛn-Apuku (Lɔ yii ganaa ǹ kala).

¹⁵ Gána lɛ tumaa gɔ́ɔ̃ nɛ, lɔn mɛnɛn bɛ́ siĩni ka Zɔbu a nɛlɔn kɛn bɛ́ lɔn, bɛ goã wa. Ǹ di lɛ gɔn màn lɛ kɔn kɔ ǹ dɔn la, ka a bɛ́ á kɔ ǹ miãgiĩn lɛn la lɔn.

¹⁶ Bɛ lɛ kio, Zɔbu wusoo á lɛ̀ paabiɛ ka pusi (140) zɛnaa kanaa. Á nɔ̀ɔ fulupaa yɛ a yii ni, yǎa gunyin sii.

¹⁷ Zɔbu zizi kɔ taãn-taãnɛ, bɛ kio, á tɔn gã.