Zɔbu 41 - LAWA A BOO SONBORE

¹ Á ke, bɛ̀ ń taasɛ mà nsɛ á boe la ka zia nɛ, ma nə n din yiri siɛ̃. A giala, a yɛ kooro din nə min nyɛnɛɛ a duwəə tán.

² Min kɔn ba pii mà asɛ yii á we sii la, a wo ga a lɛ li wa. Die yii n we kəni a golee, a n gòãn dii masɛ Lawa ganaa.

³ Die a giɔ̀mɔ n ma ganaa, ma tɔn saraa? Màn mɛn tumaa bɛ́ lon kɛ giulun, ma din wɔ nɛ.

⁴ Ma á re boo diɛ *Leviatan gùn dɔn wɔ paǹ li, a nya ǹ dín kɛn nɛ, ka a gɔ̀nɔn kɛa siĩnbaa nɛ.

⁵ Die bin na á tɔn a ki bɔ á bɔ a ganaa? Die bin na á tɔn wɔ a sɔ zii paa kɛ bii, á wusoo á soo?

⁶ Die bin na á tɔn a lɛ ti? A sɔn kɛn tumaa n nyɛ́ɛ diɛ.

⁷ A din koa mìi á ke: A dɔ̀ɔ̃ kɛ yii n fɔrɔ lɛa kəkə ka goóro ne. A fɔrɔ lɛ n kɔn-a tɛmɛtɛmɛ ka maǹ nə́ yii kɔn.

⁸ Maǹ doa-n kɔn, piɛ̃ goon din ba boe la a wɔ ǹ bii wa.

⁹ A fɔrɔn lɛn man doa-n kɔn, maǹ kɔn kuĩ, ǹ ba boe la ǹ kɔn kaa wa.

¹⁰ Bɛ̀ á tisəə da, tɛ n soe a lɛ-n. A yii nànan man ka wasa a bɔ tán nɛ.

¹¹ Tɛ-buə̃ n soe a lɛ-n, tɛ-pupurii n soe a nɛ.

¹² Tɛmaa n soe a nyin ni, ka dɔn nə pipi tɛ lan.

¹³ A lɛ gɔ́ɔ̃ ǹ piɛ̃ n tɛ diɛ tirikə ganaa, tɛbuə̃ n soe a lɛ-n.

¹⁴ Pàã na a wìi kɛ nɛ, bɛ̀ min din yɛ a yɔrɔ-a gɔrɔ, nyɛ́ɛ n kuĩ.

¹⁵ A gù ki tumaa n kɔn la dadara, kəkə a ganaa, bìn ba n diɛ a ganaa wa.

¹⁶ A foo kɛ n kaka ka kɔlɔ bɛ́ lɔn, a n kaka ka gii dan nɛ.

¹⁷ Bɛ̀ á yoo lon, haalɛ min kakan kɛn dinin man nyɛ́ɛ biɛ. Foo biɛ na nə ǹ kiɛ baa ganaa.

¹⁸ Ta gɔya sa na á kũ, a we wa. A din goon nə ka sɛmiɛ̃ nɛ, kiɛ sasa nɛ, ka kiɛ lɛ pɛpɛnɛ nɛ.

¹⁹ Fɔlɔ n buu lɛa asɛ gɔn, zan nə gɔn bɔnɛɛ lɛa a gɔn.

²⁰ A baa sii kiɛn nyɛɛn wa, baragii a kɔlɔ n buulu lɛa asɛ gɔn.

²¹ Durunkun nə làpaa lɛa asɛ ganaa. Sɛmiɛ̃ zuĩ a lɛ-baa ke, a n yaa we bɛ-a.

²² A nɔ̀ kɛ n gagara ka tapara lɛ gɛrɛgɛsiɛ bɛ́ lɔn, bɛ̀ ń ná a kiɛ̃ ǹ bǎã yɛ, ka diin kána na á bɔ walan.

²³ A n nyankɔrɔ gole kɛ a mu diɛ pipii ganaa, ka fɔlɔ donkolon nə tɛ lan. A n kɔ̀ gɔ́ɔ̃ bɔyɛɛ a baa ka nyɔɔ gìĩ kɔɔ̃n tã ǹ bǎã bɛ́ lɔn.

²⁴ A kiɛ̃ ǹ basa kɛ n tɛ pii a kio, mu lɛ lalan nə n bɔyɛɛ, a n baa fu ka min zizi mìi ka bɛ́ lɔn.

²⁵ Tán kɛ la, ǹ miã din banban, a na á n zɛnaa kɛnɛn, sii kɔn ba nyɛ́ɛ diɛ a ganaa wa.

²⁶ A nə n yii we màn dadara tumaa la, a din nə don màn babaraa kɛ tumaa a kii lɛa.»