Zɔbu 39 - LAWA A BOO SONBORE

¹ N tá tiã a nɛ-yɛ biikoo doɛ̃? N bin tɔ́n yuùn yɛ nɛ yii?

² N bin nə́ ǹ nɔ̀ gũ ǹ mui nimi? N tá ǹ nɛ-yɛ biikoo doɛ̃?

³ Maǹ nə́ n zumii ǹ nə n nɛ yɛ, guĩ na á n bɔ ǹ lɛ.

⁴ Ǹ nɛnyaanan lɛn man pàã yii, ǹ gole kɔ ǹ dinin li, ǹ kɔn pinaa, maǹ woe, ǹ ba n bɔyɛɛ doo wa.

⁵ Die na á don a dundun da bii-a a din gɔn wìi a lɛa, die na á biɛ bɔ a ganaa á da?

⁶ Man má don kɔ asɛ lɛ la kion lɛa, má tíɛ̃ bǎã kɔ la, a giã ǹ bǎã lɛa.

⁷ Kiwi gɔ́ɔ̃ a sà-pɛ kɛ ba asɛ yii li ǹ sii lɛa wa, asɛ a wotorodɛnan paraa kɛ miɛ duduu wa.

⁸ A nə n biĩ kelen la, bɛ na a màn bii ǹ bǎã lɛa. Màn woo màn tá luu buruu lɛa, a n giɛ bɛ li walan.

⁹ Don a zù á re lɛ koe a dí nya n nɛ? Á re lɛ̀ wɛɛ n goɛ̀rɛ nɛ?

¹⁰ N tá boe la n biɛ da a ganaa n buu kɔsɔ nɛ? Á re lɛ koe a kána baã n kio diə fúlu kɛ nɛ?

¹¹ A pàã a golebaa kɛ taman yii, n tá re n foo doɛ a ganaa, n nə n dí toa a gɔn mà a nya?

¹² N tá boe la n nə n foo doa a ganaa, mà á re n wii goɛ a da-n piɛ? Á re goɛ a da sɔkɔn a tamaa ǹ bǎã nɛ?

¹³ Bɛnda nə n nyàa dii sɔnbɔraanɛ, bɛ̀ a baa si. Sɛnɛ, a boe la a piɛ̃ ka gɔgɔrɔ bɛ́ lɔn wa.

¹⁴ Bɛnda na a gìi diɛ tán, bɛ̀ a toa a wɔ̃ tán fuu la.

¹⁵ Sɛnɛ, a yiri n boe mà gòã á boe la a yɔyɔrɛ, ma don màn tá boe la a tɔrɔ la.

¹⁶ A n kakaarɛ a nɛn ganaa, ka a din wɔn bie wa. A din a nɔmaa kooro ke, a laadoo bie ka bɛ-n wa.

¹⁷ A giala, Lawa nu ka sii-doɛ̃ nɛ, a gɔ ka yiri-n wa.

¹⁸ Sɛnɛ, bɛ̀ á yoo á n gòã da baa nɛ, sùi laanka a dabaali ba doe a ganaa wa.

¹⁹ Nsɛ nə ń pàã kɔ sùi la? A wìi ka ke pɔsiaã nɛ, nsɛ nə ń kaa a ganaa?

²⁰ Nsɛ n diɛ parɛɛ ganaa ka bisin bɛ́ lɔn? A din koa ǹ lɛ-baa kɛ n nyɛ́ɛ diɛ.

²¹ A kakabaa lɛ a nyɛnyɛɛ taman yii, a n tán gɔsiɛ ka a gòã nɛ nyankɔrɔ basa kɛ nɛ, bɛ̀ a baa si bɛ̀ a wo n da zia-baalin lɛ.

²² A laadoo bie ka nyɛ́ɛ-n wa, a nyɛ́ɛ doɛ̃ wa, a ba n nyɛnɛɛ gɔya sa-n wa.

²³ Kòãn wuu á boe a wàãn li, ka sɛmiɛ̃ tɛ-pɛle laanka gɔya sa nɛ.

²⁴ Foo fuubaa gɔn, giã ba n we la wa, a n wɔlɔ niɛ̃ a kiɛ̃. Bɛ̀ bɛn wuu bɔ, a golee doo wa.

²⁵ Bɛ̀ bɛn wuu bɔ lɔn, a nə n toɛ mà: Wãnana! A nə n toɛ sɔsɔɔ a zia gìĩ kɔ, a n kiãn lɛ miɛ ka zia nɛn nɛ.

²⁶ Nsɛ n nɛn bɛ̀ n yiri kɔ sía la bɛ̀ a tɔn yoo? Nsɛ n nɛn bɛ̀ n yiri kɔ la, bɛ̀ a tɔn nə n nyàan nyɔmaa, a yoo a kiɛ̃ gusin a lɛ̀gɔn li?

²⁷ Nsɛ a boo-diɛ n toɛ bɛ̀ giogialatã-a tɔn yoo? Nsɛ a boo-diɛ n toɛ, bɛ̀ a tɔn wo a kii dɔ kele mìi ni?

²⁸ A n woe giɛ̃ kele mìi ni bɛ̀ a waa walan. A n kele mìi-n walan, min kɔn ba doe a li wa.

²⁹ A nə n toɛ walan á n kuu koe a màn-bii ganaa, a nə n toɛ sɔsɔɔ a yii ná a ganaa.

³⁰ A nɛn man mà mii, bɛ̀ màn gere á bǎã mɛn nɛ, a dɔ n walan.