Zɔbu 38 - LAWA A BOO SONBORE

Lawa a piɛ̃ na á tán zɛnaa

¹ Dɛnaa Lawa Zɔbu lɛ si piɛ̃ gole bii, á pɛ:

² – Die n boe la a maa sii yɔrɔ boe sàabaa? Die n boe la, a na a sàabaa ka baãnaabaa ǹ boon ne?

³ N bii yii kəni, n golee giĩbaa la, man die nɔ̀n diɛ n la, nsɛ masɛ daraa!

⁴ Ma bɛ́ tán zɛnɛɛ ǹ mɛn waáraa, bɛ̀ ma n maa? Yiri bɛ́ n lon, a pɛ ma-n kəni.

⁵ N bɛ́ sii doɛ̃, die na á tán lɛ a gùrùn zɔɔ̃? Hinlaa die na á biɛ da li?

⁶ A giala n we-n wàa la? A gùrù tele ǹ kɔlɔ ke, die na á bɛ koa?

⁷ A pinaa, baayɛlɛ a leeren tumaa na á n lɛ kaa kun, ǹ nə́ loe lɔ. Lon mànan tumaa nyɛnyɛɛ ǹ lɛ-dɛ wɔ.

⁸ Mu bɛ́ soe á n die kɔ̀ biɛ, die na a ná a lɛ doa ǹ bǎã koa,

⁹ bɛ̀ ma bɛ́ ma labara baa mɔnaa lɛa, má wɔ yìsi mu ganaa, má wɔlɔ tì kɔ lɛ ka mɔnaa bɛ́ lɔn,

¹⁰ bɛ̀ ma bɛ́ má yìsi mu a golee ǹ bǎã lɔ má da tán, má bǎã koa má a kiɛ̃ bɛ la wa?

¹¹ Má pɛ nɛ: «Da yǎa kànaa, n nyan kiɛ̃ kànaa la wa. N mu lɛ pàã n golee kànaa!»

¹² N bɛ́ kanaa gɔ́ɔ̃ nɛ, n bin lɛ̀ da waa ganaa gunyin goon? N bin wasa a bɔ ǹ bǎã nyaa nɛ,

¹³ màn mɛn bɛ́ toɛ a kanaa gùrùn kũ, a min baraan kɛn zuzuu a ǹ bɔ a ganaa?

¹⁴ Bɛ̀ wasa bɔ tán, màn tumaa nə n bɔyɛɛ, ka maǹ nə́ nyaǹ kaa gì tàãn ganaa, màn tumaa nə n biɛ ka maǹ nə́ mɔnaa nyaǹ kɔ.

¹⁵ Sɛnɛ bɛ̀ lɛ̀ waa, min baraan laadoo na á ziziɛ̃. Ǹ sii kakaarɛ zɛnaa lɛ na á sàabaa.

¹⁶ N bin tɔ́n woo yǎa kɔ̀ mu a bɔ ǹ bǎã nɛ? N bin tɔ́n woo yǎa tán giulun?

¹⁷ Min bin geren kiɛnlɛ bũ n ni? Min bin wɔlɔ tì kɛa kiɛnlɛ nyaa n nɛ?

¹⁸ N tá tán kɛa pəməbaa doɛ̃? A pɛ ma ma kəni, n din bɛ́ bɛa sii lɛ tumaa doɛ̃.

¹⁹ Wɔlɔ fúlu lɛ n boe maa? Wɔlɔ tì a giã ǹ bǎã n maa?

²⁰ Bɛ̀ ma n bɛn piɛ zii doɛ̃, bɛ̀ n tá re siɛ n woo, yǎa ǹ piɛ.

²¹ N doamaa nɛ n dɔ̃ dinin, n bɛ́ n tan a biikoo li lɛn, n tá kanaa lɛ bɛ́ á belebɔ!

²² *Mu nyuù-wɔle bɛ́ boe bǎã mɛn nɛ, n bin woo yǎa walan? La gii bɛ́ boe bǎã mɛn nɛ lon, n bin bɛ yɛ?

²³ Man má bɛn koa ma gɔn li nɔmaa biikoo a lɛa, yɔ-bɔ a lɛa, zia-baa a lɛa.

²⁴ Wɔlɔ fúlu a kiɛ̃ ǹ zii n maa? Lɛ̀giala piɛ̃ ke kiɛ tán ganaa, bɛ n boe maa?

Lawa n la diɛ kaa ganaa

²⁵ Die na á zii bũ la mu ni? Die na á kiɛ̃ ǹ zii bɔ la a paraa a tɛ-pɛ kɛ nɛ?

²⁶ Die na á la da kaa ganaa tán la, a da yaa min dɔ banban. Die na á la da kaa ganaa don bii, a da yaa minbuiin nɛ banban.

²⁷ Die n mu koe gii bǎã la, a buu da pã ganaa gɛtaã bǎã nɛ?

²⁸ La ke bɛ̀ a kaa, a yɛ ǹ di n ka die ne? Pele ke bɛ̀ a kɔ, a yɛ ǹ dan nə ka die ne?

²⁹ Mu nyuù-wɔle kɛ n soe die gɔ́ɔ̃ nɛ? Nyan ke bɛ̀ a gisĩ mu lɛa, a kɔn kũ, die na á bɛ zɛnaa?

³⁰ A ke, mu nə n bɔyɛɛ a laa ka kɔlɔ bɛ́ lɔn, a lalan nə kɔn kuĩ ka kɔlɔ bɛ́ lɔn.

³¹ N tá boe la n Leere Sɔrɔ kɛ kũ, ǹ nə ǹ yii kɔn? N tá boe la ǹ Bɛ̀rɛ-sãlin kɛn biɛn fore?

³² N tá boe la n leeren da bɔ ganaa, ǹ bɔ biikoo li? Nsɛ n kiɛ̃ ǹ zii nyɛɛ leere dadaran kɛn laanka a bɔnboɛɛnɛn manɛ?

³³ Landan mɛnɛn nə n koa lon, n tá bɛn doɛ̃? Nsɛ n minin kiɛ ǹ kɔmalɛ ganaa tán kɛ la?

³⁴ Nsɛ n nɛn bɛ̀ n lɛ dia labaran kɛn la haalɛ lon, bɛ̀ la tɔn kaa a mu n gigiã?

³⁵ N tá boe la, n la a tɛ-pɛn kɛn dia dí ganaa, ǹ woo? Ǹ tá pii n ni, mà ǹsɛn nə́ ke?

³⁶ Die na á yiri kɔ kən la, mà la á re kiɛ? Die na á yiri kɔ koo sa la, ma la á re nyɛɛ?

³⁷ Die n sii doɛ̃, á n boe la, a labaran nimi, á n boe la, a lon a mu dɔǹɔn kɛn lɛ kanaa ǹ mu kaa,

³⁸ mu mɛn bɛ́ tii kuĩ a munu kɔn, a tii kòrò kũ a munu kɔn?

Lawa giɛ màn yiikoonaan tumaa walan

³⁹ Nsɛ n siĩ kuĩ bɛ̀ n kɔ yàra dan la? Bɛ̀ bòo tá yàra nɛn ganaa, nsɛ n màn-bii koe ǹ la?

⁴⁰ Ǹ bɛ́ wɛɛ tán, bɛ̀ ǹ kuu kɔ, ǹ bɛ́ n duri daã-n bɛ̀ ǹ kuu kɔ, nsɛ nɛ n nə́ ǹ daraa bɛ ganaa?

⁴¹ Bɛ̀ zankoo nɛn tá n lɛ dii Lawa ganaa, bɛ̀ bòo nə́ ǹ pàã nya, die n màn-bii koe ǹ dan lɛ la?