Zɔbu 37 - LAWA A BOO SONBORE

¹ Bɛ lɛ n ke ma foo á bìn diɛ, paparɛ n boe a bǎã nɛ.

² Ka n too kɔ, ka n too kɔ Lawa lɛn li, parɛɛ, ka n too kɔ a ginii wuu kɛ li soe a lɛ-n.

³ A na a wuu boe lon paǹ tumaa nɛ, a tɛ-pɛ kɛ n doe kanaa paǹ tumaa nɛ,

⁴ bɛ kio, a wɔɔsaa lɛn nə boe, a n parɛɛ ka lɛn gole ne. Bɛ̀ a lɛn lɛ bɔ miɛ̃, a n tɛ pii bǎã yii ni.

⁵ Lawa na a kaãbaa ǹ siin lɛn zɛnɛɛ ka lɛn gole ne, á sii dadaran zɛnɛɛ, wɔ́ n wɔ ba ǹ giala miɛ wa.

⁶ A n pii *mu nyuù-wɔle ne mà a kaa tán, a n bɛ lɛ pii la nɛ, la dadaran dinin manɛ.

⁷ Ka bɛ nɛ, a n didie a nya ǹ dí sàabiɛ, màn mɛn bɛ́ toɛ, minbuiin nɛ tumaa Lawa a nya ǹ dí dɔ̃.

⁸ Don mànan dɔn dinin man giɛ ǹ dɔ ǹ bǎã li, maǹ woe wɛɛ ǹ kolo ne.

⁹ Piɛ̃ gole ke, bɛ n boe gusin a lɛ̀gɔn la, nyan ke, gɔsɛ a lɛ̀gɔn la piɛ̃n kɛn man die bɛ nɛ.

¹⁰ Lawa lɛ gɔ́ɔ̃ ǹ piɛ̃ n mu kuĩ a laa, bɛ̀ á piɛ̃ bɔ, mu lɛ lalan nə kɔn kuĩ.

¹¹ A n labaran piɛ̃ ka mu ni, á n bɛ pɛsɛ̃ bɛ̀ á n tɛ pii li bǎã tumaa nɛ.

¹² A din nə toɛ labaran lɛn tá n biĩ wɔlɔ lɛnpɛnɛ, ǹ na a din a dí-pɛn zɛnaa kanaa paǹ tumaa ganaa.

¹³ Bɛ̀ a tá li a dɔlɔ bɔ kanaa ganaa, hinlaa a bǐɛ̃ zɛnaa nɛ, a n labaran lɛn boe a ǹ dia.

¹⁴ Zɔbu, n too kɔ kɛ li doɛ̃, golee n nə n taasɛ Lawa a sii dadara zɛnaan kɛn ganaa.

¹⁵ A bɛ́ labaran kɛn diɛ zii la lɔn, a bɛ́ ǹ diɛ tɛ-pɛ ganaa lɔn, n tá bɛ doɛ̃?

¹⁶ A bɛ́ á labaran kɛn lɔɔ lon lɔn ǹ nə́ golee, n tá bɛ́ doɛ̃ ya? Doɛ̃ lɛpiɛ̃ bɛ́ Lawa mɛn lon, bɛa zɛnaa ǹ sii dadaran man ka kɛn nɛ.

¹⁷ Bɛ̀ gusin a lɛ̀gɔn la piɛ̃ kɛ tán wɔ̃ ǹ mɛn waáraa, n mɔnaan lɛn bɛ́ nɛn bɛ̀ ǹ wɔ̃ belebele, n tá bɛ yɔrɔ doɛ̃?

¹⁸ A bɛ́ á labaran kɛn nyɔã lon, kaka, ka fɔlɔ damalen bɛ́ lɔn, n tá boe la n bɛ zɛnaa?

¹⁹ Wɔ doamaa bɛ́ wɔ màn mɛn pɛ Lawa nɛ, wɔ daraa bɛ ganaa kən le, a giala, wɔa yii tìbaa lɛ taman yii, wɔ a boe la wɔ boo kɔn da wa.

²⁰ Bɛ̀ ma á boo diɛ, yǎa ǹ pii ni? Hinlaa yǎa ǹ pii ni mà min nə́ boo da nɛ?

²¹ A n ka wasa a tɛ-pɛ bɛ́ lɔn. Biikoo tɛn li, labara tì nə n koe lɛ. Sɛnɛ, bǎã goon ne, piɛ̃ n boe, a goa a bɔ la.

²² Tɛ-pɛ n dɔ boe ka sana bɛ́ lɔn, gɔsɛ a lɛ̀gɔn la die. Tɛ-pɛ mɛn bɛ́ Lawa lɛnpɛnɛ, bɛ n kaãbaa diɛ.

²³ A din lɛ n Pàãyiidɛnaa lɛa, wɔ́ n wɔ a doe a li wa. A pàã laanka a peperebaa lɛ á gole, a sonbore toɛ min lon, a mɛnaa la wa.

²⁴ Bɛ lɛ n ke, minbuiinin tá siĩni ǹ nyɛ́ɛ baa nɛ. Sɛnɛ, min mɛnɛn bɛ́ n dinin biɛ sii-dɔ̃lin lɛa, a giɛ bɛ kɔn ganaa wa.»