Zɔbu 35 - LAWA A BOO SONBORE

Zɔbu n boo kooro diɛ

¹ Elihu wusoo á boo saa doo á pɛ kɛnɛn:

² «Á siĩnii n pɛ Lawa-n sonbore mà nsɛ sii la wa?

³ Wàa na á baa n tá pii mà Lawa n wàa boe bɛ nɛ, ń mà bɛ̀ nsɛ sii baraa zɛnaa wa, ń mà nsɛ a wàa mɛn là n bɛ nɛ?

⁴ Masɛ din nə die n laanka n giaáran lɛn lɛ sii.

⁵ N yii saa n ga lon. Ga labaran kɛn ganaa lon n lalan lɔn.

⁶ Bɛ̀ ń sii baraa zɛnaa, a mìi gɔ́ɔ̃ ǹ sii á doe Lawa-a ya? Bɛ̀ á kɔɔ̃nɛ, n màn da n piã li. Bɛ n wàa zɛnɛɛ nɛ?

⁷ Bɛ̀ n tá pepere, bɛa là n doe Lawa-a ya? Ma n wàa mɛn koe Lawa la?

⁸ N baraabaa kɛ lɛ n basaã koe n din miãn dininsɔɔ̃nɔn manɛ, n peperebaa kɛ lɛ a là n doe n din miã minbuiinin ganaa.

⁹ Bɛ̀ fuu la minbuiinin yii ni, maǹ gini. Bɛ̀ goledɛnan tá boe ǹ yii ni, maǹ nə n lɛ dii.

¹⁰ Sɛnɛ, min kɔn ba giɛ Lawa li wa, asɛ mɛn bɛ́ á ǹ zɛnaa, á n foo kɔɔ̃n-baa ǹ loe we ǹ lɛ-n tèlò-n.

¹¹ A din nə wɔ doree á la kanaa kɛa tɔɔn manɛ, a din nə toɛ wɔ á sii doɛ̃, wɔ́ la lon a bàanan manɛ.

¹² Minbuiinin maǹ nə n lɛ dii, sɛnɛ, Lawa ba ǹ lɛ sii wa, min baraan din gole kɔ lɛ taman yii.

¹³ Maǹ nə́ n lɛ dii kooro, Lawa a n too koe bɛ li wa. Pàãyiidɛnaa a bɛ miɛ wa.

¹⁴ A laanɛ ń pɛ, mà nsɛ yii ba a ganaa wa, n sii lɛ na a din gɔn le, n yii da la.

¹⁵ Sɛnɛ, bɛ̀ a foo tɔn yoo, á sii zɛnaa bɔrɔ wa, bɛ bie nyɛɛ, mà a na a ba minbuiinin sii baraa doɛ̃ wa.

¹⁶ Zɔbu n boo kooro diɛ. Boo zaã kɛ lɛ á diɛ, baãnaabaa ǹ boo ne.»