Zɔbu 32 - LAWA A BOO SONBORE

Tɔntɔraa goon nə boo diɛ

¹ Zɔbu a giaára min sɔɔ kɛ nə́ n lɛ tã, ǹ nə́ Zɔbu toa walan. A giala maǹ taasɛ, mà Zɔbu nə n din biɛ min pepere lɛa.

² Bɛa biikoo li, tɔntɔraa goon ne, a tɔ n Elihu, bɛ foo yoo. A foo yoo Zɔbu li, a giala, Zɔbu nə n din biɛ min pepere lɛa Lawa yɔrɔ-a.

³ A foo yoo Zɔbu a giaára min sɔɔ lɛ dɔ li, a giala boo kɔn ba ǹ lɛ-n, ǹ nə́ Zɔbu lɛ sii-n wa, ka ǹ daa ǹ pɛ mà Lawa zɛ̀rɛ nɛ.

⁴ Zɔbu a giaáran lɛn bɛ́ zizi Elihu ni, bɛ lɛ nɛ, Elihu nə́ n yii da ǹ la mà ǹ nya, asɛ tɔn boo da Zɔbu ni.

⁵ Elihu yɛ mà boo kɔn ba giĩ sɔɔ kɛ lɛ-n doo wa, a foo yoo.

⁶ Elihu tɔ́n boo saa á da: – Masɛ á nɛnyaan lɛa ka ganaa. Ka á zizi ma nɛ. Bɛ lɛ n ke nyɛ́ɛ ma kũ, ma yii wɔ, má maa sii-doɛ̃ nyaa ka-n wa.

⁷ Man má goã taasɛ, máa kasɛn bɛ́ zizi, kasɛn tá re boe boo-diɛ la. Máa kasɛn bɛ́ ká yɛ masɛ nɛ, máa kasɛn tá re sii-doɛ̃ nyɛɛ.

⁸ Sɛnɛ, taãn-pɛ á soɛ, yiri n boe Lawa li, Pàãyiidɛnaa ǹ yiri koe min la.

⁹ Lɛ̀ gigiã bie sii-doɛ̃ koe min la wa, zizi-kɔ bie toɛ min nə sii a woo ǹ bǎã dɔ̃ wa.

¹⁰ Bɛ lɛ n ke, máa ka n too kɔ ma dɔ lon. Ma dɔ bɛ́ màn mɛn doɛ̃, man die bɛ pii.

¹¹ Bɛ lɛ nɛ má si ma ganaa, má n too kɔ kaa boon li. Kaa taasiɛ bɛ́ ka màn mɛn nɛ sii kɛ lɛ gɔ́ɔ̃ nɛ, man má goã n too diɛ bɛ li. Man má goã n yii diɛ, máa ka sii kɛ lɛ gɔsɛ taãn-taãnɛ.

¹² Má maa taasiɛ tumaa doa ka ganaa. Sɛnɛ, á ke, ka kɔn boo la ká Zɔbu lɛ si wa, ka kɔn a boo na a wɔ naa wa.

¹³ Bɛ lɛ nɛ, ka nyan pɛ mà kasɛn nə́ sii-doɛ̃ yɛ wa. Lawa dinsɔɔ̃ n boe Zɔbu la, minbuiin nɛ bie wa.

¹⁴ Zɔbu bie a ná a boon lɛn yɔrɔ dia masɛ la wa. Ka màn mɛn da, masɛ bie re koe bɛ lɛ ma a lɛ si-n wa.

¹⁵ Á ke, Zɔbu a giaáran lɛn gù gã, boo ba n diɛ ǹ la doo wa. Ǹ yii a boo-a ǹ tá diɛ wa.

¹⁶ Má n yii da. Sɛnɛ, ǹ bɛ́ ǹ bie boo diɛ wa, ǹ bɛ́ ǹ nə́ golee, boo ná a ba ǹ lɛ-n wa,

¹⁷ masɛ dɔ á re maa wɔ diɛ, masɛ dɔ á re maa doɛ̃ nyɛɛ.

¹⁸ A giala, boo gigiã tá masɛ lɛ-n ma da. Á ke, ma gɔ́ɔ̃ din nə pipi.

¹⁹ Ma gɔ́ɔ̃ n pipi ka yɔ bɛ́ lɔn, a yii ná a ba soo ǹ bǎã-a wa. A n ka mu bɔnaa dii bɛ́ lɔn, giɛ mà á puri.

²⁰ Man die boo diɛ kəni, ta piɛ̃ á kiɛ ma-a. Man die n lɛ buĩ, ma a lɛ si.

²¹ Ma a re bɔnbii-a we wa, ma a re min kɔn dɔ bebele wa.

²² Ma a boe min bebelee dɔ din la wa. Bɛ̀ man bɛ zɛnɛɛ, bɛ̀ maa Zɛnaali kɛ ma bɔ̀n baa bǎã goon.