Zɔbu 31 - LAWA A BOO SONBORE

Zɔbu mà asɛ baraa kɔn zɛnaa wa

¹ Masɛ n má n liɛ, máa ma a re giɛ nɛniɛ ganaa, ma yii bɔ li wa.

² Bɛ̀ man má bɛ zɛnaa sonbore, bɛ̀ Lawa n die n toɛ lon, a wàa kɔ ma la? Bɛ̀ Pàãyiidɛnaa kɛ n die n toɛ lon, a dɔlɔ mɛn bɔ ma-a?

³ Nɔmaa bie sii baraa-zɛnaali yii wa ya? Bɔ̀n bie sii kɔkɔrɔ-zɛnaali yii wa ya?

⁴ Sɛnɛ, Lawa lɛ din yii ba masɛ a tɔ wɔ ǹ gɔn ganaa wa? A yii ba maa gòã saa ǹ gɔn tumaa ganaa wa?

⁵ Bɛ̀ má kɔ soɛ lɛ, bɛ̀ má baa si minin bebelee kio,

⁶ Lawa din ma zɔɔ̃ màn zɔɔ̃ ǹ màn sonbore la a ga-a, á re maa peperebaa yii.

⁷ Bɛ̀ má zii da, bɛ̀ ma foo nə́ n saa ma yii nànan li, bɛ̀ má *gɔ̀ sii zɛnaa,

⁸ ma màn mɛn da maa wuru-n, min kɔsɔn die ǹ bɛ bii. Ma màn mɛn dɔ zumu, min kɔsɔn die ǹ bɛ wɛ̃ ǹ kaa.

⁹ Bɛ̀ ma yii bɔ lɔ kɔsɔ li, bɛ̀ má n naa ma miã a kiɛnlɛ-a,

¹⁰ ma dɔ a lɔ mu si a kɔ min kɔsɔ la, min kɔsɔn nə kũ, bɛ̀ ǹ nə n la nyɛɛ a ganaa.

¹¹ Bɛ̀ má bɛ zɛnaa, man má sii gole la. Kiri-kuruli kɔn ba bɛ toɛ kooro wa.

¹² Bɛa sii kɛ lɛ din nə tɛ lɛa, bɔ̀n diɛ min ganaa duduu. Bɛ̀ a n die ma gɔn màn tumaa ziziɛ̃ lenlen.

Zɔbu baraa zɛnaa nɔmaa wolen man wa

¹³ Ma bɛ́ kɔn ka maa dí-nyalin kɛn nɛ, bɛ̀ man má mɛnaa ǹ la,

¹⁴ bɛ̀ Lawa á ma gialaa, man die wàa zɛnɛɛ? Bɛ̀ á nɔ̀n diɛ ma la, man die wàa pii ni?

¹⁵ Min mɛn lɛ ma zɛnaa ma dan gɔ́ɔ̃ nɛ, a din lɛ bie á ǹ dɔn zɛnaa wa ya? A din Lawa goon kɛ lɛ bie á wɔ tumaa da wɔ dan gɔ́ɔ̃-n wa ya?

¹⁶ Doobaa bin nyankɔ ma la má nu wa, ma bin toa lɔ giɔɔrɔ nə́ n yii da ma gɔn li á fɔ̃ wa.

¹⁷ Ma dinsɔɔ̃ bin maa màn bii wa, ma bin màn bii má nɛ toen nu wa.

¹⁸ Maa tenmaa waáraa dinin gɔrɔ, man má goã ǹ kuĩ ka ǹ di n ka ma nɛ. Ma din soo ma dan gɔ́ɔ̃-n lɔn, man má goã lɔ giɔɔrɔ a sii yɔrɔ-bɔle lɛa.

¹⁹ Ma bin min yɛ n bibiĩ mɔnaa wɛɛ̃ na-a, má toa walan wa. Ma bin doobaa yɛ ka kɔmalɛ wɛɛ̃ na-a má toa walan wa.

²⁰ Bɛ miã min kɛ kɔn banban, mà a na a barka da ma-n wa, a giala maa sère ka mɔnaa kɛ nyan nya bɛ tumaa-a.

²¹ Bɛ̀ má n foo doa kiri-kurulin kɛn ganaa, má n gɔn saa nɛ toen li,

²² ma nyàa na a n bɔ ma ganaa, ma gɔn na a n bɔ ma ganaa.

²³ A giala Lawa a dɔlɔ ke, bɛ lɛ na á goã nyɛ́ɛ diɛ ma ganaa. Ma a boe la ma sii kɔn zɛnaa Lawa gole kɛ yɔrɔ-a wa.

²⁴ Ma bin nə n foo doa sana ganaa wa. Ma bin pɛ sana sonbore ne máa: N din nə maa dɔmalɛ wole lɛa wa.

²⁵ Ma bin nə n nyɛnyɛɛ maa màn a mɔnaabaa kɛ taman yii wa. Ma bin nə n nyɛnyɛɛ ma gɔn màn a gigiãbaa kɛ taman yii wa.

²⁶ Ta má wasa yɛ á bɔ, ta mui na á yoo á folon kiɛ,

²⁷ ma bin nə n saa bɛ li, má sii kɔn taasɛ ma foo-n ka durii-n wa, ma bin nə ǹ guguru kɔ wa.

²⁸ Bɛ̀ man má bɛ zɛnaa, bɛ̀ kiri-kurulin doamaa nɛ ǹ dɔlɔ bɔ ma ganaa. A giala, a n goon ka man má n piã ka lon a Lawa kɛ nɛ.

²⁹ Ma bin nə n nyɛnyɛɛ ka maa zɔ́ɔ a bɔ̀n nɛ wa, bɔ̀n bɛ́ á yɛ, ma a yaa wɔ wa.

³⁰ Ma bin lɛ kɔ boo baraa soo ma lɛ-n wa, ma bin dì bíi maa zɔ́ɔ li máa a gã wa.

³¹ Min mɛnɛn nə goã die maa kion, bɛn dinin man nə́ goã pii: «Min kɔn din banban, bɛ̀ a na a siĩ sɔ̃ á kã wa.»

³² Tii goã lɛ wɛɛ kanaa maa kiɛnlɛ-a wa, man má goã maa kiɛnlɛ buĩ zii tɔ-wɔlen manɛ.

³³ Masɛ maa sãn duru ka min gigiã bɛ́ zɛnɛɛ lɔn wa. Má golee maa sãn li.

³⁴ Ma bɛ́ má zɛnaa miɛ̃, man nyɛ́ɛ biɛ zaman lɛ wuu-n ya? Minin nə ma yii puusə kɔ, bɛ n nyɛ́ɛ diɛ ma ganaa ya? Bɛ bie toɛ ma á n lɛ tiɛ̃, má n giɛ̃ kion wa.

³⁵ E, die n die yii a n too kɔ ma lon? Masɛ a boo giala nyɔmiɛ̃ n ka bɛ nɛ. Pàãyiidɛnaa din die a ma lɛ si. Ma biɛ kɔ ǹ sɛ́wɔ ke maa zɔ́ɔ kiɛ̃,

³⁶ man die bɛ din loɛ ma nyàa koo-a, ma wɔ ma mìi-a kii bafolo lɛa, ma nyaǹ bɔ nɛ.

³⁷ Ma á die maa gòã saa ǹ gɔn tumaa yɔrɔ pii ni. Man die tɔ we ka kii bɛ́ lɔn, ma wo golee a yɔrɔ-a.

³⁸ Bɛ̀ maa tán nə́ n piã ka ma nɛ, bɛ̀ maa buu-kɔsiɛ ma gɔn tii,

³⁹ bɛ̀ man má a màn bii, má n ma wɔrɔ bɔ wa, bɛ̀ man má min nyin bɔ, má a tán si la,

⁴⁰ *belee nyan bɔ a-n wa, yǎa nyan, *ɔrzi nyan bɔ a-n wa, yǎa tala. Zɔbu a boo giala nyɔmiɛ̃n man ka bɛn nɛ.