Zɔbu 30 - LAWA A BOO SONBORE

Man yaa we Zɔbu ganaa

¹ Á ke kanna, min mɛnɛn bɛ́ nɛnyaanan lɛa ma ganaa, bɛn man ma diɛ yaa lɛa. Lɛlɛ, ǹ díin dinin nə goã màn kɔn lɛa wa. Ma goã lɛ koe ma á ǹ diɛ kun ka ginin dinin ni, máa ǹ maa tɔɔn lɛduə̃ wa.

² Ǹ dinin pàã bɛ́ á goã á nya, maǹ nə́ goã boe la ǹ tá wàa mɛn bǐɛ̃ koe masɛ nɛ?

³ Ǹ nə́ pɛrɛ doobaabaa baraa laanka bòo gɔn. Maǹ nə́ goã da gòonən soɛ̃ don, bǎã gere kɛ lɛ minin nə́ toa walan haalɛ bibi.

⁴ Maǹ nə́ goã buu boe daã gòã li, maǹ nə́ goã da gòonən boe bɛ̀ ǹ sɔ̃.

⁵ Maǹ nə ǹ lui ǹ boe minin bii, maǹ nə n lɛ dii ǹ ganaa, ka wurumunun manɛ.

⁶ Maǹ nə́ goã giã-n mu zii nyankɔrɔ nɛ, tán yalan nɛ, ka kele yalan nɛ.

⁷ Maǹ lɛ biɛ daã gòã li, bɛ̀ ǹ nə n lɛ sɔkɔn nyan daanan giulun.

⁸ Fɔ̃madinbaalɛ wole kooron manɛ, ǹ nə́ ǹ loo ǹ nə́ ǹ bɔ gána lɛ nɛ.

⁹ Á ke kanna, nɛnyaanan man loe loe ma din ganaa, maǹ sùn biɛ ka ma din tɔ nɛ.

¹⁰ Ma tìĩ bɔ ǹ nyin ni, ǹ ba n mɔrɛ ma-a doo wa. Maǹ sɛ̀ duwii tán ma yɔrɔ-a, nyɛ́ɛ din ba ǹ-a wa.

¹¹ Lawa bɛ́ á masɛ á sa gisĩ á ma mìi zuməə, á ke, ǹ ba n nyɛnɛɛ ma-n doo ka sii kɔn nɛ wa.

¹² Ma zɛ̀rɛ-baalin lɛn nə́ yoo ma gialaa kurukuru. Maǹ ma gòã pere boe, ǹ nə́ giɛ li ǹ ma bɔ ǹ ma daa. Ǹ nə́ zii bɔ yǎa ma din li, ǹ nə́ giɛ li ǹ ma bɔ̀n baa.

¹³ Maǹ bɔ ǹ lɛ tiɛ̃ ma ganaa, ǹ nə́ n doɛ ka yɔrɔ yii ni, mà ma bɔ̀n baa, min dɔ banban a tá ǹ kurii wa.

¹⁴ Maǹ boe kankolo li die biribiri, maǹ kɔn nyɛnyɛnɛɛ kungɔn li, die ma ganaa.

¹⁵ Gɔ̀nɔn bìn diɛ á ke die ma gialaa. Ma woo ka maa zín ni, maa yii-nyɛɛ ke, bɛ́ papaã ka labara bɛ́ lɔn.

Zɔbu mà Lawa din na asɛ gialaa

¹⁶ Kanna, maa fɔfoã á ke nyɛɛ gele. Nɔmaa lɛawaa na á dɔ ma-a.

¹⁷ Tèlò-n, ma gù wen man busi, ma là yii n paparɛ. A n sɔn doe ma ganaa, a toɛ ma á n susui wa.

¹⁸ Lapaparɛɛ na á pàã la ma nɛ, á ma kũ maa dɔnkɛ wìi ganaa, á sɔɔ ma bɔlɔ-a.

¹⁹ Lawa na á masɛ nyɛnaa á ma da bɛrɛɛ li. Ma gɔ̀nɔn yii á ke á tii laanka ton baa.

²⁰ Ma nə n lɛ dii n ganaa, n ba ma lɛ sii wa. Man golee ne n yɔrɔ-a, n ba giɛ ma-a dɔn wa.

²¹ Ma nə n bɔyɛɛ n tá kakaarɛ koe ma ganaa, n nə n we tumaa boe ma li, n nə́ zia diɛ ma-a.

²² Ń toa piɛ̃ ma saa á kiɛ̃ ma nɛ, n bìn da ma ganaa ka la piɛ̃ gole bɛ́ lɔn.

²³ Ma á doɛ̃ máa, n tá re wusii n da ma kɔ gɛ̀ la, yiikoonaan tumaa a woo ǹ bǎã ke.

²⁴ Sɛnɛ, bɛ̀ min tá giɛ li a mɛnaa, ǹ dɛnaa ba n gɔn diɛ min kɔsɔ la wa? Bɔ̀n bɛ́ á min mɛn yɛ, bɛa dɛnaa a giɛ dɔmalɛ li wa?

²⁵ Á ke, min mɛnɛn nə goã nɔmaa nɛ, man má goã wuu pii kun ka bɛn nɛ. Doobaan kɛn, bɛn makara na á goã boe ma-a.

²⁶ Ma bɛ́ n yii diɛ yii-nyɛɛ la ǹ mɛn waáraa, yii-wɛ̃ na á dɔ ma-a. Ma bɛ́ wɔlɔ fúlu duĩ, wɔlɔ tì na á daa.

Min kɔn ba n doe Zɔbu lɛ wa

²⁷ Ma gɔ́ɔ̃ n pipi, a golee wa, nɔmaa lɛawaan nə́ daa kaa ma la.

²⁸ Ma á ke má tì kɔ, sɛnɛ, wasa bie á ma tii wa. Man yui zaman bii, bɛ̀ man lɛ dɛ, ma gu da.

²⁹ Ma dɔ n goɛ̃ lɛ biɛ miɛ̃ ka toloka nɛ, n lɛ dii miɛ̃ ka bɛnda nɛ

³⁰ Ma gɔ̀nɔn ki n tì koe, niɛ̃ kiɛ, gɔ̀nɔn-wɛ̃ ma wen tã.

³¹ Bɛ lɛ n ke, maa tùtu lɛn nə woe gɛ̀ wuu pɛ li, maa pìi lɛn nə woe wuu-pɛlen lɛn li.