Zɔbu 29 - LAWA A BOO SONBORE

Zɔbu nə n yiri gisĩ a gɔn màn lɛ nɛ

¹ Zɔbu wusoo á màn da a boo li á pɛ:

² – Ee, die n die toɛ ma wusoo man baa ka maa lɛlɛ ǹ kɛ bɛ́ lɔn, Lawa bɛ́ á goã giɛ ma walan biikoo mɛn waáraa.

³ A din a bolon kɛ bɛ á goã ma mìi la, má goã tɔ we bɛ lɛ a fúlu li tèlò-n.

⁴ Man má goã miɛ̃, bɛ̀ ma bɛ́ tɔn ma din a wasa nɛ. Bɛa biikoo li, bɛ̀ maa kion kɛ n Lawa a giaárabaa giulun.

⁵ Pàãyiidɛnaa kɛ na á goã kun ma nɛ, maa nɛnyaanan nə́ ma lɛnpɛnɛ.

⁶ Man má goã n gòã pii nàari li, má goã nyɔɔ gigiã yii.

⁷ Bɛa biikoo li, bɛ̀ má soo *kiwi lɛ a kiɛnlɛ-a, bɛ̀ má maa dankan da tán bǎã mɛn nɛ,

⁸ bɛ̀ nɛ tenən nə́ ma yɛ lɔn, maǹ sawɛɛ, min golen man yui ǹ golee lon ǹ gòãn la.

⁹ Min dadaran manə ǹ boo lɛ diɛ.

¹⁰ KIIN lɛ n kuri, ǹ lɛwɔn nə damɛ ǹ kəərin li.

Zɔbu nɔmaa-wɔlen kũ doɛ̃

¹¹ Min mɛnɛn too goã maa boo miɛ, bɛn man nə́ goã barka diɛ ma ganaa. Min mɛnɛn yii goã ma yii, bɛn man nə́ goã siére pii maa wɔ paǹ li.

¹² A giala, doobaa mɛn bɛ́ á goã n lɛ dii dɔmalɛ li, má n dɔ bɛ lɛ. Dɔmalɛ wole bɛ́ a goã nɛ toen mɛn la wa, má n dɔ bɛ lɛ.

¹³ Min mɛnɛn bɛ́ ka ǹ daa ǹ gã, bɛn man barka diɛ ma ganaa. Maa zɛnaa ǹ sii na á goã kiɛ lɔ giɔɔrɔn foo la.

¹⁴ Man má goã peperebaa we ma din-a ka dɔnkɛ bɛ́ lɔn. Maa peperebaa kɛ na á goã dɔnkɛ gole lɛa ma ganaa, zín màn lɛa ma mìi-a.

¹⁵ Ma din nə má goã yii tere-a yii lɛa, ma din nə má goã bɔlɔka gòãn lɛa.

¹⁶ Nɔmaa-wɔlen kɛn, man má goã bɛn díi lɛa. Tii a kiri sii, man gɔsiɛ taãn-taãnɛ.

¹⁷ Man má goã min baraa kɛ pàãgɔn we yiɛ, a màn mɛn kũ, ma gɔsɛ ma bɔ a lɛ-n.

Minin nə́ goã Zɔbu guguru koe

¹⁸ Man má goã pii ma din ni máa: «Man die zizi koe ma gã yii-nyɛɛ gɔ́ɔ̃ nɛ. Maa lɛawaan man die mɔnɛɛ ka nyɔɔsɔ̃ bɛ́ lɔn.

¹⁹ Man ka da bɛ́ lɔn, mu n doe ma gòonən ganaa, pele n lɛ̀ wɛɛ ma gùrùn ganaa.

²⁰ Màn tá re miɛ maa gugurubaa li, ma pàã n die goɛ̃ ka sa dii wɔ bɛ́ lɔn.»

²¹ Bɛa waáraa kɛ lɛ nɛ, minin manə n too koe ma lon, ǹ nə́ n yii diɛ ma la. Maǹ nə n lɛ tiɛ̃ kiĩni, ǹ nə́ maa doree sii.

²² Bɛ̀ má boo da, min kɔn goã ma liere koe wa. Maa boon kɛn man nə́ goã gisĩ ǹ la, a n basiɛ̃ nɛ sɔnbɔraa nɛ.

²³ Maǹ nə́ goã n yii diɛ ma la, ka min bɛ́ n yii diɛ la la lɔn. Maǹ nə́ goã n lɛ tii, ka tán bɛ́ n lɛ tii la mu li lɔn.

²⁴ Man má goã yaa we ǹ ne, ǹ dinin manə goã n kaãbiɛ bɛ ganaa. Man yɔrɔ kɔsɛ ǹ ganaa ǹ kɔn pinaa wa.

²⁵ Man má goã ǹ mìi la, má n zii nyɛɛ ǹ nɛ. Má giã ǹ bii ka kii bɛ́ a sɔraasin bii lɔn, ka foo-ziziɛ̃ wolen foo-basãli bɛ́ lɔn.