Zɔbu 27 - LAWA A BOO SONBORE

Zɔbu mà asɛ sii la wa

¹ Zɔbu wusoo á màn da a boo li á pɛ:

² – Lawa lɛ n ma nui ka sonbore ne, Pàãyiidɛnaa lɛ n ma foo ziziɛ̃. Ka bɛa Lawa yiikoonaa kɛ lɛ tɔ nɛ,

³ bɛ̀ ma á tɔn boe la ma á piɛ̃ sii, bɛ̀ Lawa a piɛ̃ kɛ á tɔn ma nyin ni,

⁴ ma nə n liɛ, máa ma lɛ a re boo kɔkɔrɔ kɔn diɛ wa, ma lɛwɔn ba re soɛ kɔn boe wa.

⁵ Bɛ̀ má sonbore kɔ ka la, sii bɔnɛɛ n má zɛnaa. Yǎa a woe kiɛ maa gɛ̀ lɛ, man pii ka nɛ, máa ma sii la wa.

⁶ Maa peperebaa ke, ma lɛ n bɛ ganaa, ma a re n lɛ boe wa. Ma foo a ma zɛ̀rɛ biɛ ǹ kɔn pinaa wa.

Zɔbu mà Lawa dɔlɔ bɔ asɛ a zɔ́ɔn ganaa

⁷ Lawa, min baraan dɔlɔ ke, toa bɛ maa zɔ́ɔ kɛ kũ! Maa yoo ma gialaa wole ke, bɛ kũ ka n bɛ́ sii baraa zɛnaali kuĩ lɔn!

⁸ Bɛ̀ Lawa min baraa nyin si, bɛ̀ a ná a telenboen si la, a foo doa ǹ bǎã n ka wàa mɛn nɛ doo?

⁹ Bɛ̀ nɔmaa kɛ daa kaa la, Lawa á re a lɛ-dɛ miɛ̃ ya?

¹⁰ Pàãyiidɛnaa a sii tá re min baraa a foo kɔɔ̃nbaa biɛ? Á re Lawa nyankoe biikoo tumaa li?

Doroo kɔ zɔ́ɔ la là banban

¹¹ Man die Lawa a boo sii la nyɛɛ ka nɛ, ma a die Pàãyiidɛnaa a taasiɛ duri ka la wa.

¹² Ka dinin tumaa bɛ́ ka Lawa a nya ǹ dí lɛ yɛ. Wàa na á baa doo, ká n tɔn taasiɛ kooro we?

Lawa bɛ́ dɔlɔ boe min baraan ganaa lɔn

¹³ Lawa bɛ́ màn mɛn koɛ min baraa nɛ, a wɔ lɛa, min kakaarɛ bɛ́ màn mɛn yii Pàãyiidɛnaa lɛ li, bɛ n ka kɛ nɛ:

¹⁴ Bɛ̀ a nɛnyaanan nə́ mɔnaa, maǹ die gɔya gɛ̀ we. A tɔrɔn ba re màn-bii yii ǹ kã wa.

¹⁵ A min mɛnɛn bɛ́ re liɛ, busu babaraa á die bɛn we tii li. Ǹ lɔn ba re boe la, ǹ nə ǹ gɛ̀ wuu dɔ din pɛ wa.

¹⁶ Ta a na á wɔrɔ sɔkɔn á mɔnaa ka nyɔɔsɔ̃ bɛ́ lɔn, ta a na á mɔnaa kaa kun gigiã lɔn,

¹⁷ a mɔnaa lɛ á kaa kun, min pepere n die we. Wɔrɔ ke, zɛ̀rɛbaãnaa wɔ nɛ.

¹⁸ A na a kion doe ka nɔɔ wɔ bɛ́ lɔn, ka siã kɛ bɛ́ lɔn, wɔlɔ-lɛduə̃li n doe.

¹⁹ A màndɛnaamaa n wɛɛ tán, sɛnɛ a yii lɛ dɔ n ka bɛ nɛ. Bɛ̀ á n yii bũ, a n die yiɛ màn kɔn banban.

²⁰ Nyɛ́ɛ da ǹ siin tá re kirii la, ka mu gole bɛ́ lɔn. Tèlò goon gɔ́ɔ̃ nɛ, kurunkurun tá re siɛ a kiɛ̃ nɛ.

²¹ Piɛ̃ kɛ n boe a kion ka pàã nɛ, a soo ne. Lɛ̀giala piɛ̃ kɛ n siɛ a bɔ a bǎã nɛ, a kiɛ̃ nɛ.

²² A n kiɛ diɛ a din lɛ la, makara din ba a-n wa. A dɔ nə n doɛ á baa sii, mà kiɛ baran asɛ kũ wa.

²³ Sɛnɛ, maǹ nə n gɔn dii a bɔ̀n yɛ kɛa lɛa, ǹ tá re loe ka lɛpii ni a din a kion.