Zɔbu 26 - LAWA A BOO SONBORE

Zɔbu n Bildaadi diɛ yaa lɛa

¹ Zɔbu tɔn a lɛ si á pɛ:

² «N tá n doe pàãwɛɛnaa lɛ doɛ̃ koe! N tá busulə kirisibiɛ doɛ̃ koe!

³ N tá baãnaa doree doɛ̃ koe! Sii-doɛ̃ n ka ǹ mɛn nɛ n tá nyɛɛ ma nɛ!

⁴ Ma n bɛa boon lɛn diɛ die din ganaa? N bɛ́ boo mɛn diɛ, die na á bɛ da n yiri-a?

Boo kɔsɔn, Lawa a golebaa wɔ paǹ li

⁵ Geren dinin man bìn diɛ Lawa nyɛɛnɛ, ǹsɛn mɛnɛn bɛ́ mu laanka mu li ǹ mànan giulun.

⁶ A giala, geren piɛ a sii tumaa n foaãnɛ Lawa yɔrɔ-a, bɛa nyankɔrɔ zuzulu kɛa sii kɔn ba durii-n Lawa-a wa.

⁷ A din na á lon da á lɔɔ lon kooro, á tán zɛnaa á da bii-a kooro.

⁸ A labaran pã ka mu ni, mu a la yii-n ba ǹ puri dɔn wa.

⁹ Lawa màn kɔ a kii dankan kɛ lɛ, á bara bɔ á kɔ a kiibaa ǹ bǎã kɛ lɛ.

¹⁰ Á gèlè da mu la luurii ni, bɛ́ wɔlɔ fúlu na á bɔ kɔn ka wɔlɔ tì ni.

¹¹ Bɛ̀ á paraa, lon a bìbìn man bìn diɛ, nyɛ́ɛ nə ǹ kuĩ a paraa lɛ gɔn.

¹² A din pàã n boe kɔ̀ mu la, a yiridɛnaabaa n mu li ǹ màn babaraa kɛ yɔyɔrɛ.

¹³ Bɛ̀ á piɛ̃ bɔ, lon nə goɛ̃ ka foaã, mu li ǹ màn babaraa ke n mɔmɔnɛ, a din gɔn nə bɛ niɛ̃ kɔn.

¹⁴ A nya ǹ dí lɛ lɛkoro din nə ka bɛ nɛ, bɛ lɛ wuu boɛɛnɛ wɔ á miɛ̃. Sonbore, Lawa á sii dadaran zɛnɛɛ. Die n boe la a bɛn giala ma?»