Zɔbu 24 - LAWA A BOO SONBORE

Min baraan man mɛnɛɛ doobaan la

¹ Pàãyiidɛnaa bɛ́ re a kiri lɛ kuri lɛawaan mɛnɛn li, wàa na á baa, a bɛn bɔ á ǹ koa wa? Min mɛnɛn bɛ́ Lawa doɛ̃, wàa na á baa, bɛn ba tɔn a lɛawaan kɛn lɛn yii wa?

² Ga le, min baraan man wuru gèlè zoɛ̃, ǹ nə́ we ǹ miãn wɔ lɛ nɛ, maǹ tɔɔn koɛ̃, ǹ nə́ ǹ toe ǹ dinin bǎã nɛ.

³ Maǹ nɛ toenən dundun sii ǹ la, maǹ lɔ giɔɔrɔ a dii sii la màn dòo.

⁴ Maǹ nɔmaa-wɔlen lui ǹ boe zii la, gána lɛ a doobaan tumaa, yǎa bɛn nə n duri.

⁵ Á ke, doobaan lɛn man ka don dundunun bɛ́ lɔn don sa bii. Maǹ yui baayɛlɛ yiisoone ǹ wo ǹ dí la, maǹ woe giɛ màn-bii li don sa bii ǹ da ǹ nɛnyaanan too ne.

⁶ Maǹ woe buu kuri don, nɛ gogoon mɛn goã min baraan *rezɛ̃ da la ǹ bɛ nana.

⁷ Tèlò-n, maǹ wɛɛ tán ka ǹ gɔ̀nɔn kooro ne, mɔnaa banban. Ta nyan nə boe, kɔmalɛ ba ǹ lon wa.

⁸ La nə n duwii kele la, manə n naɛ gɛ̀fun ganaa, duru ǹ bǎã kɔsɔ banban.

⁹ Min baraan man nɛ toen lɛ niɛ̃ nyɔ ganaa, maǹ là boe doobaa la.

¹⁰ Maǹ doobaa diɛ tɔ ganaa ka a gɔ̀nɔn kooro ne, mɔnaa ná a ba a ganaa wa. Maǹ *belee diɛ doobaan mìi ni, bòo dɔ nə́ ǹ ganaa.

¹¹ Doobaan man nyɔɔ dí nyɛɛ min kɔsɔn bǎã nɛ, maǹ rezɛ̃ tɔtɔrɛ, mu boro dɔ nə́ ǹ ganaa.

¹² Kiwi gɔ́ɔ̃ nɛ, minin manə n dinin didii, là paparɛɛ wolen manə n lɛ didii, Lawa dɔ ba n too koe ǹ nyankɔ li wa.

¹³ Sii baraa-zɛnaalin lɛn ba lɛ koe wɔlɔ fúlu ganaa wa. Ǹ ba a zii doɛ̃ wa, ǹ bin kɔ a zii lɛ wa.

¹⁴ Gɛ̀-dɛle lɛ n yui baayɛlɛ yiisoone, a nɔmaa-wɔle doobaa kɛ lɛ dɛ. Tèlò-n, a nə n din biɛ wurumu lɛa.

¹⁵ Naarɛbaali nə n yii diɛ wɔlɔ a tii la, a n pii mà min ba re asɛ yii wa, a nə n duri a woo.

¹⁶ Wurumu n kiɛnlɛ yiɛ wɔlɔ tì li. Bɛ̀ lɛ̀ waa, a n kiɛnlɛ tiɛ̃ a dinin lɛ, ǹ ba wɔlɔ fúlu doɛ̃ wa.

¹⁷ Ǹ dinin tumaa, bɛ̀ wɔlɔ tii, ǹsɛn lɛ̀ na á waa. Wɔlɔ tì a nyɛ́ɛ diɛ ǹsɛn ganaa wa.

Min baraan dɔlɔ giala nyɔmiɛ̃

¹⁸ Sɛnɛ, min baraa n puusə ka paan bɛ́ lɔn. Maǹ bɔ̀n bíi a wurun li. A ba a rezɛ̃ wuru zii din siɛ doo wa.

¹⁹ Lɛ̀ gere laanka wɔlɔ fuu n *mu nyuù-wɔle yoe, geren piɛ dɔ n die sii baraa-zɛnaali mui miɛ̃.

²⁰ Lɔ mɛn din yɛ, bɛ yiri n boe ne. Nyuunun manə n nyɛnyɛɛ la yala-n. Min kɔn ba n taasɛ ka a sii-n doo wa. Min baraa lɛ nyin biɛ na, ka da gùrù na á yiɛ.

²¹ Lɔ mɛn bɛ́ a nɛ yii wa, á mɛnaa bɛ la, a lɔ giɔɔrɔ kũ doɛ̃ wa.

²² Sɛnɛ, pàã tá Lawa lon, a min kakaarɛn kɛn dinin loo. Bɛ́ á yoo, ǹ ba wɛɛ la dinin mà ǹsɛn tá liɛ doo wa.

²³ Lawa n zɛnɛɛ ǹ taasɛ mà ǹsɛn tá là nyantoro la, sɛnɛ, a n giɛ ǹ tɔ wɔ ǹ gɔn ganaa.

²⁴ Min baraan lɛn mìi n lon biikoo boɛɛn gɔ́ɔ̃ nɛ, bɛ kio, ǹ papaã. Maǹ nə́ n mìi zumii ka da buũ bɛ́ giɛ̃ lɔn. Maǹ bɛbɛnɛ ka maǹ nə́ wii san kuru.

²⁵ Bɛ̀ a miɛ̃ wa, ka pɛ mà soɛ n má bɔ. Ka mɛn nə die maa boo kɛ biɛ boo kooro lɛa?»