Zɔbu 23 - LAWA A BOO SONBORE

Zɔbu n zoɛ̃ li a boo da ka Lawa nɛ

¹ Zɔbu tɔ́n boo saa á pɛ:

² «Pelo doo, maa busii lɛ a nɛn ma la wa, ma nə n gɔn koe ma lɛ lɛ foɛ̃.

³ E, ma bɛ́ re yii bǎã mɛn nɛ, toa bɛ̀ man bɛ doɛ̃, bɛ̀ man die woe doe a li a kiri wɔ ǹ bǎã kɛ nɛ.

⁴ Bɛ̀ man die n kàrà piɛ̃ boo-n ma woo, ma wo n duduwəə a din yɔrɔ-a, ka maa sii ni.

⁵ A bɛ́ re ma lɛ sii ka boo mɛn nɛ, bɛ̀ ma bɛ́ re bɛ doɛ̃. A bɛ́ re boo mɛn diɛ, bɛ̀ ma bɛ́ re boe la ma bɛ giala ma.

⁶ Boo lɛ a diɛ gɔ́ɔ̃ nɛ, bɛ̀ Lawa n die n pàã tumaa boe ma li ya? Haayii! A tá re n yiri koɛ maa pàãwɛɛnaabaa kɛ li sɛn.

⁷ Bɛ̀ a na á bɛ lɛ baa, bɛ̀ min pepere n die n bɔlɔ pii a yɔrɔ-a, bɛ̀ a n die maa sii kɛ siɛ a bɔ ma mìi-n duduu.

Zɔbu giɛ Lawa li paǹ tumaa li

⁸ Sɛnɛ, bɛ̀ má woo lɛ̀giala-n, a walan wa. Bɛ̀ má woo lɛ̀nyɛɛnɛ, ma a yii wa.

⁹ Bɛ̀ dí na a gɔn gɔsɛ a lɛ̀gɔn la, ma bɛ́ ma a boe la ma yɛ walan wa. Ta a nə n duri gusin a lɛ̀gɔn la, ma yii a yii walan wa.

¹⁰ A da yaa, a din tá masɛ a kiɛ̃ ǹ zii doɛ̃. Bɛ̀ á maa sii giala gɔsɛ, man die soe a-n *yoreen ka sana bɛ́ lɔn.

¹¹ Má kɔ a gòɛ̃ lɛ, má kɔ a zii kɛ lɛ, ma kanaa wa.

¹² A lɛ gɔ́ɔ̃ ǹ boo ke, ma talaa má n bɔ bɛ la wa. A din a dí-pɛn kɛn, má bɛn sii zɛnaa á la ma din foo sii ni.

¹³ Sɛnɛ, asɛ bɛ́ á golee goon la, die n boe la a bɔyaa? Sii mɛn bɛ́ kɔɔ̃n a din ganaa, bɛ nə n zɛnɛɛ.

¹⁴ Bɛ lɛ nɛ, a sii mɛn yɔrɔ bɔ maa wɔ paǹ li, a n die bɛ zɛnɛɛ. A gigiã kɔsɔn dɔn dinin tan, a nə́ n yii diɛ ma la ka bɛn nɛ.

¹⁵ Bɛ lɛ na á toa, a yɛ din tá ma foo biɛ niɛ̃, bɛ̀ má n taasɛ nɛ, ma nyín nə soe.

¹⁶ Lawa maa foo taãbaa nya, Pàãyiidɛnaa ma nyín soo.

¹⁷ Wɔlɔ tì kɛ bie á toa má n lɛ tã wa, wɔlɔ tì biribiri ke á n kɔ ma lɛ, bɛ dɔ bie wa.