Zɔbu 22 - LAWA A BOO SONBORE

Elifaazi mà Zɔbu na á mɛnaa doobaan la

¹ Elifaazi mɛn bɛ́ boe Teman bɛ́ tɔ́n pɛ:

² – Minbuiin nɛ là á boe la a yɛ Lawa ganaa? Ta ǹ mɛn din nə sii doɛ̃, a sii-doɛ̃ lɛ a là na a din ganaa.

³ N peperebaa kɛ lɛ tá Pàãyiidɛnaa yii li ǹ sii lɛa ya? Ta ma n nə́ n tɔ wɔ ǹ gɔn tele, bɛ n wàa koe Lawa la?

⁴ Ma n taasɛ mà Lawa n dɔlɔ boe n ganaa, á n kiri we n ganaa n peperebaa kɛa lɛa? Haayii dɛ!

⁵ Sɛnɛ, n baraabaa lɛ na á la yii ni, n sii baraa mɛn zɛnaa, lɛ ba la wa.

⁶ A giala, ma nə́ ń goã là boe n dɔɔ̃nɔn la kooro, bɛ̀ n nə ǹ mɔnaa kũ n si ǹ la, n nə ǹ gɔ̀nɔn kooro da bii-a.

⁷ N goã mu koe mu borodɛnaa la wa, ń goã bòonaa nui ka màn-bii ni.

⁸ Ma nə́ ń goã tán koe gɔndɛnan la, pàãdɛnan man nə́ goã giɛ̃ gána lɛ nɛ.

⁹ Ń lɔ giɔɔrɔn loo, ǹ nə́ woo ka ǹ gɔn kooro ne, ń nɛ toenən gɔn yu.

¹⁰ Bɛ lɛ n ke, kan nə́ n kũ n paǹ yii-a, nyɛ́ɛ nə́ n kũ á n foo biɛ na.

¹¹ N yii ba wɔlɔ tì kɛ ganaa n la wa? A n ka mu gole bɛ́ lɔn n kuĩ.

¹² Lawa lɛ n lon sɔsɔɔ. Ga leeren kɛn dinin sɔsɔɔbaa ganaa le!

¹³ Bɛ lɛ nɛ, nsɛ á pii mà Lawa n wàa doɛ̃? Á boe la a n toa labara tì kɛ nɛ a kiri kuru?

¹⁴ Bɛ lɛ din na a siã, a toɛ a yii á màn kɔn yii wa. A nə n bibiĩ lon kɛ lɛ dinsɔɔ̃ lɛnpɛnɛ.

¹⁵ Min baraan nə goã koe zii mɛn lɛ lɛlɛ, n dɔ n giɛ li n bɛ lɛ saa?

¹⁶ Maǹ nə́ gã, bɛ̀ ǹ gɛ̀ ná a tɔn dɔ wa, mu nə́ ǹ kionən goa á kiɛ̃ ǹ nɛ.

¹⁷ Ǹsɛn mɛnɛn nə goã pii Lawa-n kɛnɛn: «N bɔ wɔ wɔlɔ li. Pàãyiidɛnaa n boe la a wàa zɛnaa wɔ nɛ?»

¹⁸ A da yaa a din lɛ dɔ ná a ǹ kionən pã ka yii-nyɛɛ nɛ. Lawa die a min baraan taasiɛ kɛ wɔlɔ lui masɛ ganaa.

¹⁹ Min peperen tá re bɛ yii, ǹ nə n nyɛnyɛɛ. Zɛ̀rɛbaãnaa tá re yaa we ǹ ganaa.

²⁰ Ǹ tá pii: «Wɔa zɔ́ɔn lɛn nə́ ke ǹ nə́ bɔ̀n baa, tɛ nə́ ǹ gɔn màn lɛ tumaa kũ.»

Elifaazi mà Zɔbu wusoo a da Lawa li

²¹ A bɛ́ miɛ̃, wusoo n kaa kun ka Lawa nɛ, là nyantoro goã ka biin ni. Bɛ̀ ń bɛ zɛnaa, á re wusii a yii-nyɛɛ kɔ n la.

²² A bɛ́ doree mɛn koe n la, bɛ si. A bɛ́ boo mɛn pii n ni, bɛ tamaa n yiri ni.

²³ Bɛ̀ ń wusoo ń daa Pàãyiidɛnaa li, bɛ̀ ń sii kɔkɔrɔ zɛnaa kɛ wɔlɔ lui n kion ganaa, á re wusii a n saa a n da lon.

²⁴ N sana lɛ zũ tii li kəni, sana yoreen yoreen lɛ zũ tà mu li, kɔlɔn bii.

²⁵ Pàãyiidɛnaa lɛ á die n sana biɛ, a din tá re wɔrɔ gigiã biɛ n lon.

²⁶ Bɛa biikoo li, n tá re n nyɛnyɛɛ Pàãyiidɛnaa lɛ a sii ganaa, n tá re n yɔrɔ diɛ Lawa la, n foo n doa nɛ a ganaa.

²⁷ Bɛ̀ ń ná a nyankɔ, á re n lɛ sii. N dɔ lɛ kɔ la ka mànan mɛnɛn n tá re bɛn koe la.

²⁸ Bɛ̀ ń sii mɛn koa n yɔrɔ-a, bɛ n giala yii. Bɛ̀ ń zii mɛn saa, wɔlɔ fúlu á die boe bɛ la.

²⁹ Lawa n min baraan n sii yɔrɔ bɔn ziziɛ̃, sɛnɛ min mɛnɛn bɛ́ n dinin gisĩ, a n bɛn kirisibiɛ.

³⁰ Lawa lɛ bɛ́ n zɛ̀rɛbaãnaa kirisibiɛ, bɛ̀ n dɔ sii la wa, n tá re n boe a nɛ.