Zɔbu 21 - LAWA A BOO SONBORE

Zɔbu mà min baraan lɛn dinin wɔ n soɛ

¹ Zɔbu tɔn boo saa á pɛ:

² – Ka sabara baa ka n too kɔ ma lon doɛ̃. Bɛ̀ ká bɛ zɛnaa ka á re ma foo basɛ̃.

³ Ka si ka ganaa, ka toa ma dɔ boo da. Bɛ̀ má boo da má nya, ka tɔn kaa yaa lɛ wɔ.

⁴ Masɛ n maa busii lɛ pii minbuiin nɛ-n ya? Man ma a n foo fuu koe lɔn wa?

⁵ Ka n yii saa ka ga ma ganaa. Ka dinin man die n kaãbiɛ ka n gɔn kɔ ka lɛ lɛ.

⁶ Ma dinmaa ke, bɛ̀ má n taasɛ ka maa sii kɛ-n lɔn, nyɛ́ɛ n ma kuĩ, ma gɔ̀nɔn nə bìn diɛ.

⁷ Wàa na á baa min baraan yii n goɛ̃ koo? Wàa na á baa ǹ tá zizi din koe, màn nə́ tɔn miɛ ǹ pàã li?

⁸ Ǹ nɛnyaanan gòãn man doɛ bɛ̀ ǹ dinin tan. N tɔrɔn man pàãman biɛ ǹ dinin yii ni.

⁹ Ǹsɛn man là nyantoro la ǹ kion, ǹ ba nyɛ́ɛ doɛ̃ wa. Lawa a bàlà kɛ ba ǹsɛn duwii wa.

¹⁰ Bɛ̀ ǹ dii gɔ̀lɔ̀n nə́ dii dii daãnan la lɔn man kuĩ. Ǹ dii daanan man nɛ yii, ǹ ba nɛ daɛ wa.

¹¹ Maǹ nə ǹ nɛnyaanan toɛ ǹ nə́ baa sii ǹ dinin foo yii li ka tɔɔ nɛn wɔ bɛ́ lɔn. Maǹ nə ǹ toɛ ǹ nə́ parɛ ǹ dinin gɔn wìi a lɛa.

¹² Min baraan lɛn man loe diɛ dundu laanka tùtu wuu li. Maǹ nə n nyɛnyɛɛ pìi wuu li.

¹³ Maǹ nə ǹ lɛawaa tumaa zɛnɛɛ yii-nyɛɛ gɔ́ɔ̃ nɛ, bɛ kio, ǹ tɔ n gisĩ geren piɛ.

¹⁴ A da yaa, ǹ dinin lɛn man pii Lawa nɛ: «Wɔ toa kiĩni. Wɔ ba li wɔ n zii kɛ dɔ̃ wa.

¹⁵ N Pàãyiidɛnaabaa lɛ taman yii, yǎa wɔ dí nyɛɛ n nɛ? N nyankɔ kɛ lɛ din nə wàa koe min la?»

¹⁶ A laanɛ ǹ tá bɛ pii, yii-nyɛɛ ba ǹ lon wa? Sɛnɛ, Lawa die a min baraan taasiɛ kɛ wɔlɔ lui masɛ ganaa!

¹⁷ Ka bin nə́ min baraan yɛ giɛ̃ miɛ̃? Bɔ̀n tá ǹ yii miɛ̃, Lawa foo á busi ǹ li a dɔlɔ da ǹ mìi ni?

¹⁸ Ǹ tá ka làpaa bɛ́ lɔn piɛ̃ n siɛ? Ǹ tá ka kaã bɛ́ lɔn kurunkurun nə́ goɛ sonbore?

¹⁹ Lawa n die min baraa a dɔlɔ lɛ boe a nɛnyaanan ganaa lɛn sonbore? A n siĩni a bɔ a dinmaa ganaa, bɛ á toɛ a sii dɔ̃.

²⁰ A din nə siĩni a na a nɔmaa lɛ yɛ ka a din yii ni, a dɔ din Pàãyiidɛnaa a foo-yoo kɛ lɛ a sii nɛ̀n da.

²¹ Bɛ bie wa, bɛ̀ a lɛawaan lɛ pã yǎa a gã, sii mɛn bɛ́ a nɛnyaanan yii a kio, a wàa mɛn sii n bɛ nɛ?

²² Min tá sii-doɛ̃ nyɛɛ Lawa nɛ, asɛ mɛn bɛ́ kiri kuri lon a dia dí-a wolen la?

²³ Ka dɔ̃ mà min tá n toɛ kaka, á n yii-nyɛɛ gɔ́ɔ̃ nɛ, là nyantoro la, a n tã la a gã.

²⁴ A dɔ n ke á kasã a kolon nə́ bɔ, a we n tɔn kaka ka a bɛ́ lɔn.

²⁵ Min dɔ n giɛ̃ foo-ziziɛ̃ gɔ́ɔ̃ nɛ, a ná a yii-nyɛɛ nɛ̀n da wa.

²⁶ Ǹ dinin paanan man die wɛɛ tii kɛ lɛ giulun tán kun, nyuunun nə n tã ǹ nə n kɔ ǹ lɛ.

²⁷ Masɛ á kaa taasiɛ doɛ̃ taãn-taãnɛ. Ka bɛ́ taasiɛ babaraa mɛn we maa wɔ paǹ li, ma á doɛ̃.

²⁸ A giala, ka n pii: «Pàãmaa lɛ a kion lɛ á maa kəni? Min baraan lɛn giã ǹ bǎã lɛ na á n baa lɔn?»

²⁹ Kánaa, ka bin nɔ̀n da zii tɔ-wɔlen la wa? Kaa lɛ koe ǹ boo ganaa wa?

³⁰ Bɛ̀ bɔ̀n daa ǹ mɛn pinaa, a min baraa yii wa. Lawa a foo-yoo pinaa, asɛ n kanbiɛ.

³¹ Die yii n we a min baraa zɛ̀rɛ baa a din yii ni? A sii mɛn zɛnaa, die na a dɔlɔ boe a ganaa?

³² Asɛ din, bɛ̀ á gã, maǹ siɛ ǹ wo bĩ, ǹ na a yala lɛduə̃.

³³ Bɛ̀ ǹ tá woe ka a gere ne, zaman tumaa n woe diɛ zii. Kɛn man a kio, kɛn man a nyɛɛnɛ, min ba ǹ nimii a ǹ lɛ dɔ̃ wa. Yala tii lɛ din nə puusə a ganaa.

³⁴ Ka n boe la ka masɛ foo basã lɔn, ka boo kooron kɛn nɛ? Kaa boo lɛ tumaa soɛ.