Zɔbu 2 - LAWA A BOO SONBORE

Zɔ́ɔ Sɛtaan yoo Zɔbu gialaa doo

¹ Ǹ kɔn pinaa doo, lon a dia dí-a wolen lɛn nə́ woo Dɛnaa Lawa a lɛ-dia ganaa. Zɔ́ɔ *Sɛtaan lɛ daa kunun ǹ ni bɛa pinaa doo, á daa golee Dɛnaa Lawa yɔrɔ-a.

² Dɛnaa Lawa nɔ̀n da la: «Ma n boe maa kəni?» Zɔ́ɔ lɛ Dɛnaa Lawa lɛ si: «Man má woo n bibiə̃ kanaa, má kɔɔ̃naa wɔ.»

³ Dɛnaa Lawa tɔ́n pɛ nɛ: «Táa ń masɛ a dí-nyali Zɔbu kɛ yɛ? Ǹ miã din banban kanaa wa. Min pepere ne, a zɛnaa ǹ sii n siĩni, á n nyɛ́ɛ biɛ masɛ Lawa yii ni, n nyɛnɛɛ sii baraa nɛ. A ke, a tɔn sii kɔn la wa, n dɔ á ke ma diɛ a dɛ ganaa kooro.»

⁴ Zɔ́ɔ tɔ́n pɛ Dɛnaa Lawa nɛ: «Didie n giɛ a din nyin li bɔrɔ. Minbuiin nɛ á boe la a n gɔn màn tumaa kɔ, a ga a din nyin li ni.

⁵ Bɛ̀ á soɛ lɛa, busu da Zɔbu ganaa. Bɛ̀ a golee n din yɔrɔ-a, á boo baraa da n ganaa wa, n da màn si ma la.»

⁶ Dɛnaa Lawa dɔ́ pɛ Zɔ́ɔ nɛ: «Haya le. Má Zɔbu lɛ kɔ n la. Sɛnɛ, a nyin kɛ sɛ, n nyan nə n gɔn da bɛ-a wa.»

⁷ Zɔ́ɔ Sɛtaan bɛa boo lɛ ma lɔn, á kiɛ̃ á n bɔ Dɛnaa Lawa yɔrɔ-a. A dɔ na á woo gɔrɔ, á gɔ̀nɔn ki busu babaraa da Zɔbu ganaa. A saa a gòãn ganaa a wo a baãbii yaa, a tumaa baayɛrɛ.

⁸ Zɔbu na á goã n gɔ̀nɔn lɛ gasiɛ̃ ka tanpara nɛ, bɛ̀ a wo giã tán tontonbɔlɔ la.

⁹ Zɔbu a lɔ tɔ́n pɛ nɛ: «Ma n tɔn tán mà peperebaa nɛ n tá a gɔ́ɔ̃ nɛ? Boo baraa da Lawa lɛ ganaa n gã gɔrɔ, bɛ á soɛ kɛ nɛ.»

¹⁰ Ǹ zuũ lɛ tɔ́n a lɛ si: «Ma n boo diɛ ka baãnaa bɛ́ lɔn. Nsɛ mà lɔn! Lawa bǐɛ̃ baa wɔsɛn manɛ, wɔ bɛ si. Bɛ̀ a baraa-n kəni, wɔ nə n piã ka bɛ nɛ?» Bɛa sii lɛ tumaa gɔ́ɔ̃ nɛ, Zɔbu nə n lɛ bũ á boo basaã kɔn da wa.

Zɔbu a giaára min sɔɔ daa a foo waa

¹¹ Zɔbu a giaára na á goã min sɔɔ: Elifaazi ke boe Teman, Bildaadi ni boe Suwaa, ka Sofaara nɛ boe Naaman. Koe mɛn Zɔbu yɛ, ǹ tumaa ná a boo ma. Ǹ nə́ da kun, mà ǹsɛn man woe gu we la, ǹ na a nyin ti a ganaa.

¹² Ǹ bɛ́ ǹ nə́ n toa tìãlɛa ǹ nə́ Zɔbu yɛ, ǹ nə́ fɔ̃ a ganaa. A giaáran lɛn nə́ n lɛ da wuu-n kɔsɛkɔsɛ. Foo-ziziɛ̃ gɔn, ǹ nə́ ǹ mɔnaan tɔtoɛ̃, ǹ nə́ tii goa ǹ nə́ kaa ǹ dinin mìi ni.

¹³ Ǹ nə́ giã tán Zɔbu li lɛawaa sɔbaa ka tèlò sɔbaa, boo goon ná a ba n diɛ ǹ la wa. A giala, ǹ nə́ yɛ mà Zɔbu a là-paparɛɛ lɛ gole kɔ, á la yii ni.