Zɔbu 19 - LAWA A BOO SONBORE

Zɔbu a giaáran dinin gole kɔ

¹ Zɔbu tɔ́n boo saa á pɛ:

² – Ka á ma foo ziziɛ̃, kaa boo lɛ din la ma yii ni, ka n die n susui biĩ?

³ Á ke, ká dɔ gunyin fù gɔrɔ sɔ koe ma ganaa. Ka n nyɛɛ ma yii-n miɛ̃, a sìi diɛ ka-a wa?

⁴ Ta man má sã dinin lɛn sonbore, a mìi gɔ́ɔ̃ ǹ sii n ma dinsɔɔ̃ wɔ lɛa.

⁵ Ka n maa koe-yɛ kɛ siɛ biɛ ma din zɛ̀rɛ lɛa, ká n giɛ li mà boo lɛ goã ka dinin wɔ ganaa.

⁶ Haayii. Ka dɔ̃ mà Lawa din na á wɔ ma lon. Ka dɔ̃ mà a din na á na a zɔ̀ɔ kɔ ma nɛ.

Zɔbu mà Lawa á kakaarɛ asɛ ganaa

⁷ Ga le. Bɛ̀ má n lɛ dɛ máa "á ke ma gialaa", min kɔn ba ma lɛ sii wa. Bɛ̀ má lɛ dia máa "ka da ma la", min kɔn ba boe ma lɛ-a wa.

⁸ Dɛnaa ma nyɛɛnaan kurəə, kiɛ̃ ǹ bǎã ba ma la wa. Á n kɔ maa zii lɛ, ma yii a bɔ ǹ lɛ-a wa.

⁹ Á maa gugurubaa kɛ toɛ̃ á bɔ ma-a, á zín bɔ maa golebaa kɛ nɛ.

¹⁰ Á ma paǹ tumaa ziziɛ̃, maa wɔ nya. Ma foo doa ǹ bǎã ke, á bɛ giala bɔyaa.

¹¹ A foo n yoo-n ma li, á ma baa a zɔ́ɔ kɔn lɛa.

¹² A zia kurun nə́ n sɔkɔn, ǹ nə́ zii fɔ̃ yǎa ma din li ka kɔ, ǹ nə́ daa zìã dɔ maa kion ganaa.

Zɔbu a kion minin man a gialaa

¹³ Ma dɔɔ̃nɔn kɛn, á bɛn na á ǹ bɔ ma ganaa. Maa giaáran, bɛn nə́ ma tii.

¹⁴ Min din ba ma la doo wa, ma din wɔn kɛn, bɛn yiri bɔ ma nɛ.

¹⁵ Tiin mɛnɛn bɛ́ maa kion, ka maa bɛ̀rɛlɔn nɛ, bɛn man giɛ ma ganaa tii lɛa, má min kɔsɔ baa ǹ yɔrɔ-a.

¹⁶ Ma din nə lɛ diɛ maa dí-nyali la pelo, ma na a gòã kuĩ, a ba ma lɛ sii wa.

¹⁷ Ma gìĩ ba maa lɔ dii wa, ma tìĩ bɔ ma din dannɛn kɛn dɔn nyin ni.

¹⁸ Nɛnyaanan dinin man ma piɛ̃ boe, bɛ̀ ma á yui, maǹ ma diɛ yaa lɛa.

¹⁹ Ma din a giaára taãnan kɛn, ma tìĩ bɔ bɛn nɛ. Ma goã min mɛnɛn narɛ, bɛn nə́ n bɔyaa ma li.

²⁰ Má pɛrɛ, ma gɔ̀nɔn siĩ dama ma we ganaa, ma sàabaa.

²¹ Maa giaáran lɛn, ka sabara baa, ka sabara baa ka ga ma makara-a, a giala Lawa gɔn na á mɛ ma-a.

²² Wàa na á baa ka dɔn tá ma gialaa kɛnɛn, ka Lawa wɔ bɛ́ lɔn? Ka bɛ́ ma pɔpɔsɛ, bɛ tɔn dɔ ka yii li wa?

Lawa á re Zɔbu boe sii ni

²³ E, toa bɛ̀ min nə yii, a maa boon kɛn dinin kiɛ̃, toa bɛ̀ min nə yii, a ǹ kiɛ̃ màn la.

²⁴ A kiɛ̃ ka kiɛ nɛ, a fɔlɔ bù yo a kaa la. Toa bɛ̀ bɛ n goɛ̃ kiɛ̃-n kɔlɔ ganaa miɛ̃ yǎa duduu.

²⁵ Masɛ á doɛ̃ máa maa bɔ sii-n wole lɛ yii á koo. A din nə die yui a golee, a boo giala nyɔmiɛ̃ da.

²⁶ Ma gɔ̀nɔn kɛa ziziɛ̃ kio, ma dinmaa n die Lawa yii.

²⁷ Ma din nə die yii, ma dinmaa. Ma din yii n die yii, min kɔsɔ wɔ bie wa. Á ke, a sii n ma kuĩ tɛ lɛa.

²⁸ Ka n pii: «Wɔ n die fuu mɛn tɔrɔ nyɛɛ nɛ. Wɔ n die n gɔn kuĩ wàa ganaa wɔ tɔn a zɛ̀rɛ baa?»

²⁹ Ka dininmaan lɛn tá siĩni ka nyɛ́ɛ baa gɔya sa nɛ. A giala gɔya sa a dɔlɔ á baraa. Ka dɔ̃ mà kiri kurii lɛawaa á die.