Zɔbu 18 - LAWA A BOO SONBORE

Bildaadi yoo Zɔbu gialaa

¹ Bildaadi mɛn bɛ́ boe Suwaa, bɛ́ tɔ́n boo saa á pɛ:

² «Biĩ ni, ka á re n lɛ tiɛ̃ boo lɛ ganaa? Ka golee ka n taasɛ, wɔ tɔn boo da.

³ Wàa na á baa n tá giɛ wɔ ganaa tɔɔn lɛa, wɔ n baãnaan lɛa n yii li.

⁴ Nsɛ Zɔbu bɛ́ n din didii n busii kɛ gɔ́ɔ̃ nɛ, nsɛ mà yǎa kanaa lɛ gɔ́ɔ̃ kooro goɛ̃ nsɛ a lɛa? Ń mà yǎa gɛ̀fun nə n boe ǹ bǎã nɛ nsɛ a lɛa?

⁵ Sɛnɛ, min baraa a tɛ fúlu á re nimi, a kùsì tɛ á re kuĩ lɛ diɛ.

⁶ Tɛ fúlu á re wɔlɔ tì biɛ a ganaa a kion, a bolon tá re nimi lon, a mìi lalan.

⁷ A gòã mɛn goã siɛ lɛlɛ, màn tá re n boe a tɔ lɛ, a din a sii yɔrɔ bɔ n die a din boe a daa.

⁸ A din gòã n die a din diɛ biɛ nɛ, a n tɔ we sii bii.

⁹ Kan tá re kuĩ a gòã toro ganaa, biɛ á re kuĩ, a n sɔɔ a ganaa.

¹⁰ A kũ ǹ biɛ á durii-n tán, kan tá koa nɛ a zii la.

¹¹ Paǹ tumaa li, nyɛ́ɛ da ǹ siin man a foo biɛ niɛ̃. Maǹ a kio, koe a gòɛ̃ lɛ.

¹² Bòo á re a pàã nyɛɛ, koe tá re a lɛnpɛnɛ.

¹³ Bɛ lɛ n die a gɔ̀nɔn soɛ̃, gɛ̀ busu n die a gùn soɛ̃.

¹⁴ A bɛ́ taasɛ mà asɛ n là nyantoro mɛn la a kion kɛ nɛ, ǹ tá re boe walan ǹ soo ne. Ǹ tá re baɛ̃ ǹ wo ne gɛ̀ a kii yɔrɔ-a.

¹⁵ Min kɔsɔ n giɛ̃ a kion kɛ nɛ, bɛ ba a wɔ lɛa doo wa. Ǹ tá re kiribi pɛsɛ̃ a gɔn màn tumaa la.

¹⁶ A gòonən tá re laɛ tán, ǹ na a gùrùn kuru lon.

¹⁷ A sii n papaɛ̃ a n bɔ kanaa minin yiri ni, a tɔ a goɛ̃ kanaa doo wa.

¹⁸ Maǹ nyɛnɛɛ ǹ bɔ wɔlɔ fúlu li, ǹ da wɔlɔ tì li, maǹ boe ǹ bɔ kanaa kɛ gɔ́ɔ̃ nɛ.

¹⁹ A nɛ banban, min ba a kio a zaman bii wa, min kɔn la a kion wa.

²⁰ Sii mɛn bɛ́ re yii bɛ n die kaãbaa diɛ lɛ̀nyɛɛn minin ganaa, a n die nyɛ́ɛ diɛ lɛ̀giala minin ganaa.

²¹ Min baraan giã ǹ bǎã á ke. Min mɛnɛn bɛ́ ǹ ba Lawa doɛ̃ wa bɛn bǎã á ke.»