Zɔbu 17 - LAWA A BOO SONBORE

Foo-doa ba Zɔbu lon doo wa

¹ A ke fɔfoã din ba n sii ma la doo wa, maa wɔ nya á nya, maa wɔ n ka yala nɛ.

² Da yaa lɛa wolen nə́ ma lɛnpɛnɛ, ǹ ga ma lɛ li ǹ siin lɛn man maa nyuù sii ma la.

³ Lawa, n din lɛ kɔ kəni, n nə n mìi koa maa sii li. Bɛ̀ á n bɔ n din ni, die kɔsɔ n die lɛ koe, mà asɛ tá n doe ma lɛ?

⁴ Taãn nɛ, ma n nə́ ǹ yiri tã, ǹ ba boo giala miɛ wa. N ba re toɛ dɔn dinin, ǹ gɔ̀lɔ̀baa yɛ wa.

⁵ A n goon ka min mɛn bɛ́, a na a giaáran bíi a tá màn gii ǹ ni, a da yaa, a din a nɛnyaanan manə n yii diɛ ǹ wɔ la foɛ̃.

⁶ Lawa masɛ baa minin loe lɛa, min lɛa ǹ nə́ sɛ̀ kiɛ a ganaa.

⁷ Ma yii nàn pàã nya yɔrɔ-kɔsiɛ gɔn, má pɛrɛ, má n baa ka màn nyín ni.

⁸ A n kaãbaa diɛ min peperen ganaa, zɛ̀rɛbaãnaan man yui min baraan gialaa.

⁹ Ta á n baa lɔn, min pepere gɔn na a zii ganaa. Min mɛn bɛ́ a sii la wa, màn nə́ miɛ bɛ pàã li miɛ̃ a woo.

¹⁰ Sɛnɛ, kasɛn kɛn, ka tumaa wusoo ka daa, ka da timəə kaa boon lɛn la. Ma a re sii doɛ̃ wole goon yii ka bii wa.

¹¹ Maa lɛawaan nə́ kiɛ̃, sii mɛn goã ma gɔ́ɔ̃ nɛ, bɛ tumaa sàabaa, ma gɔ́ɔ̃gɔ́ɔ̃ ǹ taasiɛn kɛn lɛn.

¹² Ǹsɛn mà tèlò n lɛawaa lɛa. Masɛ n wɔlɔ tì li, ǹsɛn mà wɔlɔ á re fúli.

¹³ Ma bɛ́ giã ǹ bǎã mɛn duĩ, bɛ n ka geren piɛ nɛ, ma maa piì naa tán wɔlɔ tì kɛ li.

¹⁴ Ma nə n lɛ dii yala li máa: «N din nə maa díi lɛa,» nyuunun kɛn ma gɔ̀nɔn soɛ̃, máa: «Kasɛn man maa náa laanka ma miãnɛnɛn lɛa.»

¹⁵ Ma foo n doa-n maa doo kəni? Die yii n boe la a yɛ?

¹⁶ Wɔ n woe geren piɛ kun, wɔ waa tán tii li kun.