Zɔbu 16 - LAWA A BOO SONBORE

Boon mɛn bɛ́ a foo taɛ̃ wa

¹ Zɔbu tɔ́n boo saa á pɛ:

² – Má bin boo kɛ miã gigiã ma. A foo basã ǹ boo lɛa ka á diɛ wa. Ka tumaa n ma foo siɛ̃ ǹ boo diɛ.

³ Kaa boo kooron kɛn man die nyɛɛ biĩ? Wàa mɛn nə nsɛ Elifaazi diɛ ma lɛ sii ganaa kɛnɛn?

⁴ Toa bɛ̀ ka dɔn man masɛ a bǎã kɛ nɛ, bɛ̀ ma dɔ á boe la ma ka dɔn boo kɛ tɔrɔ da. Bɛ̀ man die boo gigiã kiɛ kun, ma da ka ganaa, bɛ̀ ma á n wìi yiɛ ka li.

⁵ Bɛ̀ man die ka foo taɛ̃ ka ma lɛ nɛ, bɛ̀ ma lɛ gɔ́ɔ̃ ǹ boo n die ka foo basɛ̃.

Zɔbu mà Lawa na asɛ biɛ zɔ́ɔ kooro

⁶ Ta masɛ boo da, bɛa maa là-paparɛɛ kɛ nyɛɛ wa. Ta man lɛ dɔ din tã, á re yui a n bɔ ma la?

⁷ Sɛnɛ kanna, Lawa bɛ́ á ma pàã tumaa nya. A ke, á maa kion tumaa ziziɛ̃.

⁸ A wɔ̀lɔ̀ da ma ganaa, á ma zɛ̀rɛ baa nɛ, maa pɛrɛ kɛ dɔ n ma zɛ̀rɛ biɛ.

⁹ A foo-yoo gɔ́ɔ̃ nɛ, Lawa n ma tɔtoɛ̃, a n ma kio lui, a nə n lɛ sɔsoɛ̃ ma li. A n ma zɔ́ɔ lɛa, n yiin doɛ ma la taãn-taãnɛ.

¹⁰ Minin manə n lɛ tii ma li banabana. Maǹ nə́ n gɔn toe ma para-n, bɛ̀ ǹ sɔ kɔ ma-a, manə n lɛ soekɔn, bɛ̀ ǹ yoo ma gialaa.

¹¹ Lawa na á ma kɔ min kɔkɔrɔn la, a din na á ma kɔ min baraan la.

¹² Man má goã là nyantoro la, sɛnɛ, Lawa daa maa sii lɔlɔkɔn. A ma nyɛnaa ma dungiala ganaa, á ma zũ. Á wusoo á ma saa á ma da lon, bɛ̀ a n gɔn nyin pepere kɔ ma ganaa.

¹³ A kiɛn nə́ ma lɛnpɛnɛ paǹ tumaa li, a n ma foɛ̃ ma kii ganaa, a din ba giɛ ma makara-a wa. Á ma sɔrɔ yu á kaa.

¹⁴ A n baa sii ma kio ka zia-baali bɛ́ lɔn, á ma gɔ̀nɔn tumaa fɔ̃fɔ̃ á baa yala lɛa.

¹⁵ Má gɛ̀ koa ǹ mɔnaa wɔ ma din ganaa, má n mìi dɔ ma li, má giã tán gusuũ li.

¹⁶ Ma yii nànan nə́ tataã wuu-pɛ a la yii-n gɔn. Ma yɔrɔ yii ziziɛ̃.

¹⁷ A da yaa ma kakaarɛbaa ǹ sii kɔn zɛnaa wa. Maa nyankɔ dɔ n yoreen biikoo tumaa li.

Zɔbu waa la mà asɛ a zia gii-dali tá lon

¹⁸ Haya tán, n nyan pii kɔ ma mà kɛ lɛ wa koe! Toa maa lɛ-dɛ kɛ dɔ bǎã tumaa nɛ!

¹⁹ Maa siére din tá lon gɔrɔ dinin, maa wɔ gii-dali tá lon.

²⁰ A laanɛ maa giaáran kɛn tá ma diɛ yaa lɛa, masɛ n wuu pii Lawa ganaa.

²¹ Bɛa siére kɛ die, a wɔ masɛ laanka Lawa kɛ bii, ka kanaa minin nə́ ke zia-dalin wɛɛ kɔn lɔn.

²² Masɛ wɔ nya á nya. Boɛɛnɛ, ma á re maa kòãn goɛ ma woo, ma bie n bɔyɛɛ doo wa.