Zɔbu 14 - LAWA A BOO SONBORE

Zɔbu mà yiikoonaabaa á kaka

¹ Minbuiin nɛ kɛ lɛ yii lɔ la, a nyin ba sasa wa, nɔmaa dɔ́ la a yii ni.

² A n da buũ lɛa, n lɛ buĩ bɛ̀ a wusoo a na a mɛnaa. A n da wúlu lɛa baa sii, a beleboe wa.

³ A din lɛ dɔ n ke, n tá n yii wɛɛ li, n nə́ masɛ bíi kiri we ma ganaa!

⁴ Die n boe la a màn *yoreen bɔ màn gɔgɔrɛ nɛ? Bɛa dɛnaa din banban.

⁵ N bɛ́ ń lɛawaa lɛ koa a tá kanaa la, ń ná a mui lɛ nimi ń koa, ń biikoo koa, a doamaa bie a kiɛ̃ bɛ la wa,

⁶ n yɔrɔ dia bǎã kɔsɔ-n bɔrɔ, a dɔ piɛ̃ si kəni, a n nyɛnyɛɛ, ka dí-nyali mɛn bɛ́ á ná a wasa mɛ ǹ saraa saa.

Zɔbu foo n zoɛ̃ li á biɛ niɛ̃

⁷ Foo doa ǹ bǎã tá da din lon. A giala, bɛ̀ ǹ nə́ kuru, a n wusii a pã, a n wusii a gùrùn bɔ.

⁸ Haalɛ ta a gòon na á zizi kɔ tán, ta a giala piri din nə ka a na á gã tii li,

⁹ bɛ̀ á mu gìĩ ma lɔn gɔrɔ, a n foɛ̃, a gùrùn bɔ ka da ten bɛ́ lɔn.

¹⁰ Sɛnɛ, bɛ̀ min gã, a pàã na á nya. Bɛ̀ minbuiin nɛ a fɔfoã soo, a n wàa biɛ doo?

¹¹ Kɔ̀ mu á boe la a nya, tà mu á boe la a piɛ̃, tà gɔ́ɔ̃ laa.

¹² A n miɛ̃, min ba giɛ̃ a wusoo a yoo wa. Bɛ̀ ń geren yaa yui, bɛ̀ ń nə ǹ yii yaa kiɛ n boe nyuù kɛ nɛ, yǎa tan bɛ̀ lon banban doo wa.

¹³ E, bɛ̀ ma n lɛ koe dinin n ma duru geren piɛ, n ma lɛ tã walan, yǎa n busii kɛ nyɛɛ, yǎa bɛ̀ n yiri gisĩ ma nɛ biikoo mɛn li.

¹⁴ Bɛ̀ geren yii n wusii á kiɛ, bɛ̀ man die maa dí kaka kɛ tumaa nyɛɛ ma nə́ n yii diɛ, yǎa min die ma gɔn lɛ sii.

¹⁵ N bɛ́ re giɛ li n ma yɛ ǹ mɛn waáraa, ma din kɛ lɛ, n gɔn ma zɛnaa, n tá re lɛ diɛ ma la, ma á re n nyii n la.

¹⁶ Sɛnɛ, pelo kɛ gɔ́ɔ̃ nɛ, ń ma gòã yii nimii, n ba re giɛ maa sii baraa kɛ-a doo wa,

¹⁷ N tá re maa sii kɔkɔrɔn kɛn lɛ yii takoo ne, n pìi kɔ maa sã ǹ siin kɛn lɛ.

¹⁸ Sɛnɛ, bɛ tumaa kio, kele á mɛnɛɛ a yɔyɔrɛ. Gɛ̀fu á boe la a n zɔ̃ a n bɔ a bǎã nɛ.

¹⁹ Mu á boe la a kɔlɔ kuru, a baa si tán biikoo li, á boe la a tii nyɔɔ goa a kiɛ̃ nɛ. Minbuiin nɛ dɔ a foo doa ǹ bǎã kɛ lɛ, ma n bɛ ziziɛ̃ miɛ̃.

²⁰ Ma n dii n duwəə tán, a n woe yǎa duduu. N ná a yɔrɔ gɔ́ɔ̃ ziziɛ̃, n loo n kiɛ̃ nɛ.

²¹ Ta maǹ a nɛnyaanan kuĩ doɛ̃ a kio, a bɛ doɛ̃ wa. Ta maǹ boe ǹ yii ni, a boe a siére-a wa.

²² A din na a là-paparɛɛ doɛ̃, a din na a foo-busii doɛ̃.»