Zɔbu 13 - LAWA A BOO SONBORE

Zɔbu mà asɛ a giaáran nə n dɔ asɛ lɛ wa

¹ Zɔbu tɔ́n pɛ: «A ke kaa, ma dɔ din yii bɛ lɛ tumaa yɛ. Ma too ma, má a giala dɔ ma.

² Ma ba kiɛɛrɛ ka ganaa wa! Ka bɛ́ màn mɛn doɛ̃, a din lɛ-n ma dɔ á doɛ̃.

³ Sɛnɛ, masɛ n die boo diɛ ka Lawa Pàãyiidɛnaa nɛ, man die n bɔlɔ pii Lawa yɔrɔ-a.

⁴ A giala, kasɛn man soɛ kukuri, ka kɔn ba min a busii nyɛɛ wa.

⁵ Bɛ̀ ka n ká n lɛ tã dinin bɛ̀ á soɛ. Bɛ̀ ka n ká n lɛ tã dinin, bɛ̀ ǹ tá re taasɛ mà ka á sii doɛ̃.

⁶ Ka n too kɔ ma dɔ lɛ gɔ́ɔ̃ ǹ boo li kəni. Maa busu ǹ boo ke ma á pii, ka n too da ma lon.

⁷ Lawa a lɛa nɛ, ka tá minin yiri sã ǹ boon kɛn diɛ? Ka nə n doe Lawa lɛ ka soɛ nɛ?

⁸ Ka nə n doe kun ka Lawa nɛ, ka á pii kəni ka á kiɛ a lon?

⁹ Bɛ̀ a n ka dininmaan kɛn lɛn sii gɔsiɛ, táa á re bǐɛ̃ koe? Ka á boe la ka Lawa yiri sã, ka ǹ bɛ́ minbuiin nɛ yiri siɛ̃ lɔn?

¹⁰ Lawa á re ka zɛ̀rɛ biɛ, bɛa sàabiɛ wa, bɛ̀ á daa yaa ka a siɛ̃ ka durii ni.

¹¹ A din a golebaa kɛ a nyɛ́ɛ diɛ ka-a wa? A nyɛ́ɛbaa ma yii-n ba ka kuĩ wa?

¹² Ka suusun mɛnɛn da, maǹ kùsì ton lɛa. Kaa din tamaa ǹ boon kɛn man ka tii bɛ́ lɔn.

Zɔbu n die a sii lɛ pii Lawa nɛ

¹³ Ka n lɛ bɔ ma lɛ, ka ma toa walan, ma din nə maa boo diɛ. Bɛ̀ sii mɛn bɔ a nɛ, a ma din yɛ.

¹⁴ Ta ma nyin nə goɛ̃ a nɛ, má golee li!

¹⁵ Bɛ̀ Lawa lɛ á ma dii, a ma dɛ. Maa sii... Sɛnɛ, ma á re n bɔlɔ pii a din lɛ yɔrɔ-a.

¹⁶ Bɛ̀ bɛ́ giala yɛ, man má la. A giala, bɔlɔ paa pɛle kɔn yii a we a wo golee Lawa yɔrɔ-a wa.

¹⁷ Ka n too kɔ, ka n too kɔ maa boo li. Ka toa maa boo yɔrɔ pɛ kɛ kaa ka too ne.

¹⁸ Sisia, man die woe boo lɛ biɛ kiri lɛa. Ma á doɛ̃ máa sonbore á die yii ma lon.

¹⁹ Ma zɛ̀rɛ bɛ́ ka màn mɛn nɛ, bɛ̀ min bɛ yɛ á pɛ, ma nə n lɛ tiɛ̃ gɔrɔ, man yii da maa gɛ̀ la.

²⁰ Lawa, sii màn paa dinsɔɔ̃-n ma tá a nyankoe n lon. Bɛ̀ ń bɛn zɛnaa, ma a re n duri n la doo wa.

²¹ Bǐɛ̃ kɔ, n nə n gɔn saa n bɔ ma la. N nyɛ́ɛ da ǹ siin kɛn, n nyan toa ma foo biɛ na bɛn nyɛɛn doo wa.

²² Bɛ kio, bɛ̀ ń lɛ dia ma la, ma á re n nyii, hinlaa, bɛ̀ ma dɔ boo da, n ma lɛ si.

Zɔbu na a busii pii Lawa-n doo

²³ Maa sii kɔkɔrɔn lɛn ka maa sã ǹ siin ni, maǹ gia má ǹ zɛnaa? Ma bɔlɔ tii sii mɛn zɛnaa, ma sã n-a ka sii mɛn nɛ, bɛ pɛ ma nɛ.

²⁴ Wàa na á baa n tá n yɔrɔ bɔyɛɛ boe ma la, n nə́ ma kuĩ n zɔ́ɔ lɛa?

²⁵ Piɛ̃ bɛ́ á da luu mɛn saa, nsɛ n giɛ li n wusoo n nyɛ́ɛ da bɛ-a? Ma n giɛ li n baa si buu gere kio?

²⁶ Ń ke ń boo babaraa kiɛ̃ maa wɔ paǹ li. Ma sã ǹ siin mɛnɛn zɛnaa maa tenmaa waáraa, ń bɛn da ma mìi ni.

²⁷ Ń ma gòãn kaa kòrò ne, n tá giɛ maa gòã saa ǹ gɔn ganaa. Ń maa woo ǹ bǎã lɛ-doa din lɔ ń koa.

²⁸ A da yaa, minbuiin nɛ n ziziɛ̃ ka gɔn bɔnɛɛ bɛ́ lɔn. A nə n biɛ kaa mɔnaa bɛ́ lɔn nimii kũ.