Zɔbu 12 - LAWA A BOO SONBORE

Zɔbu mà asɛ dɔ á sii doɛ̃

¹ Zɔbu tɔn nə ǹ lɛ si:

² «A n ka n daa n pɛ sonbore mà min din ba ka-a wa. Bɛ̀ kasɛn dinin banban, sii-doɛ̃ na á nya.

³ Masɛ, yiri tá ma dɔ lon, ka ka dɔn bɛ́ lɔn. Ka dɔn bie ká la ma dɔ-n wa. Ka boo mɛn da, die na a bɛ doɛ̃ wa?

⁴ Bɛ̀ ma á Lawa nyankoe lɛlɛ, a n ma lɛ sii. Kanna, maa giaáran man ma diɛ yaa lɛa. Masɛ din min pepere zɛ̀rɛbaãnaa lɛ, ǹ nə́ ke ma diɛ yaa lɛa.

⁵ Bɛ̀ bɔ̀n nə́ n yɛ, n piɛ̃ na á bɔ. Min mɛnɛn bɛ́ yii-nyɛɛ gɔ́ɔ̃ nɛ, bɛn man taasɛ miɛ̃. Bɛ̀ min mɛn mɛnaa, bɛa dɛnaa wɔ n ka puusə-kɔ nɛ.

⁶ Mɛnaa minin la wolen kɛn, là nyantoro n bɛn kion. Min mɛnɛn bɛ́ n yii we Lawa la, gɔ́ɔ̃-bii ba bɛn-a wa. Ǹ ba Lawa kɔsɔ doɛ̃ wa, yǎa ǹ dinin pàã ke.

Lawa sii-doɛ̃ kɔ tɔɔn dɔn la

⁷ Sɛnɛ, ga tɔɔn ganaa, ǹ tá re doree koe n la, ga lon a bàanan ganaa, ǹ tá re daraa koe n la.

⁸ N taasɛ ka tán a sii ni, á re doree koe n la, kɔ̀ mu li ǹ zɔ̀n tá re a laakalɛɛ n nɛ.

⁹ Ǹ mɛn na a ba doɛ̃ mà Dɛnaa Lawa din gɔn na á bɛa màn kɛ lɛ tumaa da wa?

¹⁰ Màn tumaa a yiikoonaabaa na a din gɔn. Minbuiin tumaa nyin biɛ na a din gɔn.

¹¹ Maǹ pii mà too n boo a bɔkɔnlɛ doɛ̃, ka lɛwɔn bɛ́ màn-bii a bɔkɔnlɛ doɛ̃ lɔn.

¹² Sii-doɛ̃ n min golen wɔ lɛa, sii bɔkɔnlɛ n min zizin wɔ lɛa.

¹³ Sɛnɛ, sii-doɛ̃ laanka pàã n Lawa nɛ. Sii giala ma laanka yiri na a din wɔ lɛa.

Lawa á boe la a min tumaa bɔ̀n baa

¹⁴ Bɛ̀ Lawa màn mɛn wuru, min ba boe la a dɔ wa, bɛ̀ á min lɛ tã, min ba boe la a bɔ a da wa.

¹⁵ Bɛ̀ á la kurəə, lɛ̀ gere n koe, bɛ̀ á n gɔn bɔ-a, mu n basaã koe tán nɛ.

¹⁶ Boo sii la laanka yiridɛnaabaa na a din wɔ lɛa. Ǹ bɛ́ ǹ nə́ min mɛn yiri sã, ka min mɛn dɔ din bɛ́ á n din sã, ǹ tumaa a sii n Lawa gɔn.

¹⁷ A n màn-dɔ̃lin yiri penpelen diɛ, a kiri-wɔlen yiri lɔlɔkɔn.

¹⁸ A n kiibaa sii kiin la, a bɛ̀rɛbaa ǹ tuùlun da ǹ giala-a.

¹⁹ A n wúlu-bɔlen penpelen diɛ, a pàãdɛnan bɔ a ǹ kaa.

²⁰ Min mɛnɛn bɛ́ boe boo la, a n bɛn boo toɛ ǹ gɔ́ɔ̃ nɛ. A n sii-doɛ̃ kuĩ a si min zizin la.

²¹ A n tɔ goledɛnaa puusə koe, a n min kakan maabɛlɛ niɛ̃ a bɔ ǹ bɔsɔ̃-n.

²² Wɔlɔ tì siin kɛn, a n pìi boe bɛn lɛ. Gɛ̀ dɛ ǹ sii tìtìn kɛn, a n bɛn diɛ wɔlɔ fúlu-a.

²³ A din nə gána a zaman gole koe, a din dɔ n bɔ̀n diɛ a ganaa. A n tɔrɔn mɔnɛɛ, a wusoo a ǹ papaã.

²⁴ A din nə gána minin nyɛɛnaandɛnan yiri sii ǹ la, a ǹ da binbirin bɔ ganaa don bii, zii ná a banban.

²⁵ Maǹ wɔlɔ tì li ǹ gɔn talɛɛ, ǹ yii a wɔlɔ yii wa. Lawa nə ǹ diɛ tatalaa ganaa ka yɔ-milin bɛ́ lɔn.»