Zɔbu 10 - LAWA A BOO SONBOREZɔbu n Lawa a peperebaabaã lɛ a sɛ̀ pii 1 Yiikoonaabaa din tìĩ bɔ ma nyin ni. Ma a re n lɛ tiɛ̃ maa busii kɛ-a doo wa. Man die n foo pii. 2 Man die pii Lawa nɛ: N baran dɔlɔ bɔ ma-a wa! Ma zɛ̀rɛbaa ǹ mìi pɛ ma nɛ! 3 Fuu ke ń nyɛɛ ma-n kɛnɛn, bɛ lɛ n kɔɔ̃nɛ n ganaa? N din gɔn màn mɛn zɛnaa, ń bɛ tii, n barka wɔ min baraan zɛnaa ǹ sii ni, bɛ lɛ n kɔɔ̃nɛ n ganaa? 4 N dɔ yiin lɛn man ka minbuiin nɛ wɔn bɛ́ lɔn ya? N dɔ wɔn lɛn wɔlɔ yɛ ǹ gɔn nə goon ka minbuiin nɛ wɔn lɛn nɛ? 5 N dɔ a belebɔ n ka wɔsɛn gɛ̀-wɔlen kɛn wɔ bɛ́ lɔn ya? N lɛ̀ lɛ n ka minbuiin nɛ wɔ bɛ́ lɔn? 6 N bɛ́ ke n niɛ̃ woone mà nsɛ n giɛ maa sã li, ma sii baraa mɛn zɛnaa, mà yǎa nsɛ bɛ yii. 7 N din dɔ n doɛ̃, mà ma sii la wa, min kɔn dɔ din ba re yii, a ma si n la wa. Zɔbu mà Lawa na asɛ lui a tá asɛ dii 8 N din nə́ n masɛ munu n gɔn ń ma zɛnaa. Ma paǹ tumaa. N din dɔ á ke giɛ li n ma dɛ! 9 Ń ma zɛnaa ka gì ni. N yiri kɔ bɛ li. Ma n wusii ma nyin we tii li? 10 N din nə́ ń ma da ma dan gɔ́ɔ̃ nɛ, man má goã ka bɔ̀nyaa fu bɛ́ lɔn, ń bɔyaa ń baa ka nàari bɛ́ lɔn. 11 Ń wen laanka biɛn kɔ ma la. Ń gɔ̀nɔn ki laanka gɔ̀nɔn siĩ kɔ bɛn lɛ. 12 Ń bǐɛ̃ kɔ ma-a ń yiikoonaabaa kɔ ma la, ń ga ma walan, ń ma nyin tamaa. 13 Sɛnɛ, sii mɛn goã durii ni n gɔ́ɔ̃ nɛ, a din lɛ n ke. Sii mɛn goã n taasiɛ nɛ, ma á doɛ̃: 14 Ma n giɛ li, bɛ̀ ma á sii baraa zɛnɛɛ, n ma kũ a lɛ-a, n nə́ n ba maa sã toɛ ma-n wa. 15 Bɛ̀ má sii la, bɔ̀n na á ma yɛ. Ta ma sii la wa, ma a boe la ma á n mìi siɛ lon wa. Sìi n die ma dii, nɔmaa ma gɔ̀nɔn bɔ. 16 Bɛ̀ má n mìi saa lon lɔn gɔrɔ, ma n ma lui ka yàra bɛ́ min lui lɔn, ma n ma yɔyɔrɛ ka n pàã gole kɛ nɛ. 17 Ma n yui masɛ gialaa miɛ̃ duduu. Màn nə miɛ̃ n foo a yoo li masɛ wɔ paǹ li. Ma n zia nɛn boboe masɛ ganaa. 18 Wàa na á baa, ń ma bɔ ma dan gɔ́ɔ̃ nɛ ń soo ma nɛ? Bɛ̀ ma bɛ́ re giɛ̃ walan, min kɔn yii ná a ba ma-a wa. 19 Bɛ̀ man die n biɛ ka ma goã wa, maa soo gɔ́ɔ̃-n pinaa gɔrɔ, ǹ ma saa ǹ wo ma bĩ. 20 Maa lɛawaan lɛn tá gigiã doo ya? Sabara baa n nə n gɔn bɔ ma ganaa, ma dɔ piɛ̃ si boɛɛnɛ, 21 ma tɔn woo, bɔyaa ná a ba a-n wa, wɔlɔ tì gána kɛ nɛ, gɛ̀ a wɔlɔ tì kɛ li, 22 wɔlɔ tì biribiri gána nɛ, ka tèlò bɛ́ lɔn. Gɛ̀ lɛ a wúlu ni, sii tumaa lɔlɔkɔnmaa-n walan. Bɛa bǎã lɛ a wɔlɔ fúlu n ka tèlò bɛ́ lɔn.» |
San Catholic Edition Bible © Bible Society of Burkina Faso, 2013.
Bible Society of Burkina Faso