Zɔbu 1 - LAWA A BOO SONBORE

Zɔbu, pàãma nyɛ́ɛbaa Lawa yii-n wole

¹ Ǹ kɔn waáraa, giĩ goon na á goã Usi gána nɛ, a tɔ n Zɔbu. Giĩ lɛ na á goã min pepere lɛa, a zɛnaa ǹ sii ń siĩni. A na á goã nyɛ́ɛ biɛ Lawa nɛ, n nyɛnɛɛ sii baraa nɛ.

² A nɛnyaanan mɛnɛn yɛ, nɛgiĩ sɔbaa ka nɛlɔ min sɔɔ nɛ.

³ Tɔɔn nə́ goã a lon giãgiã: Sère duu sɔbaa (7 000), nyɔɔmaa duu sɔɔ (3 000), buu-kɔsɔ ǹ dii duu goon (1 000) ka dundun dan biɛsooro (500). A dí-nyalin dɔn nə́ goã mɔnaa-n parsiini. A din lɛ tɔ na á bɔ lɛ̀giala gána minin tumaa bii.

⁴ A nɛgiĩn lɛn man nə́ goã zɔ́n zɛnɛɛ, bɛ̀ ǹ kɔn bíi, bɛ̀ ǹ wo màn bii kɔn a piɛ. Maǹ goɛ̃ bɛ̀ ǹ lɛ dia ǹ miãnɛn min sɔɔ lɛ dɔ la, bɛ̀ ǹ màn bii kun.

⁵ Bɛ̀ zɔ́n lɛ kiɛ̃, Zɔbu na a nɛnyaanan lɛn bíi, bɛ̀ a *gɔ̀ bɔ ǹ ganaa. A n yui baayɛlɛ yiisoone, bɛ̀ a tɔɔ dɛ a tã lenlen, a didie a wúlu bɔ nɛ. Zɔbu na á goã zɛnɛɛ miɛ̃ biikoo tumaa li. A giala a na á goã taasɛ, mà kɔntan asɛ a nɛnyaanan lɛn nə́ sii baraa zɛnaa, hinlaa ǹ nə́ wɔ Lawa gasɛ nɛ ka ǹ taasiɛ nɛ.

Lawa laanka Zɔ́ɔ Sɛtaan nə kɔn Zɔbu boo ganaa

⁶ Ǹ kɔn pinaa kəni, lon a dia dí-a wolen nə́ woo Dɛnaa Lawa a lɛ-dia ganaa. A pinaa, Zɔ́ɔ *Sɛtaan lɛ dɔ́ daa kunun ǹ ni.

⁷ Dɛnaa Lawa nɔ̀n da Zɔ́ɔ lɛ la kɛnɛn: «Ma n boe maa kəni?» Zɔ́ɔ lɛ Dɛnaa Lawa lɛ si: «Ma ma woo n bibiə̃ kanaa, má kɔɔ̃naa wɔ.»

⁸ Dɛnaa Lawa tɔ́n pɛ Zɔ́ɔ nɛ: «Táa ń maa dí-nyali Zɔbu kɛ yɛ? Ǹ miã din banban kanaa wa. Min pepere ne, a zɛnaa ǹ sii n siĩni, á n nyɛ́ɛ biɛ masɛ Lawa yii ni, n nyɛnɛɛ sii baraa nɛ.»

⁹ Zɔ́ɔ dɔ́ pɛ Dɛnaa Lawa nɛ: «Zɔbu lɛ n nyɛ́ɛ biɛ n yii-n kooro ya?

¹⁰ N din bɛ́ n nə n kɔ Zɔbu paǹ tumaa lɛ, bɛ lɛ bie wa? A din ni, a kion ne, ka a gɔn màn tumaa nɛ, n bɛ́ ń bɛ tamaa, bɛ lɛ a lɛa bie wa? N din ni ń barka da a nya ǹ dí ganaa. A tɔɔn nə́ ke wɔlɔ yii-n sababa gána lɛ gɔ́ɔ̃ nɛ.

¹¹ Sabara baa n nə n gɔn da a gɔn màn lɛ ganaa, n basaã kɔ ǹ tumaa nɛ. Bɛ̀ Zɔbu golee n din yɔrɔ-a, a boo baraa da n ganaa wa, n da màn si ma la.»

¹² Dɛnaa Lawa tɔ́n pɛ Zɔ́ɔ lɛ nɛ: «Haya le! Màn mɛn tumaa bɛ́ Zɔbu wɔ lɛa, ǹ tá n gɔn. Sɛnɛ, n nyan toa n nə n gɔn da a dinmaa kɛ ganaa wa.» Bɛ kio, Zɔ́ɔ lɛ woo á n bɔ Dɛnaa Lawa yɔrɔ-a.

Zɔ́ɔ Sɛtaan yoo Zɔbu gialaa

¹³ Ǹ kɔn pinaa, Zɔbu a nɛgiĩn lɛn laanka a nɛlɔn man nə́ goã màn bii ǹ bǎã nɛ, ǹ tumaa a goledɛnaa a piɛ.

¹⁴ A pinaa, min daa pɛ Zɔbu ni: «Diin lɛn man nə́ goã buu kɔsɛ, dundunun kɛn nə́ buu soɛ̃ ǹ li,

¹⁵ Sabaa minin nə́ daa kaa ǹ bii, ǹ nə́ n dí-nyalin kɛn dɛ, ǹ nə́ tɔɔn lɛn loo, ǹ nə́ kiɛ̃ ǹ nɛ. Masɛ dinsɔɔ̃ n ke, má baa si má la, má daa a boo da n nɛ.»

¹⁶ Bɛ ba a wɔ diɛ á nyɛɛ wa, bɛ̀ goon dɔ bɛ́ á dɔ mà La na á paraa sèren lɛn laanka ǹ lɛduə̃lin lɛn ganaa, á ǹ tã lenlen. Mà asɛ dinsɔɔ̃ n ke, á baa si á la, á daa a boo da nɛ.

¹⁷ Bɛ dɔ ba a wɔ diɛ á nyɛɛ wa, bɛ̀ goon dɔ bɛ́ á dɔ mà *Kaldee minin nə́ n tala kɔn kuru sɔɔ, ǹ nə́ daa kaa nyɔɔmaan lɛn bii, ǹ nə́ dí-nyalin lɛn dɛ, ǹ nə́ nyɔɔmaan lɛn loo, ǹ nə́ kiɛ̃ ǹ nɛ. Mà asɛ dinsɔɔ̃ na á baa si á la, á daa a boo da nɛ.

¹⁸ Bɛ ba a wɔ diɛ á nyɛɛ wa, bɛ̀ goon bɛ́ á daa doo mà a nɛgiĩn lɛn laanka a nɛlɔn lɛn man nə́ goã màn bii ǹ goledɛnaa kɛ a kion.

¹⁹ A ke! Piɛ̃ gole na á n toa diə ne, á daa n daa kion lɛ tumu la, á wuru á kɔ nɛ tenən lɛn lɛ, ǹ nə́ gã. Mà asɛ dinsɔɔ̃ na á baa si á la, á daa a boo da nɛ.

Zɔbu a Lawa guguru kɔ boo

²⁰ Foo-ziziɛ̃ gɔn, Zɔbu yoo á ná a mɔnaa kũ á toɛ̃, á n mìi kɔɔ̃. Bɛ kio, á na á kaa tán a lɛ la, a n pii kɛnɛn:

²¹ «Ma gɔn kooro na á daa, ma gɔn kooro n die woe. Dɛnaa Lawa din na á kɔ, Dɛnaa Lawa din na á si. Dɛnaa Lawa din tɔ nə n saa lon.»

²² Sii kɛ lɛ tumaa gɔ́ɔ̃ nɛ, Zɔbu boo basaã kɔn da wa, á zɛ̀rɛ kɔn koa Lawa ganaa wa.