Zaã a sɛ́wɔ 4 - LAWA A BOO SONBORE

Yezu laanka Samariin lɔ

¹ *Fariziɛ̃n nə́ ma minin lɛ-n, mà min gigiã á koe Yezu kio lɛ á la ZAÃ nɛ, a bɛ́ *batɛmu diɛ ǹ mɛnɛn ganaa, bɛn dɔn nə́ la ZAÃ wɔn manɛ.

² Sonbore pɛ á soɛ Yezu dinmaa bie á goã batɛmu diɛ minin ganaa wa, a kialandɛnan manɛ.

³ Yezu bɛ́ á dɔ̃ mà Fariziɛ̃n nə́ bɔ a siére-a, á soo Zudee gána nɛ, mà a n wusii woe Galilee gána nɛ.

⁴ Sɛnɛ, yǎa a boe Samarii gána nɛ a tɔn woe.

⁵ Bɛ lɛ nɛ, á woo dɔ Samarii kiwi goon ne, a tɔ n Sikaara, Zakɔba wuru mɛn kɔ a nɛgiĩ Zozɛfu la lɛlɛ, a wɔlɔ a sɔsɔɔ bɛ ganaa wa.

⁶ Zakɔba a tù n bɛa bǎã lɛ nɛ. Yezu bɛ́ á nɔmaa zii tɔ-we lɛ gɔn, á giã tán tù lɛ lɛ-a, penleen biikoo li.

⁷ Boɛɛnɛ, Samariin lɔ goon daa mu si. Yezu tɔ́n pɛ nɛ mà a na asɛ gɔ ka mu ni asɛ mi.

⁸ (Bɛ á zɛnɛɛ, bɛ̀ a kialandɛnan nə́ woo màn-bii pii kiwi gɔ́ɔ̃ nɛ.)

⁹ Samariin lɔ lɛ tɔ́n pɛ-n kɛnɛn: «A n siɛ lɔn nsɛ Zuifu kɛ n mu nyankoe masɛ din Samarii min kɛ la?» (Sonbore ne, Zuifun ba lɛ koe Samarii minin ganaa wa.)

¹⁰ Yezu tɔ́n pɛ nɛ: «Bɛ̀ ma n Lawa a minin gɔ ǹ màn kɛ doɛ̃, ka masɛ mɛn dɔ bɛ́ má pɛ n nɛ máa n mu kɔ ma mi, bɛ̀ n din kɛ lɛ n die nɔ̀n diɛ masɛ la ka mu ni; bɛ̀ man die mu koe n la n mi, mu mɛn bɛ́ yiikoonaabaa koe min la.»

¹¹ Lɔ lɛ tɔ́n pɛ Yezu ni: «Dɛnaa, biɛ ba ma gɔn wa, tù lɛ dɔ n zuzulu; ma n die boe ka bɛa yiikoonaabaa ǹ mu lɛ-n maa?

¹² Wɔsɛn digolo Zakɔba mɛn bɛ́ á tù kɛ lɛ kɔ wɔ la, a dinmaa ná a mu mi, kun ka a nɛnyaanan nɛ, ka a tɔɔn nɛ, nsɛ n gole n la bɛ-n kən le?»

¹³ Yezu tɔ́n pɛ nɛ: «Bɛ̀ min mɛn bɛa mu lɛ mi, mu boro á die wusii a ǹ dɛnaa kũ,

¹⁴ sɛnɛ, masɛ bɛ́ re mu koe min mɛn la a mi, mu boro a bɛa dɛnaa kuĩ doo duduu wa. Ma bɛ́ re mu mɛn koe la a mi, bɛ lɛ n die n biɛ ka mu yala bɛ́ lɔn, nyin nyabaã n boe a nɛ.»

¹⁵ Lɔ lɛ tɔ́n pɛ nɛ: «Dɛnaa ganaa, bɛa mu kɛ lɛ tɔrɔ kɔ ma la masɛ mi, màn mɛn bɛ́ toɛ, mu boro baran masɛ kũ doo, ma wusoo ma da mu bɔ kànaa wa.»

¹⁶ Yezu tɔ́n pɛ nɛ: «Woo, n nə n zuũ bíi, n wusoo n da kànaa.»

¹⁷ Lɔ lɛ tɔ́n pɛ Yezu ni mà asɛ zuũ banban.

¹⁸ Yezu tɔ́n pɛ nɛ: «N bɛ́ mà nsɛ zuũ banban, ń sonbore pɛ. Ma nə́ n zuũ yɛ gunyin sooro, sɛnɛ, n bɛ́ kun ka giĩ mɛn nɛ kanna, ǹ zuũ bie ka bɛ-n wa. Ń sonbore pɛ ka bɛ nɛ.»

¹⁹ Lɔ lɛ tɔ́n pɛ Yezu ni: «Dɛnaa, masɛ yii tá-a, máa ma n Lawa a boo gii-dali lɛa.

²⁰ Wɔsɛn digolo Samarii minin man nə́ Lawa guguru kɔ kele kɛ la, sɛnɛ, kasɛn Zuifun kɛn man a gialaa pii, mà Zeruzalɛmu n Lawa guguru kɔ ǹ bǎã lɛa.»

²¹ Yezu tɔ́n pɛ nɛ: «Lɔ lɛɛ, golee masɛ li. Biikoo kɔ́n tá re doe, ka bie re Díi Lawa guguru koe Samarii kele kɛ la wa hinlaa Zeruzalɛmu kiwi wa.

²² Ka bɛ́ ka a màn mɛn doɛ̃ wa, ka n bɛ guguru koe. Wɔsɛn Zuifun bɛ́ màn mɛn doɛ̃, wɔsɛn man bɛ guguru koe, a giala kirisibaa wole lɛ n Zuifu tɔrɔ lɛa.

²³ Sɛnɛ, biikoo á die, á n giala kɔ dinin, minin tá re Díi Lawa guguru koe a yɔrɔ sonbore li, ka Yiri Fu bɛ́ nyɛɛ ǹ nɛ lɔn. Min mɛnɛn bɛ́ Lawa guguru koe miɛ̃, a n giɛ bɛ miã dɛnan lɛn li.

²⁴ Lawa n yiri màn lɛa, min yii a yii wa. Bɛ lɛ na á toa, min mɛnɛn bɛ́ a guguru koe, bɛn doamaa nɛ, ǹ na a guguru kɔ a yɔrɔ sonbore li, ka Lawa a Yiri Fu bɛ́ nyɛɛ ǹ nɛ lɔn.»

²⁵ Lɔ lɛ tɔ́n pɛ Yezu ni: «Ma á doɛ̃ máa Lawa a die Minin Nyin-sili diɛ, ǹ nə́ bíi *Krita. Bɛ̀ bɛ daa ǹ mɛn waáraa, á die sii din tumaa yɔrɔ nyɛɛ wɔsɛn manɛ.»

²⁶ Yezu tɔ́n pɛ nɛ: «Masɛ din mɛn lɛ bɛ́ boo diɛ n nɛ, ma din ni.»

²⁷ A bɛ́ bɛa boo lɛ diɛ nyɛɛ, bɛ̀ a kialandɛnan bɛ́ doe. Ǹ dinin da Yezu yaa boo diɛ ka lɔ-n ke, bɛ́ kaãbaa da ǹ ganaa. Sɛnɛ, min kɔ́n nɔ̀n da la mà a n giɛ wàa li a li, hinlaa mà wàa na á baa á boo diɛ-n wa.

²⁸ Lɔ lɛ sɛ na a mu-si ǹ dɔ́n toa walan, á baa si á woo pɛ minin manɛ kiwi gɔ́ɔ̃-n kɛnɛn:

²⁹ «Ka da ga giĩ goon ganaa, masɛ sii mɛn tumaa zɛnaa, a ná a yii pɛ ma nɛ. Minin Nyin-sili lɛ din bie wa le?»

³⁰ Minin nə́ soo kiwi gɔ́ɔ̃ nɛ, ǹ nə́ tele a ganaa.

³¹ Bɛa biikoo li, a kialandɛnan man nə́ goã a gialaa kɛnɛn: «Mìinaa, màn bii kən le!»

³² Sɛnɛ, Yezu pɛ ǹ nɛ mà màn-bii kɔ́n tá asɛ lon asɛ á bii, mà ǹ ba bɛ doɛ̃ wa.

³³ Bɛa boo lɛ taman yii, a kialandɛnan nə́ nɔ̀n dada kɔn la mà min nə die goɛ̃ á màn-bii kɔ la á bii koɛ?

³⁴ Yezu tɔ́n pɛ ǹ nɛ: – Min mɛn masɛ dia, bɛ̀ má bɛ lɛ foo sii zɛnaa, a ma dia dí mɛn ganaa, bɛ̀ má bɛ nya má a lɛ pã, a n goon ka man má màn bii.

³⁵ Táa ka dininmaan man suusu diɛ mà yǎa mui sii, kaa-piɛ tɔn dɔ. Sɛnɛ, masɛ n pii ka nɛ: Ka n yii saa ka ga! Á ke, wuru gɔ́ɔ̃ ǹ *belee ma, a gialakun na á goã a kurii ganaa!

³⁶ Min mɛn bɛ́ a dí nyɛɛ, bɛ n màn nàn soekɔn biɛ̃ ǹ a lɛa. Á ke a saraa yii gɔrɔ, bɛ n ka nyin nyabaã nɛ. Bɛ lɛ nɛ, màn-dali laanka a yawaali ni, manə n nyɛnyɛɛ kun.

³⁷ Bɛ lɛ gɔ́ɔ̃ nɛ, ka bɛ́ suusu mɛn diɛ taãn nɛ: «Min goon nə diɛ, ǹ miã kɔsɔ n yawɛɛ.»

³⁸ Ka bɛ́ ka wuru mɛn a dí nya ka nɔmaa wa, masɛ n má ka dia, máa ka wo bɛa màn tɔrɔ kuru; min kɔsɔn man ná a dí nya ǹ nə́ nɔmaa, ka dɔn man ka là yɛ bɛn nɔmaa kaka kɛ lɛ ganaa.

³⁹ Samarii min gigiã golee Yezu li bɛa lɔ lɛ a boon lɛn taman yii, a giala a na á pɛ mà asɛ sii mɛn tumaa zɛnaa, mà a ná a yii pɛ asɛ nɛ.

⁴⁰ Bɛ lɛ nɛ, Samarii minin lɛn bɛ́ ǹ nə́ woo ǹ nə́ dɔ a li, ǹ ná a nyankɔ mà a giã ǹsɛn li. Á giã ǹ li lɛawaa paa.

⁴¹ Min gigiã dɔ golee li doo á la lɛlɛ wɔ nɛ, a din a da ǹ boo taman yii.

⁴² Ǹ nə́ goã pii lɔ lɛ nɛ mà asɛ a da ǹ boon kɛn dininsɔɔ̃nɔn bie ǹ nə́ toa ǹsɛn nə́ golee li wa. Mà ǹsɛn dininmaan ná a lɛ ma, mà ǹsɛn nə́ dɔ̃ mà a n kanaa minin kirisibaa wole lɛa sonbore.

Yezu goledɛnaa goon a nɛ kaka kɔ

⁴³ Lɛawaa paa bɛ kio, Yezu soo á n bɔ bɛa bǎãn lɛn nɛ, á woo Galilee gána nɛ.

⁴⁴ A dinmaa na á pɛ sonbore mà Lawa a boo gii-dali yii a guguru koe a din a yɛ ǹ kiwi wa.

⁴⁵ Sɛnɛ, a bɛ́ á dɔ Galilee, bɛn nə́ kũ doɛ̃. Bɛa minin kɛn lɛn dɔn man nə́ goã ǹ nə́ woo *kiɛ̃mala ǹ zɔ́n ganaa Zeruzalɛmu, Yezu sii mɛn tumaa zɛnaa walan, ǹ ná a yii yɛ.

⁴⁶ Yezu wusoo á woo Kaanaa kiwi, Galilee gána-n doo, a bɛ́ á mu bɔyaa á baa duvɛ̃ lɛa bǎã mɛn lɛ nɛ. Kii a dí-nyalin goledɛnaa goon na á goã Kafaranaamu kiwi, a nɛgiĩ goã lon wa.

⁴⁷ A bɛ́ á ma, mà Yezu nə n toɛ Zudee gána nɛ, á die Galilee gána nɛ, á daa dɔ a li a ná a nyankɔ, mà a n bɔyaa a da Kafaranaamu, a na asɛ a nɛgiĩ a busu nya, mà a n zoɛ̃ mà á giɛ̃.

⁴⁸ Yezu tɔ́n pɛ nɛ: «Bɛ̀ ka bie ka kaãbaa ǹ sii dadaran yɛ wa, ka bɛ́ ka a re golee masɛ li duduu wa!»

⁴⁹ Kii a dí-nyali lɛ tɔ́n pɛ nɛ: «Dɛnaa, n ta masɛ a piɛ kaa, bɛ̀ maa nɛ lɛ ná a tɔn gã wa!»

⁵⁰ Yezu tɔ́n pɛ nɛ: «Woo, n nɛgiĩ lɛ nə́ n si gɛ̀ la.» Bɛa giĩ lɛ nə́ n foo doa Yezu a da ǹ boo ganaa, á kiɛ̃ á zii saa.

⁵¹ A bɛ́ zii la die piɛ, a dí-nyalin nə́ woo ǹ da lɛ, ǹ nə́ pɛ nɛ mà a nɛ lɛ nə́ n si gɛ̀ la!

⁵² Á tɔ́n nɔ̀n da ǹ la, mà asɛ a nɛ lɛ na á soɛ kɔ biĩ waáraa. Ǹ nə́ tɔ́n pɛ nɛ mà a gɔ̀nɔn wɛ̃ lɛ na á nya gunun, wasa lɛ kanɛɛ biikoo li.

⁵³ N di lɛ yiri gisĩ a nɛ, mà Yezu na á pɛ nɛ a din biikoo kɛ lɛ li mà a nɛ lɛ nə́ n si gɛ̀ la. Á kũ bɛ lɛ ganaa, a din laanka a kion minin tumaa golee Yezu li.

⁵⁴ Bɛ lɛ na á n baa Yezu a kaãbaa ǹ sii paabaa ǹ wɔ lɛa á zɛnaa á ná a boo sii la nyaa nɛ, bɛ̀ a bɛ́ á bɔ Zudee gána nɛ á daa Galilee gána nɛ.