Zaã a sɛ́wɔ 18 - LAWA A BOO SONBORE

Yezu a kũ boo

¹ Bɛa boon lɛn diɛ kio, Yezu kiɛ̃ kun ka a kialandɛnan nɛ, ǹ nə́ Sedrɔn tà gòã kuru ǹ nə́ woo a kio. Dù gɔrɔ kɔ́n goã walan, á wɔ bɛ-n kun ka a kialandɛnan nɛ.

² A da yaa, Zudaasi mɛn bɛ́ we a zɔ́ɔn gɔn, bɛ dɔ á bɛa bǎã lɛ doɛ̃, a giala, Yezu goã bɛ̀ a da kun ka a kialandɛnan nɛ walan gunyin damata.

³ Bɛ lɛ nɛ, Zudaasi mɛ Rɔmu sɔraasi kuru kɔ́n nyɛɛnɛ, á woo dù gɔrɔ lɛ nɛ; Lawa a wúlu-bɔlen goledɛnan laanka *Fariziɛ̃n nə́ garadin dia kunun ǹ ni. Ǹ nə́ woo ka zia da ǹ mànan nɛ, ka bolonən ne, ka làpaa tɛn nɛ.

⁴ Sii mɛn tumaa bɛ́ re Yezu yii a bɛ́ a yii doɛ̃, á nɔmaa á woo n da ǹ lɛ á pɛ ǹ nɛ: «Ka ǹ giɛ die li?»

⁵ Ǹ ná a lɛ si mà Nazarɛtin Yezu. Yezu tɔ́n pɛ ǹ nɛ: «Ma din lɛ-n ke.» Bɛ á zɛnɛɛ, Zudaasi mɛn bɛ́ we a zɔ́ɔn gɔn, bɛ̀ bɛ lɛ á kunun ǹ ni.

⁶ Yezu bɛ́ á pɛ ǹ nɛ lɔn mà asɛ din lɛ-n ke, ǹ nə́ woo ka ǹ kio ne ǹ nə́ bɔ ǹ nə́ kaa.

⁷ Yezu wusoo á nɔ̀n da ǹ la mà maǹ giɛ die li? Ǹ ná a lɛ si mà Nazarɛtin Yezu.

⁸ Yezu tɔ́n pɛ ǹ nɛ: «Má pɛ ka nɛ máa ma din lɛ-n ke. Bɛ̀ ka ǹ giɛ ma din li, ka kɛn toa walan ǹ woo.»

⁹ A bɛ́ á goã á pɛ mà asɛ a Díi min mɛnɛn kɔ asɛ la, mà asɛ toa ǹ kɔ́n bɔ̀n baa wa, bɛa boo lɛ a lɛ pã ǹ gɔn nɛ ka bɛ nɛ.

¹⁰ Simɔn Piɛrɛ sɛ, gɔya sa kɔ́n goã bɛ gɔn. Á woɛ̃ á bɔ a kii ni, á wúlu-bɔlen kiã a dí-nyali a gusin a too na nɛ. Bɛa dí-nyali lɛ tɔ mà Malkusu.

¹¹ Yezu tɔ́n pɛ Piɛrɛ nɛ: «N gɔya lɛ wɔ a kii ni! Maa Díi nɔmaa mɛn kɔ ma la, ma n taasɛ mà maa die lɛ koe bɛ-a wa?»

Maǹ woe ka Yezu ni wúlu-bɔlen kiã a piɛ

¹² Sɔraasi kuru lɛ laanka ǹ goledɛnaa nɛ ka Zuifun garadin lɛn nɛ, ǹ nə́ Yezu kũ ǹ nə́ yii,

¹³ ǹ nə́ woo ne wúlu-bɔlen kiã zizi Anɛ a piɛ bɔrɔ. Kayifu mɛn bɛ́ wúlu-bɔlen kiã lɛa bɛa lɛ̀ lɛ-a, bɛ lɛ dàãgiĩ-n ka bɛa Anɛ lɛ nɛ.

¹⁴ A din Kayifu lɛ na á pɛ Zuifun pàãdɛnan manɛ mà á soɛ ǹ ganaa, min goon gã min tumaa a lɛa.

Piɛrɛ a piã ka Yezu a kialandɛnaabaa-n boo

¹⁵ Simɔn Piɛrɛ laanka ǹ miã kialandɛnaa lɛ goon nə́ kɔ Yezu kio lɛ. Wúlu-bɔlen kiã tá bɛa kialandɛnaa lɛ doɛ̃; bɛ lɛ nɛ, Yezu bɛ́ we wúlu-bɔlen kiã a sumu gɔ́ɔ̃ nɛ ǹ mɛn waáraa, a dɔ wɔ kun ni,

¹⁶ sɛnɛ, Piɛrɛ sɛ golee kiɛnlɛ-a kanaa. Bɛa kialandɛnaa kɛ lɛ wúlu-bɔlen kiã n doɛ̃, bɛ lɛ soo, lɔ mɛn bɛ́ kiɛnlɛ lɛ lɛduĩ, á boo da ka bɛ nɛ, á tɔ́n Piɛrɛ kũ á wɔ-n sumu gɔ́ɔ̃ nɛ.

¹⁷ Lɔ lɛ kiɛnlɛ lɛduĩ, bɛ́ tɔ́n pɛ Piɛrɛ nɛ: «N dɔ goã giĩ kɛ lɛ a kialandɛnaa goon lɛa wa?» Piɛrɛ mà a ganaa, mà asɛ ba a lɛa wa dɛ!

¹⁸ Dí-nyalin laanka garadin nə́ tɛ koa, ǹ nə́ goã n gɔ̀nɔn wɛ̃ a ganaa, a giala, nyan na á goã boe. Piɛrɛ dɔ́ goã ǹ li n gɔ̀nɔn wɛ̃.

Wúlu-bɔlen kiã nɔ̀n mɛn da Yezu la

¹⁹ Wúlu-bɔlen kiã bɔ á mɛ la, á nɔ̀n da Yezu la a kialandɛnan wɔ gɔn la ka a daraa wɔ a paǹ dɔ nɛ.

²⁰ Yezu tɔ́n pɛ-n kɛnɛn: «Má boo da min tumaa-n foaãnɛ; biikoo woo biikoo, lɛsɔkɔn kionən mɛnɛn laanka Lawa a kion mɛn bɛ́ kaa lɛsɔkɔn bǎãn lɛa, má minin daraa bɛn nɛ. Ma boo kɔ́n da má duru ka la wa.

²¹ Wàa na á baa n tá nɔ̀n diɛ ma la? Ma màn mɛn pɛ, min mɛnɛn nə ma, nɔ̀n da bɛn la. Ma màn mɛn pɛ ǹ tá doɛ̃.»

²² Bɛa boon lɛn nə́ bɔ Yezu lɛ-n lɔn, garadi lɛ mɛn bɛ́ a genli, bɛ nə́ n gɔn tɔ a para-n, bɛ̀ á n pii ni mà a wúlu-bɔlen kiã lɛ si ǹ gɔn nə ke koɛ?

²³ Yezu tɔ́n pɛ nɛ: «Bɛ̀ má boo baraa da, maa boo lɛ a paǹ mɛn bɛ́ baraa, bɛ nyaa. Sɛnɛ, bɛ̀ á daa yaa má boo sonbore da, wàa na á baa n tá ma dii?»

²⁴ A bɛ́ miɛ̃, Anɛ Yezu toa yii ni á dia wúlu-bɔlen kiã Kayifu la.

Piɛrɛ a wusoo a piã ka Yezu-n boo

²⁵ Bɛ á zɛnɛɛ, bɛ̀ Simɔn Piɛrɛ á tɔn tán n gɔ̀nɔn wɛ̃ tɛ ganaa. Ǹ nə́ nɔ̀n da la mà a dɔ́ bie giĩ lɛ a kialandɛnan lɛn goon lɛa wa ya? Piɛrɛ nə́ n piã, á pɛ mà asɛ ba a lɛa wa dɛ!

²⁶ Piɛrɛ min mɛn too kuru, bɛ lɛ dɔɔ̃n kɔ́n na á goã wúlu-bɔlen kiã a dí-nyalin lɛn goon lɛa, bɛ́ tɔ́n pɛ Piɛrɛ nɛ mà asɛ yɛ dù gɔrɔ lɛ-n kun ni wa ya?

²⁷ Piɛrɛ wusoo á n piã doo. A din biikoo lɛ li gɔrɔ, koo sa goon wuu pɛ.

Pilati n nɔ̀n diɛ Yezu la

²⁸ Bɛ kio, ǹ nə́ soo ka Yezu ni Kayifu a piɛ, ǹ nə́ woo-n gánadɛnaa a piɛ baayɛlɛ yiisoon ne. Ǹ bɛ́ ǹ nə́ woo ne, gánadɛnaa lɛ a tɔrɔ kɔsɔ minbaa lɛ taman yii, ǹ wɔ a sumu lɛ-n wa, màn mɛn bɛ́ toɛ, ǹ baran *gɔ̀ lɔlɔ ǹ dinin ganaa wa, ǹ boo la ǹ *kiɛ̃mala ǹ zɔ́n màn bii; bɛ lɛ nɛ ǹ nə́ zɛnaa miɛ̃.

²⁹ Gánadɛnaa Pilati tɔ́n soo á daa ǹ yaa kanaa, á pɛ ǹ nɛ: «Ka ǹ giĩ kɛ lɛ zɛ̀rɛ biɛ wàa mɛn sii taman yii?»

³⁰ Ǹ ná a lɛ si, ǹ nə́ pɛ mà bɛ̀ giĩ kɛ lɛ bie sii baraa-zɛnaali lɛa wa, mà bɛ̀ ǹsɛn tá re kuĩ ǹ da kɔ la?

³¹ Pilati tɔ́n pɛ ǹ nɛ mà ǹ dininmaan nə kũ ǹ kiri kuru la a kɔnpɛ ka ǹ dinin landa nɛ. Zuifun lɛn mà Pilati ganaa mà ǹsɛn bɛ́ pàã mɛn giulun, mà a kɔnpɛ ka bɛ nɛ, mà ǹsɛn doamaa bie ǹ gɛ̀ dɛ wa.

³² A na á n zɛnaa miɛ̃, màn mɛn bɛ́ toɛ, Yezu boo mɛn da a din a gɛ̀ wɔ ǹ gɔn la bɛ lɛ lɛ pã.

³³ Pilati wusoo á wɔ kion. Á Yezu bíi, á nɔ̀n da la: «N din ni Zuifun kii lɛa?»

³⁴ Yezu ná a lɛ si á pɛ nɛ mà a n bɛ pii a din mìi gialaa hinlaa mà minin man nə́ asɛ boo da nɛ?

³⁵ Pilati tɔ́n pɛ nɛ: «Masɛ n Zuifu lɛa ya? N din tɔrɔn laanka kaa wúlu-bɔlen goledɛnan man nə́ daa n wɔ masɛ gɔn! Ma nə́ n wàa la?»

³⁶ Yezu tɔ́n ná a lɛ si á pɛ-n kɛnɛn: «Masɛ a kiibaa lɛ bie kanaa kɛ wɔ lɛa wa. Bɛ̀ maa kiibaa lɛ n kanaa kɛ wɔ lɛa, bɛ̀ maa minin kɛn nə́ zia baa, màn mɛn bɛ́ toɛ, ma baran n wɔ Zuifun pàãdɛnan gɔn wa. Sɛnɛ, masɛ a kiibaa lɛ, kanaa wɔ bie wa.»

³⁷ Pilati tɔ́n pɛ nɛ mà a n kii lɛa le? Yezu ná a lɛ si: «N din nə pii mà man kii lɛa. Masɛ n má yɛ má daa sonbore nyaa kanaa gɔ́ɔ̃ nɛ. Min woo min tá sonborebaa ǹ zii tɔ we, bɛa dɛnaa nə n too koe masɛ a boo ganaa.»

³⁸ Pilati tɔ́n nɔ̀n da la mà sonbore n wàa lɛa? Pilati nə n lɛ bɔ bɛa boo lɛ-a lɔn, á soo kanaa doo á woo Zuifun lɛn li, á pɛ ǹ nɛ: «Masɛ yii ba zɛ̀rɛbaa ǹ sii kɔ́n ganaa a wɔ a paǹ li wa.

Ǹ gɛ̀ dɔlɔ mɛn da Yezu mìi ni

³⁹ Sɛnɛ, a kɔnpɛ ka ka dinin landa nɛ, bɛ̀ kiɛ̃mala ǹ zɔ́n dɔ lɔn, masɛ bɛ́ n kòso nɛ goon diɛ, ka tá li ma Zuifun kii lɛ da ya?»

⁴⁰ Ǹ nə́ nɔmaa ǹ nə́ bɔ ǹ nə́ mɛ la ǹ nə́ n lɛ dɛ mà aba, mà a baran kɛ da wa. Mà a Barabaasi da! A da yaa bɛa Barabaasi lɛ dɔ n mɛnaa minin la wole lɛa.