Zaã a sɛ́wɔ 13 - LAWA A BOO SONBORE

Yezu ná a kialandɛnan gòãn pii

¹ *Kiɛ̃mala ǹ zɔ́n laan bɛ̀ á dɔ, Yezu dɔ̃ mà asɛ a biikoo dɔ, a n bɔ kanaa kɛ gɔ́ɔ̃ nɛ, a wo ǹ Di Lawa li. A goã a wɔn mɛnɛn lɛn narɛ kanaa lɛ gɔ́ɔ̃ nɛ biikoo tumaa waáraa, á wusoo á bɛn narɛ doo yǎa a dan ganaa.

² Yezu laanka a kialandɛnan man màn bii biikoo kɔ́n li. Bɛ á zɛnɛɛ bɛ̀ *Sɛtaan nə́ saa lɛlɛ, á wɔ Kariyɔtin Simɔn a nɛgiĩ Zudaasi yiri ni, mà a Yezu kɔ a zɔ́ɔn la.

³ Yezu dinmaa lɛ á doɛ̃ sɛn, mà asɛ a Díi na á sii din tumaa a pàã kɔ asɛ la. Á doɛ̃ mà asɛ na á bɔ Lawa li á daa, mà asɛ n wusii á woe Lawa li.

⁴ Sɛnɛ, á yoo á n bɔ tán-a màn bii ǹ bǎã nɛ, a ná a mɔnaa sɔlɔ á da tán, á mɔnaa gɔn saa á n bii yii ni.

⁵ Bɛ kio, á mu kaa màn nɛ, a ná a lɛ kũ a ná a kialandɛnan lɛn gòãn pii, bɛ̀ a ǹ tuturu ka a bii yii ǹ mɔnaa lɛ nɛ.

⁶ A bɛ́ á dɔ Simɔn Piɛrɛ ganaa ǹ mɛn waáraa, bɛ́ tɔ́n pɛ nɛ: «N din Dɛnaa n masɛ gòãn pii kən le!»

⁷ Yezu tɔ́n pɛ nɛ: «Ma bɛ́ sii mɛn zɛnɛɛ, n ba doɛ̃ sisia wa, sɛnɛ, n tá re a giala miɛ bɛ kio.»

⁸ Piɛrɛ tɔ́n pɛ nɛ: «Boɛɛ wa! N ba masɛ gòãn pii wa!» Yezu mà Piɛrɛ ganaa: «Bɛ̀ man gòãn pii wa, n màn kɔ́n gii ba kun ka masɛ-n doo wa.»

⁹ Simɔn Piɛrɛ tɔ́n pɛ nɛ: «Dɛnaa, bɛ̀ á miɛ̃, n baran toa ma gòãn dininsɔɔ̃nɔn li wa, ma gɔ̀nɔn dɔ pii ka ma mìi ni!»

¹⁰ Yezu tɔ́n pɛ nɛ: «Bɛ̀ min mɛn nə́ n zoo, bɛ na á *yoreen kɔ, ǹ dɛnaa laadoo ba a ganaa a n paǹ kɔ́n pii doo wa, yǎa a gòãn, a giala, ǹ dɛnaa bɔ yoreen ne. Kasɛn kɛn tá yoreen ne, sɛnɛ, ka dinin tumaa bie wa.»

¹¹ (Min mɛn bɛ́ re we a zɔ́ɔn gɔn, á bɛa dɛnaa dɔ̃. Bɛ lɛ na á toa á pɛ mà ǹ dinin tumaa ba yoreen wa.)

¹² Yezu bɛ́ á ǹ gòãn pii á nya, a ná a mɔnaa saa á wɔ a ganaa, á wusoo á giã tán-a màn bii ǹ bǎã nɛ. Á pɛ ǹ nɛ: «Ma sii mɛn zɛnaa ka nɛ, ká a giala ma?

¹³ Ka ǹ ma bíi Mìinaa, Dɛnaa, ka sonbore pɛ, a giala, man bɛ lɛ lɛa.

¹⁴ Bɛ̀ ń yaa masɛ din Dɛnaa, masɛ din Mìinaa ka gòãn pii, a kũ bɛ lɛ-a, ka dɔn doamaa nɛ ka kɔn gòãn pii.

¹⁵ Sii a kɔnboe n ke ma á nyɛɛ ka nɛ, ma sii mɛn zɛnaa ka nɛ, ka dɔn nə zɛnaa miɛ̃.

¹⁶ Man taãn pii ka nɛ, bɛ̀rɛ kɔ́n ba gole á la ǹ Dɛnaagiĩ-n wa, dia dí-a wole kɔ́n dɔ a gole á la a dia wole-n wa.

¹⁷ Ka bɛ́ bɛ doɛ̃ kanna, ka kɔ lɛ, ka foo á re nyɛɛ.

¹⁸ «Ma bie boo diɛ ka dinin tumaa wɔ gɔn la wa, ma min mɛnɛn bɔ, ma á bɛn doɛ̃. Sɛnɛ, Lawa a boo màn mɛn pɛ, bɛ doamaa nɛ a n zɛnaa; a na á pɛ: "Min mɛn din bɛ́ màn bii kun ka masɛ nɛ, a din lɛ na á n bɔyaa masɛ li."

¹⁹ Man pii ka nɛ sisia, bɛ̀ a biikoo baa doe, màn mɛn bɛ́ toɛ, bɛ̀ á n zɛnaa ǹ mɛn waáraa, ka tɔ́n golee li mà ma bɛ́ min mɛn lɛa mà man bɛ lɛa.

²⁰ Man taãn pii ka nɛ, bɛ̀ min mɛn maa dia dí-a wole kũ doɛ̃, bɛa dɛnaa na á ma dinmaa lɛ kũ doɛ̃. Bɛ̀ min mɛn ma kũ doɛ̃, bɛa dɛnaa na á maa dia wole kũ doɛ̃.»

Min mɛn bɛ́ re Yezu koe a zɔ́ɔn la

²¹ Bɛa boon lɛn diɛ kio, Yezu gɔ́ɔ̃ wɔ̃ parsiini, á tɔn pɛ panparanpaa nɛ kɛnɛn: «Man taãn pii ka nɛ: Ka dinin min goon nə die ma we maa zɔ́ɔn gɔn.»

²² A kialandɛnan lɛn nə́ ga kɔn ganaa, ǹ dinin ba doɛ̃ a bɛ́ boo diɛ min mɛn wɔ gɔn la wa.

²³ Kialandɛnan lɛn goon ne, Yezu bɛ́ ǹ mɛn lɛ narɛ a tɔ-a, bɛ goã tán-a a li.

²⁴ Simɔn Piɛrɛ tɔ́n gòon yiɛ bɛ ganaa, mà a nɔ̀n da Yezu la, mà a n die ganaa.

²⁵ Bɛa kialandɛnaa lɛ nə́ n para kanaa Yezu paǹ li, á nɔ̀n da la: «Dɛnaa, die-n dɔn?»

²⁶ Yezu tɔ́n pɛ: «Gɔn yii goon ke ma á die siɛ̃ dù ni, ma bɛ́ re bɛ koe min mɛn la, bɛa dɛnaa lɛ nɛ.» Bɛ kio, Yezu gɔn yii goon mɛn lɛ sã a nɛ, á bɛ lɛ saa á kɔ Kariyɔtin Simɔn a nɛgiĩ Zudaasi la.

²⁷ Zudaasi bɛ́ á gɔn yii goon lɛ si lɔn, Sɛtaan nə́ wɔ a foo ne. Yezu tɔ́n pɛ nɛ: «N bɛ́ li n dí mɛn nya lɛn, a nya fufuu!»

²⁸ Min mɛnɛn nə́ goã walan, ǹ kɔ́n Yezu a boo lɛ a diɛ mìi yɛ wa.

²⁹ Ǹ wɔrɔ màn bɛ́ á goã Zudaasi din gɔn, bɛ lɛ nɛ, ǹ tɛn goã taasɛ, mà Yezu na á pɛ nɛ mà a wo ǹsɛn laadoo màn pii zɔ́n lɛ taman yii, hinlaa, mà a màn kɔ́n kɔ doobaan la.

³⁰ Zudaasi bɛ́ á màn-bii gɔn yii goon lɛ si lɔn, á n da kiɛnlɛ la gɔrɔ. Bɛ á zɛnɛɛ bɛ̀ wɔlɔ tii.

Yezu dí dii mɛn kɔ

³¹ Zudaasi soo lɔn, Yezu pɛ: «Sisia kəni, Min a Nɛgiĩ a gugurubaa á die yii. Lawa dinmaa dɔ a gugurubaa á die yii bɛ lɛ gɔ́ɔ̃ nɛ.

³² Bɛ̀ má Lawa a gugurubaa nyaa, Lawa dinmaa dɔ á die masɛ a gugurubaa nyɛɛ a din li. Boɛɛnɛ, á die bɛ lɛ zɛnɛɛ.

³³ Maa wɔn lɛn, man kun ka nɛ biikoo boɛɛn dinsɔɔ̃ gɔ́ɔ̃ nɛ. Ka tá re giɛ masɛ li; sɛnɛ, ma màn mɛn pɛ Zuifun manɛ, man bɛ lɛ pii ka dɔn man sisia: Ma bɛ́ woe bǎã mɛn nɛ, ka a boe la ka wo walan wa.

³⁴ «Man dí-pɛ dii koe ka la: Ka kɔn narɛ. Masɛ ka narɛ lɔn, ka dɔn nə kɔn narɛ miɛ̃.

³⁵ Bɛ̀ ka tá kɔn narɛ, min tumaa á re doɛ̃, mà ka n masɛ a kialandɛnan lɛa.»

Yezu boo mɛn da Piɛrɛ a piã wɔ gɔn la

³⁶ Simɔn Piɛrɛ tɔ́n pɛ nɛ: «Dɛnaa, ma n woe maa?» Yezu pɛ nɛ: «Ma bɛ́ woe bǎã mɛn nɛ, n ba boe la n kɔ masɛ lɛ n wo walan sisia wa, sɛnɛ, boɛɛnɛ, n tá re koe ma kio lɛ.»

³⁷ Piɛrɛ tɔ́n pɛ nɛ: «Dɛnaa, wàa na á baa masɛ a boe la ma kɔ n kio lɛ sisia wa? Masɛ nə n nyin koe n lɛa dinin!»

³⁸ Yezu pɛ nɛ: «N tá lɛ koe sonbore, mà n tá n din nyin koe masɛ a lɛa? Man taãn pii n ni, koo laan bɛ̀ a wuu pɛ, bɛ̀ n nə́ n piã ka masɛ nɛ, á dɔ gunyin sɔɔ.»