Zaã a sɛ́wɔ 11 - LAWA A BOO SONBORE

Yezu a giaára Lazaarɛ a gɛ̀

¹ Giĩ goon na á goã Betaanii kiwi, a tɔ n Lazaarɛ, busu goã a ganaa. Mariya laanka ǹ golo Marti dɔ n bɛa kiwi lɛ a minin lɛa.

² A din Mariya goongoon kɛ lɛ na á nyɔɔ gìĩ kɔɔ̃n kaa Dɛnaa Yezu gòãn ganaa, á ǹ tuturu ka a din mìi ka nɛ. A din lɛ miãgiĩ Lazaarɛ na á goã a ba lon wa.

³ Ǹ miãnɛn min paa lɛ min dia mà a wo pɛ Yezu ni mà Dɛnaa, mà a giaáragiĩ lɛ a lon wa.

⁴ Yezu bɛ́ a ná a boo ma lɔn, á pɛ mà Lazaarɛ a gɛ̀ busu bie ke wa, mà kɛ n die Lawa a boo sii la nyɛɛ. Mà a din lɛ dɔ n die Lawa a Nɛgiĩ a boo sii la nyɛɛ.

⁵ Yezu goã Marti laanka ǹ diɛ̃lɔ lɛ narɛ parsiini ka Lazaarɛ nɛ.

⁶ Sɛnɛ a laanɛ á dɔ̃ mà Lazaarɛ ba lon wa, a goã bǎã mɛn nɛ, á wusoo á giã walan yǎa lɛawaa paa doo.

⁷ Bɛ lɛ kio-n kəni, á pɛ a kialandɛnan manɛ mà ǹ daa ǹsɛn nə wusoo ǹ wo Zudee gána nɛ.

⁸ A kialandɛnan lɛn nə́ tɔ́n pɛ nɛ: «Mìinaa, táa Zuifun nə́ baa re n dii ka kɔlɔ-n walan sisia. Ma n giɛ li n wusoo n wo walan doo?»

⁹ Yezu tɔ́n pɛ ǹ nɛ: «Biikoo fulupaa bie lɛawaa goon gɔ́ɔ̃-n wa? Sii din tumaa laanka a biikoo ne. Bɛ̀ min nə tɔ we penleen ke, a ba n gòã niɛ̃ wa, a giala, a yii á wɔlɔ ganaa.

¹⁰ Sɛnɛ, bɛ̀ min tá tɔ we tèlò-n, ǹ dɛnaa nə n gòã niɛ̃, a giala, ǹ dɛnaa yii ba wɔlɔ ganaa wa.»

¹¹ Bɛa boon lɛn diɛ kio á tɔ́n pɛ: «Wɔa giaáragiĩ Lazaarɛ lɛ na á nyuù wɔ, sɛnɛ, masɛ á die woe a yii kiɛ.»

¹² A kialandɛnan lɛn nə́ tɔ́n pɛ nɛ: «Dɛnaa, bɛ̀ a na á nyuù wɔ kaa, a busu lɛ á die nyɛɛ.»

¹³ Yezu n giɛ li a Lazaarɛ a gɛ̀ boo da ǹ nɛ, sɛnɛ, ǹsɛn man nə́ goã taasɛ mà a n boo diɛ nyuù taãn kɛ wɔ gɔn la.

¹⁴ Yezu tɔ́n pɛ ǹ nɛ foaãnɛ: «Lazaarɛ gã.

¹⁵ Ma bɛ́ ma goã walan wa, bɛ din nə kɔɔ̃n masɛ-a kasɛn kɛn lɛn taman yii, màn mɛn bɛ́ toɛ, ka golee masɛ li taãn-taãnɛ. Sɛnɛ, ka daa wɔ n tan!»

¹⁶ Ǹ bɛ́ Toomaa mɛn bíi "Diidiimu" (bɛ giala mà bɛlɛman), bɛ tɔ́n pɛ kialandɛnaa gialakunun lɛn manɛ, mà ǹ daa ǹsɛn dɔn nə n tan, ǹsɛn dɔn nə gã kun ni.

Yezu a yiikoonaabaa kɔ minin la boo

¹⁷ Yezu bɛ́ á dɔ, á woo yaa bɛ̀ ǹ nə́ Lazaarɛ bĩ, á dɔ lɛawaa sii yala-n.

¹⁸ Betaanii laanka Zeruzalɛmu bii dɔ kilo sɔɔ taãn wa,

¹⁹ Zuifu gigiã bɔ walan ǹ nə́ daa Marti laanka Mariya ǹ miãgiĩ lɛ a gɛ̀ fòo da ǹ nɛ.

²⁰ Marti bɛ́ á ma mà Yezu á die, á yoo á woo n da lɛ, bɛ á zɛnɛɛ bɛ̀ Mariya á giã-n tán kion.

²¹ Marti mà Yezu ganaa: «Dɛnaa, bɛ̀ ma nə n tan kànaa ke, bɛ̀ masɛ miãgiĩ lɛ a giɛ̃ wa.

²² Sɛnɛ, haalɛ tɔn pelo, ma á doɛ̃ máa n bɛ́ re màn woo màn nyankoe Lawa lon, Lawa á re koe n la.»

²³ Yezu tɔ́n pɛ nɛ: «N miãgiĩ lɛ yii á die kiɛ.»

²⁴ Marti dɔ mà asɛ á doɛ̃ mà a yii á re kiɛ kanaa a nya pinaa.

²⁵ Yezu tɔ́n pɛ nɛ: «Masɛ din nə geren yii-kaali lɛa, ma din nə yiikoonaabaa lɛa. Bɛ̀ min mɛn golee masɛ li, ta ǹ dɛnaa na á gã, a yii n tɔn koo;

²⁶ bɛ̀ min mɛn dɔ yii a koo, ǹ dɛnaa golee masɛ li, bɛa giɛ̃ duduu wa. Ń golee bɛ li?»

²⁷ Marti ná a lɛ si: «Hiĩ, Dɛnaa, má golee li máa n din ni Minin Nyin-sili lɛ lɛa, ma n Lawa a Nɛgiĩ lɛa, min mɛn doamaa bɛ́ nɛ a da kanaa gɔ́ɔ̃ nɛ.»

²⁸ Bɛa diɛ kio, Marti woo lɛ dia ǹ diɛ̃ Mariya la, á n duru á pɛ nɛ: «Mìinaa daa, a tá lɛ diɛ n la.»

²⁹ Mariya bɛa boo lɛ ma lɔn, á yoo ka dɔdɔ á woo a li.

³⁰ Bɛ á zɛnɛɛ bɛ̀ Yezu tɔn wɔ kiwi gɔ́ɔ̃-n wa. Marti wo n da lɛ bǎã mɛn nɛ, bɛ̀ á tɔn walan.

³¹ Zuifun mɛnɛn bɛ́ kion Mariya li a nyín tii a ganaa, bɛn bɛ́ ǹ nə́ yɛ á yoo ka son mà a n soe, ǹ nə́ yoo ǹ nə́ kɔ lɛ. A nə ǹ gɔ́ɔ̃ nɛ mà a n woe wuu pii yala la.

³² Yezu bɛ́ bǎã mɛn nɛ, Mariya bɛ́ á dɔ walan, á yɛ lɔn gɔrɔ, á n duwəə tán-a a giulun, á pɛ nɛ: «Dɛnaa, bɛ̀ ma nə́ n goã kànaa ke, bɛ̀ ma miãgiĩ lɛ a giɛ̃ wa.»

³³ Yezu bɛ́ á Mariya yɛ wuu pii, Zuifun mɛnɛn dɔn nə da kun ni bɛn dɔn nə́ wuu pii, á foo ziziɛ̃, á busu a ganaa.

³⁴ Á tɔ́n nɔ̀n da ǹ la: «Ka n ka bĩ maa?» Ǹ nə́ tɔ́n pɛ nɛ mà Dɛnaa ganaa, mà a da ga a ganaa.

³⁵ Bɛa biikoo li, Yezu yii mu bɔ.

³⁶ Bɛ lɛ nɛ Zuifun lɛn nə́ goã pii mà a bɛ́ á goã narɛ lɔn, mà ǹ ga-a dɛ!

³⁷ Sɛnɛ, ǹ tɛn na á goã pii mà min mɛn bɛ́ á yii tere-a yii bũ, mà a na a goã boe la a toa Lazara ná a giɛ̃ wa?

Lazaarɛ yii kaa

³⁸ Yezu foo wusoo á ziziɛ̃ doo, á kiɛ̃ á woo yala lɛ lɛ-a. Kele kolo yala nɛ, ǹ ná a lɛ tã ka kɔlɔ nɛ.

³⁹ Yezu tɔ́n pɛ: «Ka kɔlɔ lɛ bɔ ka bɔ lɛ.» Gere lɛ miãnɛn Marti lɛ tɔ́n pɛ: «Dɛnaa, a gìĩ doamaa nɛ a yoo kanna. A giala, a lɛawaa sii n ke.»

⁴⁰ Yezu tɔ́n pɛ nɛ: «Ma pɛ n nɛ lɛlɛ, máa bɛ̀ n golee masɛ li, máa n tá re Lawa a boo sii la yii wa?»

⁴¹ Ǹ nə́ kɔlɔ lɛ bɔ ǹ nə́ bɔ lɛ. Bɛ kio, Yezu nə́ n yii saa lon, á pɛ: «Maa Díi, ma á barka diɛ n nɛ, a giala, n masɛ lɛ si.

⁴² Ma á doɛ̃ parsiini máa n tá ma lɛ sii biikoo tumaa waáraa. Sɛnɛ, zaman mɛn bɛ́ ma lɛnpɛnɛ, man má kɛ pɛ bɛn taman yii, màn mɛn bɛ́ toɛ, ǹ waa la mà n din ni n ma dia.»

⁴³ Bɛa boo lɛ a diɛ kio, á paraa ka pã á pɛ: «Lazaarɛ, soo!»

⁴⁴ Gere lɛ yii kaa á soo, a gòãn laanka a gɔnɔn nə́ yii-n ka mɔnaa gɔnɔn nɛ, mɔnaa fu n pɛnɛɛ nɛ a yɔrɔ-a. Yezu pɛ minin manɛ mà ǹ fore ǹ da a woo!

Minin nə lɛ kaa kun mɛn wɔ Yezu ganaa

⁴⁵ Zuifun mɛnɛn nə́ da Mariya li, Yezu sii mɛn zɛnaa ǹ nə́ yɛ, ǹ gigiã golee Yezu li.

⁴⁶ Sɛnɛ, ǹ gialakunun nə́ kiɛ̃, ǹ nə́ woo dɔ Fariziɛ̃n li, Yezu sii mɛn zɛnaa, ǹ ná a laakalaa ǹ nɛ.

⁴⁷ Lawa a wúlu-bɔlen goledɛnan laanka Fariziɛ̃n nə́ woo kɔn yɛ, ǹ nə́ pɛ mà ǹsɛn man die wàa zɛnɛɛ? Mà giĩ lɛ á ke kaãbaa ǹ sii gigiã zɛnɛɛ!

⁴⁸ Mà bɛ̀ ǹsɛn nə́ kɛ da a gɔn lɛ-a, mà min tumaa á die golee li, mà Rɔmu gána a pàãdɛnan tá re miɛ, mà ǹ tá re die ǹsɛn Lawa a kion kɛ wurii, ǹ nə ǹsɛn gána yu.

⁴⁹ Ǹ min goon ne, a tɔn n Kayifu, a din lɛ na á goã Lawa a wúlu-bɔlen kiã lɛa bɛa lɛ̀ lɛ-a. Bɛ́ tɔ́n pɛ mà ǹ ba màn kɔ́n doɛ̃ sii kɛ gɔ́ɔ̃-n wa.

⁵⁰ Mà ǹ ba doɛ̃ dɔn dinin mà á soɛ ǹ ganaa, min goon nə gã min tumaa a lɛa, màn mɛn bɛ́ toɛ, ǹsɛn tɔrɔ tumaa baran bɔ̀n baa wa?

⁵¹ (A bie á bɛa boo kɛ lɛ da a din li wa. Sɛnɛ, a bɛ́ wúlu-bɔlen kiã lɛa bɛa lɛ̀ lɛ-a, a na á bɛ da Lawa a boo gii lɛa, mà Yezu doamaa nɛ a gã Zuifu tɔrɔn lɛ-a.

⁵² Ǹ dininsɔɔ̃nɔn lɛa bie wa, sɛnɛ, a doamaa nɛ a gã, màn mɛn bɛ́ toɛ, Lawa a nɛnyaanan mɛnɛn bɛ́ sasawaa nɛ, á bɛn dɔn kaa kun, á ǹ tumaa baa goon.)

⁵³ A din pinaa lɛ-n kəni ǹ nə́ golee la, mà ǹsɛn man die dii a gã.

⁵⁴ A kũ bɛ lɛ ganaa, Yezu ná a lɛ da a ba n din nyɛɛ Zuifun yɔrɔ-a miɛ̃ doo wa. Á soo á n bɔ walan, á woo don, lɛkoro-a ǹ kiwi kɔ́n nɛ, a tɔ mà Efrayimu, a laanka a kialandɛnan nə́ giã walan bɔrɔ.

⁵⁵ Zuifun *kiɛ̃mala ǹ zɔ́n nə́ diri. Don kion min gigiã zɔ́n lɛ toa die, ǹ nə́ soo ǹ nə́ woo *gɔ̀ bɔ ǹ dinin ganaa Zeruzalɛmu, á kɔnpɛ ka ǹ landa nɛ.

⁵⁶ Ǹ nə́ goã giɛ Yezu li. Ǹ bɛ́ Lawa a kion, maǹ nə́ goã nɔ̀n didiɛ kɔn la walan, ke mà ǹ miã n wàa taasɛ? Mà á re die zɔ́n lɛ-a dinin le?

⁵⁷ Wúlu-bɔlen goledɛnan laanka Fariziɛ̃n man nə́ pɛ ǹ nə́ laa, mà bɛ̀ min mɛn nə́ Yezu bǎã dɔ̃, mà ǹ dɛnaa da a giala pɛ ǹsɛn manɛ, màn mɛn bɛ́ toɛ, ǹsɛn nə wo kũ.