Sii yɔrɔ-bɔlen 7 - LAWA A BOO SONBORE

Zediɔ̃ zia mɛn baa Zurdɛ̃ a lɛ̀giala gɔn la

¹ Zediɔ̃ lɛ, ǹ nə́ bíi Yerubaali, bɛ́ yoo baayɛlɛ yiisoone, kun ka zaman mɛn tumaa goã kun ni, ǹ nə́ woo golee Arodi tà lɛ-a. Madiã minin sɛn giã ǹ bǎã wɔlɔ na á goã lui ni ǹ ganaa, gɔsɛ a lɛ̀gɔn la diə fúlu kɛ nɛ, Moore tenten kɛ paǹ li.

² Dɛnaa Lawa pɛ Zediɔ̃ nɛ: – Zaman mɛn bɛ́ kunun n ni, ǹ tá mɔnaa nɛ á la yii ni. Bɛ̀ ma Madiã minin lɛn wɔ ǹ gɔn ka kɛa yɔrɔ kɛ nɛ, Izirayeli minin tá re n dinin gole koe masɛ ganaa ǹ pɛ mà ǹsɛn dinin pàã na á ǹsɛn kirisibaa.

³ Bɛ lɛ nɛ, kɛ pɛ zaman lɛ nɛ: «Min woo min tá nyɛ́ɛ biɛ, a gɔ̀nɔn nə́ bìn diɛ, bɛ nə n lɛ goa, a n wɔlɔ lui Galaati kele kɛ ganaa.» Zaman lɛ a min duu fuəwenpaa wusoo, a gialakun nə́ n zɔ̃ á goã min duu fù.

⁴ Bɛ tumaa kio, Dɛnaa Lawa pɛ Zediɔ̃ nɛ: «Zaman lɛ á tɔn gigiã á la yii ni. Minin lɛn kũ, n wo ǹ ne tà lɛ-a, ma ǹ gɔgɔɔ̃ walan ma ǹ kɔ n la. Bɛ̀ ma pɛ, máa min mɛn wo kunun n ni, bɛa dɛnaa á re woe kunun ni. Bɛ̀ má pɛ, máa min mɛn baran wo kunun ni wa, bɛa dɛnaa a re woe kunun ni wa.»

⁵ Zediɔ̃ minin lɛn kũ, á woo ǹ ne tà lɛ-a. Dɛnaa Lawa tɔ́n pɛ Zediɔ̃ nɛ: «Min woo min bɛ́ re mu yoe ka a lɛwɔn nɛ ka gin bɛ́ mu mii lɔn, n bɛn kaa ǹ gɔrɔn. Min mɛnɛn dɔn bɛ́ re n musi doɛ ǹ mi, n bɛn dɔn kaa ǹ gɔrɔn.»

⁶ Min mɛnɛn nə mu lɛ si ka ǹ gɔn nɛ, bɛ̀ ǹ wo ne ǹ lɛ-a ǹ yo ka ǹ lɛwɔn nɛ, bɛn man nə́ goã min biɛ sɔɔ. Gialakun kɛ tumaa na á n musi doa, á mu lɛ mi.

⁷ Dɛnaa Lawa tɔ́n pɛ Zediɔ̃ nɛ: «Masɛ n die ka kirisibiɛ ka bɛa min biɛ sɔɔ kɛ lɛ nɛ, ma Madiã minin lɛn wɔ n gɔn. Gialakun kɛ tumaa wusoo a wo piɛ.»

⁸ Zaman lɛ da ka màn-bii mɛn nɛ, min biɛ sɔɔ lɛ bɛ si, ka ǹ bɛnɛn kɛn dɔn nɛ. Bɛ kio, Zediɔ̃ Izirayeli minin gialakunun lɛn dia piɛ. Sɛnɛ, á min biɛ sɔɔ kɛ lɛ kurəə. Madiã minin lɛn giã ǹ bǎã na á goã diə fúlu kɛ nɛ, asɛ wɔ lɛ a tán nɛ.

⁹ Bɛa tèlò kɛ lɛ nɛ, Dɛnaa Lawa pɛ Zediɔ̃ nɛ: «Yoo n wo Madiã minin lɛn gialaa. A giala, masɛ nə́ ǹ wɔ n gɔn.

¹⁰ Sɛnɛ, bɛ̀ woo tá nyɛ́ɛ diɛ n ganaa, wo kun ka n dí-nyali Puraa nɛ.

¹¹ Ǹ bɛ́ boo mɛn diɛ walan, n too kɔ li. N foo á re taɛ̃, n boo la n wo minin lɛn gialaa.» Zediɔ̃ woo kun ka a dí-nyali Puraa nɛ, yǎa ǹ zia-baalin lɛn giã ǹ bǎã lɛkoro-a.

¹² Á ke, Madiã minin ni, Amalɛki tɔrɔn laanka lɛ̀giala gána minin kɛn tumaa na á goã nyɔmaa-n tán diə fúlu lɛ nɛ, gigiã ka bisinin manɛ. Ǹ nyɔɔmaan kɛn, min ba boe la á bɛn nimii wa. Maǹ gigiã ka nyɔɔsɔ bɛ́ lɔn yìsi mu lɛ-a.

¹³ Zediɔ̃ bɛ́ doe, bɛ̀ giĩ goon na a narɛɛ yɔrɔ pii ǹ miã-n kɛnɛn. Maa narɛɛ lɛ á ke: «Buuru mìi goon na á goã n binbirin boe Madiã minin bǎã lɛ nɛ, á da yǎa kiɛnlɛ-a, á n tɔ mɔnaa kion lɛ nɛ. Á kion lɛ nyanaa á kaa, á bɔyaa á ná a làfu kɔ, á goã tán a làfu la!»

¹⁴ Ǹ miã lɛ ná a lɛ si á pɛ nɛ: «Kɛ bie sii kɔsɔ giala pii wa. Izirayeli min Zoasi a nɛgiĩ Zediɔ̃ a ziabaa ǹ gɔya sa kɛ a sii ni. Lawa Madiã minin lɛn laanka ǹ zia-baalin tumaa wɔ a gɔn dɔn.»

¹⁵ Zediɔ̃ bɛa narɛɛ lɛ a boo ma lɔn ka a binyəə ne, á kaa tán á Lawa guguru kɔ. Bɛ kio, á n bɔyaa á daa Izirayeli minin lɛn giã ǹ bǎã nɛ, á pɛ: «Ka yoo, a giala, Dɛnaa Lawa Madiã a zia-baalin lɛn wɔ wɔ gɔn.»

¹⁶ Zediɔ̃ min biɛ sɔɔ lɛ tala kɔn kuru sɔɔ. Á bɛn kɔ ǹ gogoonmaa la, ka dɔ́n gɔ́ɔ̃ kooro-a nɛ, bolon nə́ koe ne a lɛ lɛ.

¹⁷ Á pɛ ǹ nɛ: – Ka ga masɛ din ganaa. Ma bɛ́ re sii mɛn zɛnɛɛ, ka dɔn nə bɛ lɛ zɛnaa. Bɛ̀ má dɔ Madiã minin bǎã lɛ lɛkoro-a, ma bɛ́ re sii mɛn zɛnɛɛ, ka dɔn nə bɛ lɛ zɛnaa.

¹⁸ Ma laanka min mɛn tumaa bɛ́ kun, wɔsɛn tá re bɛn pii. Bɛa biikoo li, ka dɔn nə bɛn pɛ, ka giã ǹ bǎã lɛ lɛnpɛnɛ nɛ, bɛ̀ ka tá n lɛ dii ka n pii: «Dɛnaa Lawa laanka Zediɔ̃ wɔ nɛ.»

¹⁹ Làan nə́ pii mà a n die koe, Zediɔ̃ laanka giĩ paabiɛ mɛn bɛ́ kun, ǹ nə́ dɔ Madiã minin giã ǹ bǎã lɛ lɛkoro-a. Bɛ á zɛnɛɛ, bɛ̀ ǹ nə́ bǎã-lɛduə̃lin lonkɔ, a tɔn belebɔ wa. Izirayeli minin ná a giala kɔ, ǹ nə́ bɛnɛn pɛpɛ. Dɔ́nɔn mɛnɛn nə goã ǹ gɔn, ǹ nə́ bɛn yuyu tán.

²⁰ Bɛa biikoo li, kuru sɔɔ lɛ tumaa a minin nə́ bɛnɛn pɛpɛ, ǹ nə́ dɔ́nɔn lɛn yuyu tán. Didie ná a bolon kũ a gɔsɛ nɛ, bɛn ná a gusin ni, ǹ tumaa nə́ n lɛ dii mà «zia lɛ n Dɛnaa Lawa laanka Zediɔ̃ wɔ lɛa.»

²¹ Ǹ bɛ́ golee ne ǹ gòãn la, ǹ nə́ bǎã lɛ da bii, didie ná a bǎã nɛ, Madiã minin lɛn tumaa nə́ n gòã da baa nɛ, ǹ nə́ baa si, bɛ̀ ǹ tá n lɛ dii.

²² Bɛn biɛ sɔɔ lɛ lɛn bɛ́ boe, Dɛnaa Lawa toa ǹ dinin nə́ n bɔyaa kɔn li bǎã tumaa nɛ, ǹ nə́ kɔn dɛdɛ ka gɔya san nɛ. Zia-baalin lɛn tumaa baa si yǎa Bɛti-Sitaa, Sereraa paǹ li, ǹ nə́ woo yǎa Abeli-Mewolaa tà lɛ-a, kunu Tabati li.

²³ Izirayeli minin lɛn nə́ n lɛ sɔkɔn. Kɛn nə́ bɔ Nɛfutalii tɔrɔn bii, kɛn nə́ bɔ Asɛɛrɛ tɔrɔn bii, kɛn nə́ bɔ Manaasee tɔrɔn tumaa bii, ǹ nə́ Madiã minin lɛn kio loo.

²⁴ Zediɔ̃ minin dia woe pii Efrayimu a kele yii minin kɛn tumaa-n kɛnɛn: «Ka yoo ka da n da Madiã minin lɛn lɛ, ka mu kuru ǹ bǎã kɛa zii tã ǹ ganaa yǎa Bɛti-Baaraa kiwi, ka Zurdɛ̃ tà kɛ dɔ a kuru ǹ bǎã tã ǹ ganaa.» Efrayimu minin lɛn tumaa nə́ n lɛ sɔkɔn, ǹ nə́ mu kuru ǹ bǎã lɛ a zii tã ǹ ganaa yǎa Bɛti-Baaraa kiwi, ǹ nə́ Zurdɛ̃ tà kɛ dɔ a kuru ǹ bǎã tã ǹ ganaa.

²⁵ Ǹ nə́ Madiã minin lɛn nyɛɛnaandɛnaa min paa kũ: Orɛbu laanka Zɛbu ni. Ǹ nə́ Orɛbu dɛ Orɛbu kele la, ǹ nə́ Zɛbu dɛ Zɛbu a rezɛ̃ mu bɔ ǹ yala kɛ lɛ-a. Ǹ nə́ Madiã minin lɛn kio loo miɛ̃, ǹ nə́ woo Orɛbu laanka Zɛbu mìi kɔ Zediɔ̃ la Zurdɛ̃ tà kio.