Sii yɔrɔ-bɔlen 6 - LAWA A BOO SONBORE

Madiã minin nə bɔ Izirayeli minin yii-n lɔn

¹ Sii mɛn bɛ́ baraa Dɛnaa Lawa yii li, Izirayeli minin lɛn nə́ bɛ zɛnaa. Bɛ lɛ nɛ, Dɛnaa Lawa tɔ́n nə ǹ kɔ Madiã minin la, lɛ̀ sɔbaa gɔ́ɔ̃ nɛ.

² Madiã minin lɛn nə́ bɔ Izirayeli minin yii ni taãn-taãnɛ. Madiã minin lɛn lɛa nɛ, Izirayeli minin lɛn nə́ goã n duri kele kɔ́sɔn nɛ, kele yalan nɛ, gɛ̀fun bii.

³ Bɛ̀ Izirayeli minin nə́ màn da ǹ wuru-n lɔn, Madiã minin man die ǹ gialaa, kun ka Amalɛki tɔrɔn nɛ, ka lɛ̀giala minin kɛn nɛ.

⁴ Maǹ nə́ goã giɛ̃ Izirayeli minin lɛn li, bɛ̀ ǹ gána lɛ a mànan ziziɛ̃, yǎa ǹ woe doe Gaazaa kiwi. Ǹ goã màn kɔn toɛ Izirayeli gána nɛ bii ǹ màn lɛa wa: Sère bie wa, dii bie wa, dundun bie wa.

⁵ Sonbore, maǹ nə́ goã yui ka ǹ mɔnaa kionən ne, ǹ dinin laanka ǹ tɔɔn nɛ, gigiã ka bisinin bɛ́ lɔn, bɛ̀ ǹ da Izirayeli minin lɛn gialaa. Ǹ laanka ǹ nyɔɔmaan kɛn man nə́ goã gigiã, min ba boe la a tá ǹ nimii wa. Maǹ nə́ goã die we gána lɛ nɛ, bɛ̀ ǹ basaã kɔ nɛ.

⁶ A na á n baa miɛ̃, Madiã minin lɛn taman yii, Izirayeli minin pàã nya á la yii ni. Bɛ lɛ na á toa, Izirayeli minin lɛn nə́ n lɛ dɛ Dɛnaa Lawa ganaa.

⁷ Izirayeli minin lɛn man nə́ goã n lɛ dii Dɛnaa Lawa ganaa, Madiã minin lɛn taman yii.

⁸ Bɛ lɛ nɛ, Dɛnaa Lawa tɔ́n boo gii-dali goon dia Izirayeli minin lɛn la, á pɛ ǹ nɛ: – Dɛnaa Lawa lɛ, Izirayeli minin Lawa lɛa, bɛ lɛ na á pɛ: Ma din ni má ka waa má ka bɔ Ezipti, ka goã bɛ̀rɛn lɛa gána mɛn lɛ nɛ.

⁹ Ezipti minin kɛn laanka min mɛn tumaa goã boe ka yii ni, ma din ni má ka si bɛn la. Ma din ni má ǹ loo má ǹ bɔ ka nyɛɛnɛ, má ǹ gána kɔ ka la.

¹⁰ Má pɛ ka nɛ: «Ma din Dɛnaa Lawa lɛ n kaa Lawa lɛa. Ka bɛ́ Amɔɔrɔ tɔrɔn mɛnɛn gána nɛ, ka baran nyɛ́ɛ baa bɛn lawan kɛn man wa.» Sɛnɛ, ka n too kɔ masɛ a boo li wa.

Zediɔ̃ a bíi ǹ gɔn

¹¹ Dɛnaa Lawa a lon a dia dí-a wole lɛ daa Ofra kiwi, á giã tán da goon giulun, Zoasi a wuru-n. Zoasi lɛ n Abiezɛɛrɛ a tanlɛ min lɛa. A nɛgiĩ Zediɔ̃ na á goã *belee duwii rezɛ̃ mu bɔ ǹ yala kɛ nɛ, màn mɛn bɛ́ toɛ, Madiã minin kɛn baran yɛ wa.

¹² Dɛnaa a lon a dia dí-a wole lɛ nə́ n din nyaa nɛ, á pɛ-n kɛnɛn: Dɛnaa Lawa tá kunun n ni, zia-baali zanbia gole!

¹³ Zediɔ̃ tɔ́n pɛ nɛ: Maa dɛnaagiĩ, kaarɛ! Bɛ̀ Dɛnaa Lawa tá kun ka wɔsɛn nɛ, wàa na á baa sii kɛ tumaa tá wɔ yii? Wɔ din nə goã sii dadaran mɛnɛn tumaa laakalɛɛ wɔ nɛ, ǹ nə́ pii mà Dɛnaa Lawa na á ǹsɛn waa á ǹsɛn bɔ Ezipti gána nɛ, bɛa siin lɛn man maa kəni? Sɛnɛ, á ke pelo, Dɛnaa Lawa wɔ toa walan, á wɔ kɔ Madiã minin la.

¹⁴ Dɛnaa Lawa nə́ n yɔrɔ bɔyaa á dia la á pɛ nɛ: Pàã kɛ lɛ n lon, wo ka bɛ lɛ nɛ, n Izirayeli minin lɛn si Madiã minin lɛn la. Woo, masɛ din nə n diɛ.

¹⁵ Sɛnɛ Zediɔ̃ pɛ nɛ: Maa dɛnaagiĩ, kaarɛ! Masɛ n die Izirayeli minin lɛn sii lɔn? Manaasee tɔrɔn bii, masɛ din a tanlɛ minin man doobaan lɛa. Ma di kion minin bii, masɛ din nə ǹ tumaa a kiɛɛrɛ lɛa.

¹⁶ Dɛnaa Lawa tɔ́n pɛ Zediɔ̃ nɛ kɛnɛn: Ma á re goɛ̃ kunun n ni, ma á re Madiã minin lɛn tumaa dii kun.

¹⁷ Zediɔ̃ tɔ́n pɛ: Bɛ̀ n tá re bǐɛ̃ koe masɛ-a sonbore, sii a kɔnboe nyaa ma nɛ, màn mɛn bɛ́ nyɛɛ, mà n din nə boo diɛ ka ma nɛ.

¹⁸ Ma nə n nyankoe, n baran n wɔlɔ lui kànaa ganaa wa. Ma bɛ́ re n goe ka màn mɛn nɛ, n yii da, yǎa man bɔyɛɛ ma die bɛ koɛ tán n giulun. Dɛnaa Lawa ná a lɛ si mà asɛ á re golee yǎa a nə n bɔyaa a daa.

¹⁹ Zediɔ̃ daa, á bòe banɛɛn goon kũ á dɛ. Á wùsu bɔ paan yii goon, á buuru zɛnaa nɛ, a yɔ bù kaa li wa. Á siĩ lɛ kaa tiɛrɛɛn nɛ, á ná a mu kaa donkolon ne, á woo a tumaa kɔ la da lɛ giulun.

²⁰ Lawa a dia dí-a wole lɛ tɔ́n pɛ nɛ: Siĩ lɛ laanka buuru lɛ saa, n wo ǹ kaa tán gɛ̀fu kɛ la, n na a mu lɛ binyəə la. Zediɔ̃ zɛnaa miɛ̃.

²¹ Bàlà mɛn bɛ́ Dɛnaa Lawa a lon a dia dí-a wole lɛ gɔn, á bɛ lɛkoro zɔɔ̃ siĩ lɛ laanka buuru lɛ ganaa. Tɛ soo gɛ̀fu lɛ nɛ, á siĩ lɛ laanka buuru lɛ kũ. Bɛ kio, Dɛnaa Lawa a lon a dia dí-a wole lɛ papaã á n bɔ a yɔrɔ-a.

²² Zediɔ̃ bɛ́ á dɔ̃ mà Dɛnaa Lawa a lon a dia dí-a wole ne, á tɔ́n pɛ: «E, Dɛnaa Lawa! Ma á ke má Dɛnaa Lawa a lon a dia dí-a wole yɛ ka ma yii ni.»

²³ Dɛnaa Lawa pɛ nɛ: «Là nyantoro die a giã n li! N baran nyɛ́ɛ baa wa, n ba re giɛ̃ wa.»

²⁴ Bɛa bǎã lɛ nɛ, Zediɔ̃ *wúlu bɔ ǹ bǎã dɔ Dɛnaa Lawa wɔ lɛa, á bíi mà "Dɛnaa Lawa n là nyantoro koe". Haalɛ tɔn pelo, bɛa wúlu bɔ ǹ bǎã lɛ á tɔn Ofra, Abiezɛɛrɛ a tanlɛ minin bɛ́ kiwi mɛn lɛ nɛ.

Baali a wúlu bɔ ǹ bǎã a yui

²⁵ A din tèlò lɛ nɛ, Dɛnaa Lawa pɛ Zediɔ̃ nɛ: «N di dii gɔ̀lɔ̀ paabaa ǹ wɔ mɛn koa a gɔn li, lɛ̀ sɔbaa dii gɔ̀lɔ̀ lɛ, a kũ. N di a dì ke ǹ nə́ bíi *Baali, n bɛa wúlu bɔ ǹ bǎã kɛ yu. Dì gɔn mɛn bɛ́ a li, n bɛ dɔ kuru.

²⁶ Bɛ kio, Dɛnaa Lawa kɛ lɛ n Lawa lɛa, n wúlu bɔ ǹ bǎã sonbore dɔ bɛ wɔ lɛa, tenten kɛ mìi ni. N die n dii gɔ̀lɔ̀ lɛ kũ, n wúlu bɔ nɛ n tã lenlen, ka dì lɛ a gɔn kɛ lɛ nɛ, n nə́ die kuri.»

²⁷ Zediɔ̃ min fù bɔ a dí-nyalin bii, á bɛa sii lɛ zɛnaa ka Dɛnaa Lawa bɛ́ á pɛ-n lɔn. Sɛnɛ, a na á goã nyɛ́ɛ biɛ ǹ di kion minin lɛn laanka kiwi minin manɛ. Bɛ lɛ nɛ, a sii lɛ zɛnaa wɔlɔ yii fúlu-a wa, a na á zɛnaa tèlò-n.

²⁸ Kiwi minin lɛn bɛ́ ǹ nə́ yoo baayɛlɛ yiisoone, ǹ nə́ Baali a wúlu bɔ ǹ bǎã lɛ yɛ, bɛ̀ ǹ nə́ ke ǹ nə́ wuru ǹ nə́ kaa. Dì gɔn mɛn dɔ goã a li, ǹ nə́ bɛ dɔ kuru. Ǹ wúlu bɔ ǹ bǎã mɛn dɔ sisia, ǹ nə́ wúlu bɔ ka dii gɔ̀lɔ̀ paabaa ǹ wɔ lɛ nɛ bɛ lalan, ǹ nə́ tã lenlen.

²⁹ Ǹ nə́ pɛ kɔn nɛ mà die a nya ǹ dí n ke? Ǹ nə́ nɔ̀n dada, ǹ nə́ sii lɛ gɔsɛ. Minin nə́ tɔ́n pɛ mà Zoasi a nɛgiĩ Zediɔ̃ a nya ǹ dí ni.

³⁰ Kiwi minin lɛn nə́ tɔ́n pɛ Zoasi ni: «N nɛgiĩ lɛ bɔ n soo ne, wɔsɛn nə dɛ. A giala, a na á Baali a wúlu bɔ ǹ bǎã yu, dì gɔn mɛn dɔ goã a li, á bɛ kuru.»

³¹ Min mɛnɛn nə goã Zoasi li, Zoasi pɛ ǹ tumaa nɛ: «Kasɛn doamaa nɛ, ka Baali a gɛ̀ dòo bɔ? Ka doamaa nɛ, ka da n dɔ lɛ? Bɛ̀ min mɛn tá Baali a gɛ̀ dòo boe, ka doamaa nɛ, ka bɛa dɛnaa dɛ, bɛ̀ lɛ̀ ná a tɔn waa wa. Bɛ̀ Baali lɛ á Lawa taãn lɛa, ǹ bɛ́ ǹ ná a wúlu bɔ ǹ bǎã wuru ǹ nə́ kaa, ka toa a din na a gɛ̀ dòo bɔ.»

³² A kũ bɛa pinaa lɛ ganaa, ǹ nə́ Zediɔ̃ bíi "Yerubaali" bɛ̀ ǹ nə́ pii: «Baali na a din a gɛ̀-dòo bɔ a ganaa.» A giala mà a din a wúlu bɔ ǹ bǎã nɛ, Zediɔ̃ wuru á kaa.

Zediɔ̃ a yɔrɔ bɔ a wo Madiã minin gialaa

³³ Madiã minin tumaa, Amalɛki tɔrɔn laanka lɛ̀giala gána minin kɛn nə́ n lɛ sɔkɔn, ǹ nə́ Zurdɛ̃ tà kuru, ǹ nə́ daa giã Zizereyɛli a nyankɔrɔ basa kɛ nɛ.

³⁴ Dɛnaa Lawa yiri gisĩ Zediɔ̃ la. Zediɔ̃ bɛn pɛ, á Abiezɛɛrɛ a tanlɛ minin bíi, á ǹ kaa a kio.

³⁵ Á minin dia ǹ nə́ woo Manaasee tɔrɔn tumaa li. Á bɛn dɔn bíi á ǹ kaa a din kio. Bɛ kio, á minin dia Asɛɛrɛ tɔrɔn laanka Zabulɔn tɔrɔn li ka Nɛfutalii tɔrɔn nɛ, bɛn dɔn nə́ daa n ti a ganaa.

³⁶ Zediɔ̃ tɔ́n pɛ Lawa nɛ: «Bɛ̀ n tá li, n masɛ baa Izirayeli minin lɛn si ǹ zɔ́ɔn la wole lɛa, ka n bɛ́ ń pɛ lɔn,

³⁷ sère ki á ke a ka ná a ganaa, man die nyɔmiɛ̃ tán belee duwəə ǹ bǎã kɛ nɛ. Bɛ̀ pele pã sère ka lɛ dinsɔɔ̃ ganaa, tán kɛ tumaa goã gere, ma á re doɛ̃ ka bɛ nɛ, máa n tá li n ma baa Izirayeli minin lɛn si ǹ zɔ́ɔn la wole lɛa, ka n bɛ́ ń pɛ lɔn.»

³⁸ Bɛ nə́ n zɛnaa miɛ̃. A lɛawaa, Zediɔ̃ bɛ́ á yoo, á sère ka lɛ bɔɔ̃ á pele lɛ bɔ a nɛ, mu mi ǹ paãn piɛ̃.

³⁹ Zediɔ̃ wusoo á pɛ Lawa nɛ: – Masɛ n die boo goon dinsɔɔ̃ diɛ sisia kəni, n foo baran yoo masɛ li wa. Ma nə n nyankoe n toa ma wusoo ma ga sii giala li ka sère ka lɛ-n doo: «Sisia, ma nə n nyankoe, máa n toa sère ka lɛ dinsɔɔ̃ goã gere, tán kɛ tumaa pele baa.»

⁴⁰ Bɛa tèlò kɛ lɛ nɛ, Lawa zɛnaa miɛ̃. Sère ka lɛ dinsɔɔ̃ goã gere, tán kɛ tumaa pele baa.