Sii yɔrɔ-bɔlen 5 - LAWA A BOO SONBORE

Deboraa a loe

¹ Bɛa pinaa lɛ nɛ, Deboraa laanka Abinoamu a nɛgiĩ Baraki loe lɔ kɛnɛn:

² Izirayeli bɛ́ woe zia la, maǹ nə́ n là bɔ ǹ dinin-a, zaman nə́ n din kɔ lenlen, ka bɛa barka da Dɛnaa Lawa nɛ.

³ KIIN lɛn, ka n too kɔ, goledɛnan, ka n too kɔ! Man giɛ li mà loe lɔ, ma Dɛnaa Lawa tɔ bɔ nɛ. Man giɛ li ma Dɛnaa Lawa laakalaa, Izirayeli minin Lawa lɛ.

⁴ Dɛnaa Lawa, n bɛ́ ń bɔ Edɔmu gána nɛ ń daa, n bɛ́ ń gisĩ ń nə n bɔ Seyiiri kele kɛ la, tán bìn da, mu bɔ lon á kaa, la bɔ labaran nɛ á kaa.

⁵ Kelen nə́ bɔ ǹ nə́ kaa Dɛnaa Lawa yɔrɔ-a, Sinayii kele kɛ lɛ bɔ á mɛnaa Dɛnaa Lawa yɔrɔ-a, Izirayeli minin Lawa lɛ.

⁶ Anaati a nɛgiĩ Sangaara a biikoo li, Zayeli a biikoo li, minin nə́ zii tɔ we lɛ da, zii tɔ-wɔlen man zii lɛ boe bɛ̀ ǹ tɔn kiɛ̃.

⁷ Minin nə́ baa si ǹ nə́ ǹ kiwin toa, Izirayeli gána nɛ, ǹ nə́ kiwin toa. Yǎa ma din Deboraa a yoo ke, yǎa ma din a yoo ke, ka Izirayeli a náa bɛ́ lɔn.

⁸ Maǹ nə́ goã lawa tiin boe, bɛ lɛ nɛ, zia goã yui ǹ ganaa. Izirayeli giĩ duu pusi bii, á kaka n goóro laanka sɛmiɛ̃ yɛ ǹ gɔn.

⁹ Maa taasiɛ n kun ka Izirayeli minin kɛn nɛ, ka min mɛnɛn dɔn bɛ́ zaman lɛ bii, ǹ nə́ n dinin kɔ. Ka barka da Dɛnaa Lawa nɛ.

¹⁰ Kasɛn mɛnɛn bɛ́ ká dii dundun dan fufun la, kasɛn mɛnɛn bɛ́ giã-n tán mɔnaa sonboren la, kasɛn mɛnɛn dɔn bɛ́ zii tɔ we, ka n taasɛ.

¹¹ Tɔɔn-lɛduə̃lin bɛ́ ǹ tɔɔn goe mu ni, ǹ nə́ goã Dɛnaa Lawa a sii sonboren kɛn laakalɛɛ, a sii sonboren mɛnɛn zɛnaa Izirayeli gána nɛ, ka a din pàã nɛ. Bɛ lɛ n ke, Dɛnaa Lawa a minin nə́ woo kiwi a zaman paã ǹ bǎã nɛ.

¹² Yoo, Deboraa yoo! Yoo, yoo n loe da a nɛ. Abinoamu a nɛgiĩ yoo, yoo Baraki, n nə n minin waa, n nə ǹ bɔ bɛ̀rɛbaa nɛ.

¹³ Min mɛnɛn nə goã, bɛn nə́ woo n sɔkɔn goledɛnan li. Dɛnaa Lawa a zaman kɛ́ daa kun ma nɛ, min kakan kɛn bii.

¹⁴ Efrayimu tɔrɔn lɛn giala basa n boe Amalɛki. Bɛnzamɛn tɔrɔn nə́ mɛ ǹ kio, kun ka ǹ zia-baalin kɛn nɛ. Goledɛnan nə́ bɔ Makiiri tɔrɔn bii ǹ nə́ daa. Zia mìilandɛnan nə́ bɔ Zabulɔn tɔrɔn bii ǹ nə́ daa.

¹⁵ Isakaara tɔrɔn goledɛnan man kun ka Deboraa nɛ. Isakaara tɔrɔn man kun ka Baraki ni. Ǹ nə́ bɔ ǹ nə́ mɛ a kio nyankɔrɔ basa kɛ nɛ. Sɛnɛ, Urubɛn a tanlɛ minin kɛn man nə́ goã boo mɔnɛɛ kooro.

¹⁶ Wàa na á baa ká woo golee tɔɔn zàã li, ka tá n too koe tɔɔn-lɛduə̃lin lɛn li, ǹ tɔɔn bíi we. Urubɛn a tanlɛ minin kɛn man nə́ goã boo mɔnɛɛ kooro.

¹⁷ Galaati tɔrɔn nə́ giã Zurdɛ̃ tà kio. Dan tɔrɔn lɛn, wàa na á baa ká giã kaa mu la ǹ goon ne? Asɛɛrɛ tɔrɔn nə́ giã yìsi mu lɛ-a, ǹ nə́ giã ǹ goon golee ǹ bǎã nɛ.

¹⁸ Sɛnɛ, Zabulɔn tɔrɔn kɛn man minin lɛa, ǹ nə́ n la bɔ ǹ dinin ganaa, ǹ nə́ n dinin kɔ gɛ̀ la. A din goon ne ka Nɛfutalii tɔrɔn kɛn dɔn nɛ, ziabaa ǹ bǎã nɛ.

¹⁹ KIIN nə́ daa zia baa, Kanaan kii nə́ zia baa Tanaaki kiwi, Megidoo tà lɛ-a. Haalɛ wɔrɔ goone, ǹ saa zia la ǹ nə́ daa-n wa.

²⁰ Lon a leeren dɔn nə́ zia baa. Ǹ nə́ n toa ǹ kiɛ̃ ǹ zii la ǹ nə́ zia baa Sizeraa ganaa.

²¹ Kisɔn tà mu nə́ ǹ goa á kiɛ̃ ǹ nɛ, lɛlɛ lɛlɛ tà, Kisɔn tà mu lɛ. Maǹ tɔ we sisia, nyɛ́ɛ ná a ba ma ganaa wa.

²² Á ke sùin gòã wuu á boe, zia-baalin man baa la, baa la.

²³ Dɛnaa Lawa a lon a dia dí-a wole a boo ne: Ka lɛn baraa bíi Merozi kiwi kɛ li, ka lɛn baraa bíi a kiwi minin kɛn li. A giala, ǹ da n dɔ Dɛnaa Lawa lɛ wa, ǹ da n dɔ Dɛnaa Lawa laanka a zia mìilandɛnan kɛn lɛ wa.

²⁴ Lɔn bii, Lawa die a barka da Kenii tɔrɔ Ebɛɛrɛ a lɔ Zayeli ganaa. Mɔnaa kion lɔn tumaa bii, Lawa die a barka da asɛ lɛ ganaa.

²⁵ Sizeraa bɛ́ mà a mu kɔ, asɛ na á bɔ̀nyaa kɔ la, á nàari kɔ la min dadaran mu mi ǹ màn nɛ.

²⁶ Zayeli nə́ n gɔn dia á kiɛ saa, á dí-nyalin tutoarɛ dɔ saa a gusin ni. Á Sizeraa dɛ nɛ, á ná a mìi yu. Á yɔyɔrɛ, á ná a paragiala fɔ̃.

²⁷ Á n munu tán Zayeli giulun, á mɛnaa, á n lɛ bɔ tán, á mɛnaa á n lɛ bɔ tán a giulun. A mɛnaa bǎã mɛn nɛ, á n munu tán a giulun walan, á gã.

²⁸ A nə n toɛ kion n yii koe, Sizeraa a náa nə n toɛ kion n yii koe. «Wàa na á baa a ziabaa ǹ wotoro kɛ́ nyɔɔbaa kio pelo, wàa na á baa a ziabaa ǹ wotoron lɛn tá nyantoto kɛnɛn pelo?»

²⁹ A lɔn lɛn sii-dɔ̃li goon ná a lɛ si. A na á goã bɛ lɛ taasɛ a din gɔ́ɔ̃ nɛ á n pii:

³⁰ Kɔntan, maǹ màn yii zia kɛ la, ǹ nə́ gii kɔn: Nɛniɛ goon hinlaa paa zia-baali goon wɔ lɛa. Ǹ nə́ mɔnaa nyaǹ dɛnaa si zia la, Sizeraa wɔ lɛa, mɔnaa-wɔrɛɛ lɛa nyaǹ ná a ganaa, mɔnaa-wɔrɛɛ màn paa lɛa, gɔ̀lɔ̀ wɔ lɛa.

³¹ Dɛnaa Lawa, toa ǹ zɔ́ɔn lɛn tumaa gã ka Sizeraa wɔ kɛ bɛ́ lɔn. Sɛnɛ, toa ǹ giaáran lɛn tumaa goã ka wasa bɛ́ lɔn ka zereen a bɔ tán waáraa. Bɛ lɛ n ke gána lɛ goã susui la lɛ̀ pusi gɔ́ɔ̃ nɛ.