Sii yɔrɔ-bɔlen 3 - LAWA A BOO SONBORE

¹ Izirayeli minin mɛnɛn tumaa bɛ́ ǹ Kanaan gána a zian kɛn kɔn yɛ wa, Dɛnaa Lawa na á bɛa tɔrɔ lɛn toa walan, a tá ǹ diɛ ǹ gɔ́ɔ̃ li ni.

² A na á goã giɛ kɛ dinsɔɔ̃ li: Zia bɛ́ màn mɛn lɛa, Izirayeli tɔrɔn lɛn nɛnyaanan nə n daraa a ganaa ǹ dɔ̃, sanparɛ ǹ mɛnɛn lɛn dinin bɛ́ ǹ màn kɔn dɔ̃ zia a sii gɔ́ɔ̃-n lɛlɛ wa.

³ Bɛa tɔrɔn lɛn nə́ ke: Filisitin kii sooro kɛa gána minin manɛ, Kanaan gána minin tumaa nɛ, Sidɔn kiwi minin ni, ka Ivii tɔrɔn mɛnɛn bɛ́ ǹ nə́ goã giã-n Liban kelen kɛn la, a saa Baali-Ɛrmɔn kele ganaa a wo yǎa Lebo-Amaati kiwi a wɔ ǹ bǎã nɛ.

⁴ Dɛnaa Lawa na á bɛa tɔrɔn lɛn toa walan a tá n diɛ Izirayeli minin lɛn gɔ́ɔ̃ li ni, màn mɛn bɛ́ toɛ a dɔ̃, bɛ̀ ǹ tá re asɛ a gɔn waa ǹ boon kɛn tamaɛ, asɛ nə ǹ mɛnɛn lɛn kɔ Muizu la mà a ǹ kɔ ǹ digolon la.

⁵ Izirayeli minin lɛn nə́ giã kun ka Kanaan minin lɛn nɛ, Ɛti tɔrɔn nɛ, Amɔɔrɔ wɔn nɛ, Perɛzi wɔn nɛ, Ivii laanka Zebuzu tɔrɔn nɛ.

⁶ Ǹ nə́ bɛa tɔrɔn lɛn nɛlɔn goa lɔn lɛa, ǹ dɔn nə́ ǹ nɛlɔn kɔ bɛn nɛgiĩn la. Ǹ nə́ dí nya ǹ lawan manɛ.

Sii yɔrɔ-bɔlen Ɔtniyeli

⁷ Sii mɛn bɛ́ baraa Dɛnaa Lawa yii li, Izirayeli minin lɛn nə́ bɛ zɛnaa. Dɛnaa Lawa lɛ, ǹ Lawa lɛa, ǹ yiri bɔ ka bɛ nɛ, ǹ nə́ dí nya *Baalin manɛ, ka Aseeraan nɛ.

⁸ Bɛ lɛ nɛ, Dɛnaa Lawa foo yoo Izirayeli minin lɛn li, á ǹ kɔ Mezopotamiin kii Kusan-Risitayimu la. Izirayeli minin lɛn nə́ goã Kusan-Risitayimu a pàã giulun, lɛ̀ kiwisi gɔ́ɔ̃ nɛ.

⁹ Bɛ kio, ǹ nə́ n lɛ dɛ Dɛnaa Lawa ganaa. Dɛnaa Lawa dɔ́ kirisibaali bɔ á kɔ ǹ la, á ǹ kirisibaa. Bɛ n ka Kalɛbu ǹ diɛ̃ Kenaazi a nɛgiĩ Ɔtniyeli ni.

¹⁰ Dɛnaa Lawa yiri goã la, á goã Izirayeli minin lɛn sii yɔrɔ boe. Á woo zia baa, Dɛnaa Lawa Aramun kii Kusan-Risitayimu wɔ a gɔn, á boo Kusan-Risitayimu la.

¹¹ Gána lɛ tɔ́n goã susui la lɛ̀ pusi gɔ́ɔ̃ nɛ. Bɛ kio, Kenaazi a nɛgiĩ Ɔtniyeli gã.

Ewuudu

¹² Sii mɛn bɛ́ baraa Dɛnaa Lawa yii li, Izirayeli minin lɛn nə́ wusoo ǹ ná a giala kɔ, ǹ nə́ bɛ zɛnaa. Bɛ lɛ nɛ, Dɛnaa Lawa Moabun kii Egulɔn foo taã á da Izirayeli minin lɛn ganaa. A giala, ǹ goã sii mɛn zɛnɛɛ, bɛ na á goã baraa Dɛnaa Lawa yii li.

¹³ Egulɔn Amɔn tɔrɔ laanka Amalɛki tɔrɔn kaa kun ka a din ni, á woo zia baa Izirayeli minin lɛn ganaa. Ǹ nə́ Izirayeli minin lɛn dɛ, ǹ nə́ sèwo dan kiwi kɛ si.

¹⁴ Izirayeli minin lɛn nə́ bɛ̀rɛbaa ǹ dí nya Egulɔn nɛ lɛ̀ fulukiwisi gɔ́ɔ̃ nɛ.

¹⁵ Bɛ kio, Izirayeli minin lɛn nə́ n lɛ dɛ Dɛnaa Lawa ganaa. Dɛnaa Lawa dɔ́ kirisibaali bɔ á kɔ ǹ la. Bɛ n ka Geraa a nɛgiĩ Ewuudu ni. Bɛnzamɛn tɔrɔ nɛ, a na á goã gɔsɛ-a lɛa. Izirayeli minin lɛn ná asɛ dia ka bǐɛ̃baa ǹ mànan nɛ, mà a wo ǹ kɔ Moabun kii Egulɔn la.

¹⁶ Ewuudu gɔya sa kɔn zɛnaa, a lɛn paanan nə́ lɛ boe, a sasabaa n mɛtərə talɛɛ. Á bɛ lɛ da a mɔnaa giulun, a gusin a gisi ganaa.

¹⁷ Ewuudu dɔ, á bǐɛ̃baa ǹ mànan lɛn kɔ Moabun kii Egulɔn la. Egulɔn na á goã min kasiɛ̃ lɛa taãn-taãnɛ.

¹⁸ Ewuudu bɛ́ á bǐɛ̃baa ǹ mànan lɛn kɔ á nya lɔn, min mɛnɛn nə ǹ gũ ǹ nə́ daa ǹ nɛ, á woo bɛn da zii.

¹⁹ Sɛnɛ, a bɛ́ á dɔ dìn bǎã kɛ nɛ, kunu Gilgaali li, á n bɔyaa á woo pɛ kii-n kɛnɛn: «Kii ganaa, boo durii kɔn tá masɛ li ma pɛ n nɛ.» Kii tɔ́n pɛ a dí-nyalin manɛ mà ǹ soo ǹ nə ǹsɛn dininsɔɔ̃nɔn toa walan. Min mɛn tumaa goã kii li, bɛn nə́ soo kanaa.

²⁰ Ewuudu nə́ n zɔ̃ á dɔ Egulɔn li, bɛ̀ a n giã-n tán sanabolo nyantoto kɛ nɛ, ǹ mɛn lɛ bɛ́ a dinsɔɔ̃ a giã ǹ bǎã lɛa. Ewuudu tɔ́n pɛ nɛ: «Lawa a boo tá masɛ lɛ-n ma pɛ n nɛ.» Kii lɛ yoo á n bɔ a kii dankan la.

²¹ Ewuudu nə́ n gɔsɛ lɛ dia, á gɔya sa lɛ woɛ̃ a gusin a gisi ganaa, á dere kii nɔ̀ nɛ.

²² Gɔya lɛ a nàn nɛ, ka a yii ni, a tumaa wɔ, nyɔɔ yoo á n pɛnɛ gɔya nàn lɛ ganaa. A giala, Ewuudu gɔya sa lɛ woɛ̃ á bɔ kii nɔ̀-n wa. A na á fɔ̃ á soo a gòãn biin ni.

²³ Bɛ kio, á sanabolo lɛ a kiɛnlɛ kũ á tã lɛ á sɔɔ, a din soo ka kikio ne.

²⁴ Ewuudu bɛ́ á soo, kii a dí-nyalin nə́ daa ga. Ǹ nə́ sanabolo lɛ a kiɛnlɛn yɛ soɛ nɛ, ǹ nə́ tɔ́n pɛ mà ǹsɛn nə́ waa la, mà a na a gòɛrɛ koe kion nyantoto kɛ nɛ.

²⁵ Ǹ nə́ n yii da ǹ nə́ fɔ̃, a tɔn sanabolo lɛ a kiɛnlɛn buĩ wa. Ǹ dinin nə́ tɔ́n goo nɛ saa, ǹ nə́ kiɛnlɛ bũ, ǹ nə́ woo ǹ dɛnaagiĩ lɛ yaa, bɛ̀ á ke á gã, á n lɛ bɔ tán.

²⁶ Ǹ bɛ́ golee n yii diɛ foɛ̃ biikoo mɛn li, bɛ̀ Ewuudu dinmaa kɛ baa si, á dìn bǎã kɛ na, á n woe Seyira kiwi ganaa.

²⁷ A din dɔ walan lɔn, a na á bɛn pɛ Efrayimu a kele yii kɛ nɛ. Izirayeli minin lɛn nə́ gisĩ kun ni ǹ nə́ n bɔ kele lɛ la, a din nə́ ǹ nyɛɛnɛ.

²⁸ Á pɛ ǹ nɛ: Ka kɔ ma kio lɛ, a giala, Dɛnaa Lawa kaa zɔ́ɔ Moabu minin lɛn wɔ ka gɔn. Ǹ nə́ gisĩ, ǹ nə́ kɔ lɛ. Ǹ nə́ zii tã Moabu minin ganaa Zurdɛ̃ tà gòã nɛ, ǹ toa min kɔn kiɛ̃ wa.

²⁹ Bɛa biikoo li, ǹ nə́ Moabu minin lɛn dɛ, giĩ duu fù kɛ miã, ǹ tumaa min gegere, ǹ foo dɔ n tã. Ǹ kɔn nə n si á la wa.

³⁰ Bɛa pinaa kɛ lɛ nɛ, Izirayeli minin nə́ sìi da Moabu minin ganaa, gána lɛ tɔ́n goã susui la lɛ̀ pɔkiwisi gɔ́ɔ̃ nɛ.

Sangaara

³¹ Ewuudu kio na á n baa Anaati a nɛgiĩ Sangaara lɛa. Asɛ na á Filisiti minin lɛn giĩ biɛsɔrɔ dɛ ka diin lɛduə ǹ bàlà nɛ. A dɔ́ Izirayeli minin lɛn kirisibaa.