Sii yɔrɔ-bɔlen 21 - LAWA A BOO SONBORE

Bɛnzamɛn tɔrɔ koa

¹ Izirayeli minin lɛn man nə́ goã ǹ nə́ n liɛ Mispaa, ǹ nə́ pɛ mà ǹsɛn min kɔn ba re a nɛ koe Bɛnzamɛn tɔrɔ la lɔ lɛa doo wa.

² Zaman lɛ daa Betɛli, ǹ nə́ giã tán walan Lawa yɔrɔ-a, yǎa wasa woo mɛ. Ǹ nə́ n lɛ dɛ, ǹ nə́ wuu gole pɛ.

³ Maǹ nə́ goã pii: «E, Dɛnaa Lawa, wɔsɛn Izirayeli minin Lawa! A n siɛ lɔn pelo, tɔrɔ goon tá n boe wɔsɛn Izirayeli tɔrɔn lɛn lɛ?»

⁴ A lɛawaa, zaman lɛ yoo baayɛlɛ yiisoone, ǹ nə́ *wúlu bɔ ǹ bǎã dɔ walan, ǹ nə́ *wúlu màn tiɛ̃ laanka barka da Lawa nɛ ǹ wúlu bɔ.

⁵ Izirayeli minin lɛn nə́ pɛ: «Izirayeli tɔrɔn lɛn tumaa bii, tɔrɔ lɛ a mɛn na a da lɛsɔkɔn bǎã kɛ nɛ Dɛnaa Lawa yɔrɔ-a wa?» A giala, maǹ nə́ goã ǹ nə́ liɛ gole kɔn wɔ ǹ nə́ pɛ: «Bɛ̀ min mɛn da Dɛnaa Lawa li Mispaa wa, ǹ tá re bɛa dɛnaa dii a gã.»

⁶ Bɛnzamɛn tɔrɔn lɛn, Izirayeli minin lɛn dɔɔ̃nɔn lɛa, ǹ sii lɛ taasiɛ da Izirayeli minin lɛn ganaa. Bɛn nə́ tɔ́n pɛ: «Pelo, tɔrɔ goon nə ke a gialaa papaɛ̃ n boe Izirayeli tɔrɔn bii.

⁷ Min mɛnɛn bɛ́ goɛ̃, wɔ n die siɛ lɔn, wɔ tɔn lɔn yɛ, wɔ kɔ bɛn la? A giala, wɔ saalɛlɛ wɔ́ n liɛ ka Dɛnaa Lawa tɔ nɛ, wáa wɔ ba re wɔa nɛlɔn koe ǹ la lɔn lɛa wa.»

⁸ Ǹ nə́ tɔ́n nɔ̀n da: «Izirayeli tɔrɔn lɛn bii, min tan, a na a da Dɛnaa Lawa yɔrɔ-a Mispaa kiwi wa?» Bɛ á zɛnɛɛ, bɛ̀ Zabɛsi kiwi mɛn bɛ́ Galaati gána nɛ, bɛn min kɔn da lɛ-sɔkɔn bǎã lɛ-n wa.

⁹ Zaman lɛ bɛ́ á woo minin nimi ǹ bǎã lɛ nɛ, Zabɛsi kiwi mɛn bɛ́ Galaati gána nɛ, bɛn min goon goã walan wa.

¹⁰ Zaman lɛ min foo taãnaan duu fulupaa bɔ zia-baalin lɛn bii, ǹ nə́ ǹ dia walan, ǹ nə́ dí kɛ pɛ ǹ nɛ: «Ka woo, ka Galaati gána a kiwi Zabɛsi minin lɛn tumaa dɛ, lɔn laanka nɛnyaanan nɛ.

¹¹ Ka bɛ́ re sii mɛn zɛnɛɛ, bɛ n ka kɛ nɛ: Ka giĩn tumaa dɛ lenlen, ka lɔ mɛn tumaa bɛ́ á giĩ dɔ̃.»

¹² Zabɛsi kiwi minin lɛn bii Galaati gána nɛ, ǹ nə́ nɛniɛ biɛsii (400) yɛ, ǹ mɛnɛn bɛ́ ǹ tɔn giĩ dɔ̃ wa. Ǹ nə́ bɛn kũ ǹ nə́ woo ǹ ne ǹ giã ǹ bǎã nɛ Siiloo, Kanaan gána nɛ.

¹³ Bɛ kio, zaman lɛ tumaa minin dia Bɛnzamɛn tɔrɔn lɛn li Irimɔn a gɛ̀fu bǎã kɛ nɛ, mà ǹ wo là nyantoro boo da ǹ nɛ.

¹⁴ Bɛa waáraa kɛ lɛ nɛ, Bɛnzamɛn tɔrɔn lɛn nə́ n bɔyaa ǹ nə́ daa. Ǹ lɔn mɛnɛn yii toa koo Zabɛsi kiwi, Galaati gána nɛ, ǹ nə́ bɛn lɛn kɔ ǹ la lɔn lɛa. Sɛnɛ, a yɛ á dɔ ǹ tumaa-a wa.

¹⁵ Bɛnzamɛn tɔrɔn lɛn sii na á goã taasiɛ diɛ zaman lɛ ganaa, a giala, Dɛnaa Lawa màn bɔ Izirayeli tɔrɔn lɛn bii.

¹⁶ Zaman lɛ a min golen nə́ tɔ́n pɛ kɔn nɛ: «Ǹ bɛ́ ǹ nə́ Bɛnzamɛn tɔrɔn lɔn lɛn dɛ, wɔsɛn man die wàa zɛnɛɛ, màn mɛn bɛ́ toɛ, min mɛnɛn nə goã, bɛn dɔn nə lɔn yɛ?

¹⁷ Bɛnzamɛn tɔrɔn mɛnɛn nə la, ǹ dɔn doamaa nɛ, ǹ nə n tɔrɔ koa, màn mɛn bɛ́ toɛ, tɔrɔ goon baran papaã a n bɔ Izirayeli tɔrɔn lɛn bii wa.

¹⁸ Sɛnɛ, wɔsɛn dininmaan bɛ́ wɔ a boe la, wɔ wɔa nɛlɔn kɔ ǹ la lɔn lɛa wa. A giala, Izirayeli minin lɛn man nə́ goã ǹ nə́ n liɛ mà bɛ̀ min mɛn ná a nɛlɔ kɔ Bɛnzamɛn tɔrɔ min la lɔ lɛa, bɔ̀n die a bɛa dɛnaa yɛ.»

¹⁹ Ǹ nə́ tɔ́n pɛ: «Dɛnaa Lawa a zɔ́n tá n zɛnɛɛ Siiloo lɛ̀ woo lɛ̀, Betɛli a gɔsɛ a lɛ̀gɔn la.» Zii mɛn bɛ́ boe Betɛli á n woe Sisɛmu, a n bɛa lɛ̀nyɛɛn gɔn la, Lebonaa kiwi a gusin a lɛ̀gɔn la.

²⁰ Ǹ nə́ tɔ́n pɛ Bɛnzamɛn tɔrɔn lɛn manɛ: – Ka wo n duru *rezɛ̃ da wurun kɛn nɛ.

²¹ Ka die ka ga, bɛ̀ ka Siiloo nɛlɔn kɛn yɛ, ǹ nə́ soo ǹ nə́ bɛ̀ biɛ kun, ka soo rezɛ̃ da wurun lɛn nɛ, didie goon kũ ǹ bii, a wo-n Bɛnzamɛn tɔrɔn gána nɛ, a baa a lɔ lɛa.

²² Bɛ̀ ǹ díin hinlaa ǹ dɔɔ̃nɔn nə́ daa bɛa zia da wɔ ganaa, wɔ á re pii ǹ ni kɛnɛn: «Ka bǐɛ̃ kɔ ka ǹ toa ǹ gɔn, a giala, wɔsɛn nə boo la, wɔ́ lɔ saa wɔ gogoonmaa wɔ lɛa, zia lɛ a biikoo li wa. Ka bɛ dɔ nɛ, ka dininmaan dɔn bɛ́ ka a boe la, ka kaa nɛlɔn kɔ Bɛnzamɛn tɔrɔn lɛn la lɔn lɛa wa. Bɛ̀ ka bɛ zɛnaa, ka dinin zɛ̀rɛ nɛ.»

²³ Bɛnzamɛn tɔrɔn lɛn nə́ zɛnaa miɛ̃. Ǹ dinin lɛ bɛ́ lɔn, ǹ gogoonmaa lɔ bɛ̀-baali lɛ a goon saa á nɔmɔ a ganaa. Ǹ nə́ wusoo ǹ nə́ woo ǹ bǎã nɛ, ǹ nə́ ǹ kiwin lɛn dɔ, ǹ nə́ giã ǹ nɛ.

²⁴ Bɛa waáraa lɛ nɛ, Izirayeli minin lɛn tumaa sawaa ǹ nə́ n bɔ walan. Didie woo a tɔrɔ minin li, a tanlɛ minin li. Didie nə́ n toa walan á woo giã a bǎã nɛ.

²⁵ Bɛa waáraa kɛ lɛ nɛ, kii goã Izirayeli minin lɛn mìi la wa, didie na á goã a din foo sii zɛnɛɛ.