Sii yɔrɔ-bɔlen 18 - LAWA A BOO SONBORE

Dan tɔrɔn man giɛ giã ǹ bǎã li

¹ Bɛa waáraa kɛ lɛ nɛ, kii goã Izirayeli minin lɛn mìi la wa. Bɛa biikoo li, Dan tɔrɔn man nə́ goã giɛ giã ǹ bǎã li. A giala, á woo dɔ bɛa biikoo lɛ ganaa, bɛ̀ ǹ tɔn giã ǹ bǎã yɛ Izirayeli minin lɛn bii, ǹ dinin wɔ lɛa wa.

² Dan tɔrɔn lɛn nə́ n toa Soreya laanka Ɛsitawɔli kiwi, ǹ nə́ ǹ dinin tanlɛ min sooro foo taãnaan dia, mà ǹ wo ga gána lɛ ganaa taãn-taãnɛ ǹ dɔ̃. Maǹ nə́ pɛ ǹ nɛ kɛnɛn: «Ka wo ga gána lɛ ganaa taãn-taãnɛ ka dɔ̃.» Giĩ sooro lɛ dɔ Miikaa a piɛ Efrayimu a kele yii bǎãn kɛn nɛ, ǹ nə́ waa walan.

³ Ǹ dinin bɛ́ ǹ nə́ diri Miikaa a kion la lɔn, ǹ nə́ Levii tɔntɔraa lɛ sɛ lɛn dɔ̃. Ǹ nə́ n zɔ̃ ǹ nə́ dɔ a li, ǹ nə́ nɔ̀n da la: «Die na á daa n nɛ kànaa? Ma n wàa mɛn zɛnɛɛ bǎã kɛ nɛ? Wàa mɛn nə kurii n koɛ kànaa?»

⁴ Á ǹ lɛ si: «Miikaa na á sii kɛ laanka sii kɛ zɛnaa masɛ nɛ. A n saraa koe masɛ la, ma na a wúlu-bɔle lɛa.»

⁵ Ǹ nə́ tɔ́n pɛ nɛ: «A bɛ́ miɛ̃, nɔ̀n da Lawa la, màn mɛn bɛ́ toɛ, wɔsɛn bɛ́ zii tɔ mɛn we, bɛ̀ á re bǐɛ̃ koe, wɔ dɔ̃.»

⁶ Wúlu-bɔle lɛ tɔ́n pɛ ǹ nɛ: «Ka wo ka là nyantoro ne. Ka bɛ́ zii tɔ mɛn we, Dɛnaa Lawa á re miɛ ka nyɛɛnɛ!»

⁷ Giĩ min sooro lɛ woo Layisi kiwi. Min mɛnɛn bɛ́ giã-n walan, ǹ nə́ yɛ mà bɛn man yii-nyɛɛ gɔ́ɔ̃ nɛ, ka Sidɔn minin kɛn bɛ́ lɔn. Maǹ là nyantoro la, ǹ yiri n bǎã goon ne. Min kɔn goã gána lɛ gɔ́ɔ̃ nɛ, pàã n bɛ gɔn, a n fuu nyɛɛ ǹ nɛ ka yɔrɔ kɔn nɛ wa. Layisi minin lɛn bǎã goã sɔsɔɔ Sidɔn minin lɛn ganaa, ǹ sii goã min kɔn wɔ gɔ́ɔ̃-n wa.

⁸ Giĩ min sooro lɛ nə́ n bɔyaa, ǹ nə́ daa ǹ dɔɔ̃nɔn lɛn li Soreya laanka Ɛsitawɔli kiwi. Ǹ dɔɔ̃nɔn lɛn nə́ nɔ̀n da ǹ la mà maǹ wàa taasɛ gána lɛ wɔ paǹ li?

⁹ Ǹ nə́ ǹ lɛ si: «Ka yoo wɔ n tá ǹ gialaa, a giala, wɔsɛn nə́ gána lɛ yɛ. Á ke, gána kɔɔ̃n kɔɔ̃n nɛ. Ka n tɔn tán kiĩni, ka n kaa boo kɔn diɛ wa? Ka baran giã tán ka n saa yoo-baa li, ka n ka a yui woe gána lɛ kuĩ, ka n biɛ kaa wɔ lɛa wa.

¹⁰ Bɛ̀ ká wɔ gána lɛ nɛ ǹ mɛn waáraa, ka á re woe a minin yiɛ yii-nyɛɛ gɔ́ɔ̃ nɛ. Gána lɛ á gole a paǹ tumaa li, Lawa wɔ ka gɔn. Màn mɛn tumaa bɛ́ tán la, bɛ kɔn wɛɛ̃ ba bɛa bǎã kɛ lɛ-n wa.»

¹¹ Dan tɔrɔn lɛn min biɛ sɔrɔ tɔ́n yoo walan, Soreya laanka Ɛsitawɔli kiwi, ǹ nə́ woo ka ǹ ziabaa ǹ mànan nɛ ǹ gɔn.

¹² Ǹ nə́ woo kɔn paã Yarimu kiwi a lɛ̀nyɛɛn gɔn la, Zudaa gána nɛ. Bɛ lɛ na á toa, ǹ tá bɛa bǎã lɛ bíi haalɛ tɔn pelo, mà Dan tɔrɔn giã ǹ bǎã.

¹³ Ǹ nə́ n toa walan ǹ nə́ woo Efrayimu a kele yii bǎãn kɛn nɛ, ǹ nə́ dɔ Miikaa a piɛ.

¹⁴ Giĩ min sooro mɛn goã ǹ nə́ woo ga Layisi kiwi lɛ ganaa, bɛn nə́ pɛ ǹ dɔɔ̃nɔn lɛn manɛ: «Dì dí nya ǹ mɔnaa laanka kion lɛduə̃ ǹ dìn tá kionən kɛn lɛn goon ne. Ka tá bɛ doɛ̃ ke? Ka doamaa bɛ́ nɛ, ka sii mɛn zɛnaa kanna, bɛ n ka dinin ganaa.»

¹⁵ Ǹ nə́ tele bɛa bǎã lɛ ganaa, ǹ nə́ wɔ Levii tɔrɔ tɔntɔraa lɛ a kion Miikaa a piɛ, ǹ nə́ nɔ̀n da la mà là nyantoro tá a lon?

¹⁶ Bɛ á zɛnɛɛ bɛ̀ Dan tɔrɔ min biɛ sɔrɔ (600) lɛ á doa-n kiɛnlɛ-a, ka ǹ ziabaa ǹ mànan nə́ ǹ gɔn.

¹⁷ Giĩ min sooro mɛn goã ǹ nə́ woo ga gána lɛ ganaa, bɛn nə́ wɔ kion lɛ nɛ, ǹ nə́ dì lɛ laanka a dí nya ǹ mɔnaa lɛ saa, ka kion lɛduə̃ ǹ dìn lɛn nɛ. Bɛa biikoo li, bɛ̀ wúlu-bɔle lɛ á golee-n kiɛnlɛ-a, kun ka giĩ biɛ sɔrɔ lɛ nɛ, ǹ ziabaa ǹ mànan nə́ ǹ gɔn.

¹⁸ Min mɛnɛn lɛn bɛ́ ǹ nə́ wɔ Miikaa a kion, ǹ nə́ dì lɛ laanka a dí nya ǹ mɔnaa lɛ saa, ka kion lɛduə̃ ǹ dìn lɛn nɛ, wúlu-bɔle lɛ nɔ̀n da bɛn la mà maǹ wàa zɛnɛɛ kànaa?

¹⁹ Ǹ nə́ tɔ́n pɛ nɛ: «N lɛ tã, n baran n lɛ tɔ boo-n doo wa. Kiɛ̃ n nə n tá kun ka wɔsɛn nɛ, n nə n baa wɔsɛn díi laanka wɔa wúlu-bɔle lɛa. N goã giĩ goon a wúlu-bɔle lɛa, hinlaa tɔrɔ laanka tanlɛ goon a minin wúlu-bɔle lɛa Izirayeli gána nɛ, ǹ mɛn nə soɛ?»

²⁰ Boo lɛ wúlu-bɔle lɛ foo kɔɔ̃n kɔ. Á dì dí nya ǹ mɔnaa lɛ laanka kion lɛduə̃ ǹ dìn lɛn goa, á n dɔ zaman lɛ bii.

²¹ Bɛ kio, Dan minin lɛn nə́ wusoo ǹ nə́ zii saa, ǹ nə́ ǹ nɛnyaanan kaa ǹ nyɛɛnɛ, ǹ tɔɔn nɛ ka ǹ mànan nɛ, ǹ nə́ woo.

²² Min mɛnɛn bɛ́ Miikaa miãkɛnɛn lɛa, bɛn laan bɛ̀ maǹ lɛ diɛ kɔn la, ǹ nə́ ǹ kio lui, bɛ̀ Dan tɔrɔn lɛn wɔlɔ lui Miikaa a piɛ ganaa.

²³ Ǹ nə́ lɛ dia Dan tɔrɔn lɛn la kɔsɛkɔsɛ. Bɛn nə́ n yɔrɔ bɔyaa ǹ nə́ pɛ Miikaa nɛ: «Minin kɛn n nə́ ǹ sɔkɔn, wàa na á baa?»

²⁴ Miikaa nə́ ǹ lɛ si: «Ma bɛ́ má dìn mɛnɛn zɛnaa, ka n ká bɛn goa, ká maa wúlu-bɔle dɔ kũ ka woo ne. Wàa mɛn nə goɛ̃ masɛ gɔn kəni? A n siɛ lɔn ka á nɔ̀n diɛ ma la, ka n pii mà wàa na á baa.»

²⁵ Dan tɔrɔn lɛn nə́ tɔ́n pɛ nɛ: «Wɔ baran boo ma n lɛ-n doo wa dɛ! Bɛ bie wa, minin tá re yui ka ǹ foo ne, ǹ kaa n la ǹ nə n dɛ taãn-taãnɛ, n din laanka n kion minin nyin tá ka a goã a nɛ.»

²⁶ Dan tɔrɔn lɛn nə́ kiɛ̃ ka ǹ zii ni. Miikaa bɛ́ á yɛ, mà ǹ pàã la asɛ nɛ, á n lɛ goa á woo piɛ.

Dan kiwi laanka dì guguru kɔ ǹ bǎã

²⁷ Miikaa mànan mɛnɛn zɛnaa, ka wúlu-bɔle mɛn dɔ bɛ́ á goã a dí nyɛɛ, Dan tɔrɔn lɛn sɛn nə́ woo ka bɛn nɛ. Ǹ nə́ daa Layisi minin gialaa, bɛn mɛnɛn bɛ́ là nyantoro gɔ́ɔ̃ nɛ, ǹ yiri n bǎã goon ne. Ǹ nə́ Layisi minin lɛn dɛ, ǹ nə́ tɛ da ǹ kiwi lɛ ganaa.

²⁸ Layisi kiwi lɛ na á goã Bɛti-Rehɔbu a nyankɔrɔ basa kɛ nɛ, a wɔlɔ n lui-n Sidɔn kiwi ganaa. A minin lɛn wɔ goã min kɔn wɔ gɔ́ɔ̃-n wa. Bɛ lɛ n ke min kɔn yɛ, á daa ǹ si á ǹ kaa wa. Dan minin nə́ wusoo ǹ nə́ kiwi lɛ dɔ, ǹ nə́ giã a nɛ.

²⁹ Ǹ nə́ kiwi lɛ tɔ bɔyaa, ǹ nə́ bíi mà Dan, a kɔnpɛ ka ǹ digolo Dan tɔ nɛ, bɛ mɛn bɛ́ á goã Zakɔba a nɛgiĩ lɛa. Bɛ bie wa lɛlɛ, kiwi lɛ tɔ na á goã Layisi.

³⁰ Dan tɔrɔ lɛn nə́ Miikaa a dì lɛ doa. Gɛrsɛmu a nɛgiĩ Zonatan mɛn bɛ́ Muizu a nɔ̀ɔn lɛa, bɛ́ Dan tɔrɔn lɛn wúlu-bɔle baa. Bɛa dì lɛ na á goã Zonatan tɔrɔn gɔn miɛ̃, yǎa á daa dɔ gána lɛ a minin goa ganaa, ǹ nə́ woo ǹ ne bǎã kɔsɔ nɛ.

³¹ Miikaa màn nyín mɛn zɛnaa, ǹ nə́ bɛ lɛ doa ǹ dinin wɔ lɛa. Lawa a kion kɛ goã Siiloo á dɔ biikoo mɛn ganaa, dì lɛ dɔ na á goã walan miɛ̃.