Sii yɔrɔ-bɔlen 13 - LAWA A BOO SONBORE

Sansɔn a yɛ boo

¹ Sii mɛn bɛ́ baraa Dɛnaa Lawa yii li, Izirayeli minin lɛn nə́ wusoo ǹ ná a giala kɔ, ǹ nə́ bɛ zɛnaa. Bɛ lɛ nɛ, Dɛnaa Lawa nə́ ǹ wɔ Filisiti minin gɔn lɛ̀ pusi gɔ́ɔ̃ nɛ.

² Giĩ goon na á goã Soreya kiwi, a tɔ n Manoa. Dan a tanlɛ minin kɛn goon ne. A lɔ na á goã kùnu lɛa, nɛ goã a lon wa.

³ Dɛnaa Lawa a lon a dia dí-a wole nə́ n din nyaa bɛa lɔ lɛ nɛ, á pɛ nɛ: «Ma á doɛ̃ máa n tá kùnu lɛa, nɛ ná a ba n lon wa. Sɛnɛ, n tá re nɔ̀ sii, n nɛgiĩ yɛ.

⁴ A kũ sisia ganaa, n din kũ, n baran duvɛ̃ mi wa, n baran yɔ kakaarɛ kɛ kɔn mi wa. N nyan toa n màn gɔgɔrɛ kɔn wɔ n lɛ-n wa.

⁵ A giala, n tá re nɔ̀ sii, n nɛgiĩ yɛ. Kùn ba re n diɛ nɛ lɛ mìi-n wa, a giala, a toa ǹ dan gɔ́ɔ̃-n gɔrɔ, bɛa nɛginin kɛ lɛ n die goɛ̃ Lawa wɔ lɛa. A din lɛ n die a giala koe, a Izirayeli minin lɛn si Filisiti minin lɛn la.»

⁶ Bɛ kio, lɔ lɛ woo piɛ, á pɛ ǹ zuũ ni: Lawa a min goon daa masɛ li pelo, a n boe-n kɔn li Lawa a lon a dia dí-a wole ne. Á nyɛ́ɛ diɛ á la yii ni. Má nɔ̀n da la ka a bɔ ǹ bǎã-n wa a dɔ nə n tɔ pɛ ma-n wa.

⁷ Sɛnɛ, a na á pɛ ma-n kɛnɛn: Á ke, n tá re nɔ̀ sii n nɛgiĩ yɛ. A kù sisia ganaa, n baran yɔ mi wa, n baran yɔ kakaarɛ kɔn mi wa, n nyan màn gɔgɔrɛ kɔn wɔ n lɛ n wa. A giala, a tɔa ǹ dan gɔ́ɔ̃-n gɔrɔ, nɛginin lɛ n die goɛ̃ Lawa wɔ lɛa yǎa a woe kiɛ a gɛ̀ lɛ.

⁸ Manoa tɔn Dɛnaa Lawa nyankɔ á pɛ: Dɛnaa Lawa, bɛ̀ nɛginin lɛ yɛ, wɔ doamaa bɛ nɛ wɔ sii mɛn zɛnaa nɛ, wusoo n Lawa a min lɛ dia a da bɛ nyaa wɔsɛn manɛ.

⁹ Lawa Manoa a nyankɔ lɛ si: Lawa a lon a dia dí-a wole lɛ wusoo á woo lɔ lɛ li. Bɛ á zɛnɛɛ, bɛ̀ a n giã-n tán wuru-n, bɛ̀ ǹ zuũ Manoa ba a li wa.

¹⁰ A din bǎã-n gɔrɔ, lɔ lɛ baa si á pɛ ǹ zuũ ni: Giĩ kɛ lɛ á daa ma li bɛa pinaa, á ke á n din nyaa ma nɛ.

¹¹ Manoa yoo, á kɔ a lɔ lɛ lɛ, á woo giĩ lɛ li, á nɔ̀n da la mà a din ni á boo da ka lɔ kɛ nɛ? Á ná a lɛ si mà asɛ din lɛ nɛ.

¹² Manoa wusoo á nɔ̀n da la: «Sisia, bɛ̀ n da ǹ boon lɛn lɛ pã, wɔsɛn doamaa nɛ wɔ giã ǹ gɔn mɛn saa nɛginin lɛ wɔ paǹ li, wɔ doamaa nɛ, wɔ sii mɛn zɛnaa a wɔ paǹ li?»

¹³ Dɛnaa Lawa a lon a dia dí-a wole lɛ tɔ́n pɛ Manoa nɛ: «Ma pɛ lɔ lɛ nɛ máa a n bɔ màn mɛn tumaa wɔlɔ li, a n bɔ bɛn lɛn wɔlɔ li.

¹⁴ Màn woo màn, ǹ tá zɛnɛɛ ka *rezɛ̃ da kɛa nɛ nɛ, a nyan toa a bɛ kɔn wɔ a lɛ-n wa. A baran duvɛ̃ mi wa, a baran yɔ kakaarɛ kɔn mi wa. A baran màn gɔgɔrɛ kɔn bii wa. Ma màn mɛn tumaa pɛ nɛ, a doamaa nɛ a kɔ bɛ lɛ lɛ.»

¹⁵ Manoa wusoo á pɛ Dɛnaa Lawa a lon a dia dí-a wole lɛ nɛ: «Bǐɛ̃ kɔ n nə n yii da wɔsɛn la, n toa wɔsɛn nə bòe banɛɛ kɔn dɛ, wɔ kɔrɛ wɔ kɔ n la.»

¹⁶ Lon a dia dí-a wole lɛ Manoa lɛ si kɛnɛn: «Ta ń masɛ kurəə, ma a re n màn bii wa. Sɛnɛ, bɛ̀ n tá li n baa *wúlu màn tiɛ̃ lɛa, bɛ kɔ Dɛnaa Lawa la.» A giala, Manoa goã doɛ̃, mà Dɛnaa Lawa a lon a dia dí-a wole-n wa.

¹⁷ Manoa tɔ́n nɔ̀n da la kɛnɛn: N tɔ n die? N tɔ pɛ masɛ nɛ, màn mɛn bɛ́ toɛ, bɛ̀ n da ǹ boon lɛn sii nə́ n zɛnaa, wɔ boo la wɔ n guguru kɔ.

¹⁸ Dɛnaa Lawa a lon a dia dí-a wole lɛ pɛ nɛ: Wàa na á baa, n tá nɔ̀n diɛ ka ma tɔ nɛ? Ta má pɛ n nɛ, n ba re a giala miɛ wa.

¹⁹ Manoa bòe banɛɛ lɛ saa, ka Lawa gɔ ǹ màn kɛ dɔ nɛ, á woo ǹ kaa tán gɛ̀fu la Dɛnaa Lawa wɔ lɛa, asɛ mɛn a zɛnaa ǹ sii bɛ́ kaãbaa diɛ. Manoa laanka a lɔ goã golee ne, ǹ nə́ giɛ.

²⁰ Ǹ nə́ tɛ buə̃ yɛ, yui *wúlu bɔ ǹ bǎã lɛ nɛ, á n woe lon. Dɛnaa Lawa a lon a dia dí-a wole dɔ́ dii á woo lon, wúlu bɔ ǹ bǎã lɛ a tɛbuə̃ lɛ bii. Manoa laanka a lɔ bɛ́ ǹ nə́ bɛ yɛ, ǹ nə́ bɔ ǹ nə́ kaa ǹ yɔrɔ la tán.

²¹ A saa bɛ lɛ-a lɔn, Dɛnaa Lawa a lon a dia dí-a wole lɛ nə n din nyaa Manoa laanka a lɔ-n doo wa. Manoa dɔ̃ ka bɛ lɛ nɛ, mà Dɛnaa Lawa a lon a dia dí-a wole ne.

²² Manoa tɔ́n pɛ a lɔ nɛ: «Wɔsɛn man die giɛ̃, bɛa sàabaa banban. A giala, wɔ́ Lawa yɛ ka wɔ yii ni.»

²³ A lɔ lɛ tɔ́n pɛ nɛ: «Bɛ̀ Dɛnaa Lawa n giɛ li a wɔ dɛ wɔ gã, bɛ̀ a re wúlu màn tiɛ̃ kɛ laanka gɔ ǹ màn kɛ sii wɔ gɔn wa. Bɛ̀ a re kɛ tumaa nyɛɛ wɔsɛn man wa, bɛ̀ a re doree kɛ miã koe wɔ la biikoo kɛ gɔ́ɔ̃-n wa.»

²⁴ Lɔ lɛ nɛ yɛ, a ná a tɔ kɔ Sansɔn. Nɛginin lɛ gole kɔ, Dɛnaa Lawa barka da a ganaa.

²⁵ Dan minin giã ǹ bǎã kɛ nɛ, Soreya laanka Ɛsitawɔli bii, bɛa bǎã lɛ nɛ, Dɛnaa Lawa Yiri ná a giala kɔ á dí nya Sansɔn ganaa.