Izayii 9 - LAWA A BOO SONBORE

¹ Tɔrɔ mɛn nə́ ke tɔ we wɔlɔ tì li, bɛ á re wɔlɔ fúlu gole yii. Min mɛnɛn bɛ́ gána tì bibiri ni, wɔlɔ fúlu á re boe bɛn manɛ.

² Dɛnaa Lawa, n nə́ ǹ kã ka foo kɔɔ̃nbaa nɛ, ǹ foo kɔɔ̃n kɔ á la yii ni. Maǹ nə n nyɛnyɛɛ n yɔrɔ-a, ka ǹ bɛ́ n nyɛnyɛɛ kaa-piɛ waáraa lɔn. Maǹ foo kɔɔ̃nbaa ǹ lɛ dii, ka ǹ bɛ́ bɔ zia la ǹ mànan gii lɔn.

³ Sonbore, zǔu mɛn goã n zaman wìi li, n goã ǹ dii ka dɔ̀rɔ̀n mɛnɛn nɛ, ka sɛ̌nɛn kɛn nɛ ń goã ǹ duwii ni, ń bɛn yiyiɛ, ka n bɛ́ n gɔ̀lɔ̀baa yɛ Madiã minin la lɔn lɛlɛ.

⁴ Zɔ́ɔn gòã ganaa ǹ kɔsɔn kɛn bìn diɛ tán ganaa, ka mɔnaan kɛn nɛ mà lɛa, bɛn tá re n zuĩ tɛ buə ne tɛ á re ǹ tumaa kuĩ.

⁵ A giala, nɛnyaan tiɛɛ̃n na á yɛ, nɛginin ni, wɔa wɔ lɛa. Kiibaa nə́ n kɔ la. A tɔ n die goɛ̃: Doroo wole sonbore, Lawa Pàãyiidɛnaa, Díi lɛa, yǎa duduu, là nyantoro kii.

⁶ A kiibaa n die gole koe. Là nyantoro mɛn bɛ́ duduu wɔ lɛa, a n die bɛ koe a zaman la. A n die giɛ̃ Davida a kii dankan la, a giã a gána mìi la. A kũ sisia ganaa yǎa duduu, a n die pàã we a gána nɛ, a kaka kɔ, peperebaa laanka sonborebaa barka nɛ. Dɛnaa Lawa Pàãyiidɛnaa a miãgoã-bɔ kɛ n diɛ bɛ a zɛnɛɛ ganaa.

Dɛnaa Lawa foo yoo Izirayeli gána li

⁷ Dɛnaa boo da Zakɔba tɔrɔn ganaa, bɛa boo lɛ mɛ Izirayeli gána la.

⁸ Zaman tumaa tá a siére-a, Efrayimu ni ka Samarii minin ni. Maǹ nə́ goã pii ka din koa laanka din gole kɔ-n kɛnɛn:

⁹ «Tii toopaa kungɔn kaa, sɛnɛ wɔsɛn man die doe ká kɔlɔ-sɛlɛɛ toopaa nɛ. Mɛnɛn kɛn gɔn kooro lɛa, bɛn nə́ yiyiɛ, sɛnɛ wɔ n die ǹ lonkoe ka *sɛdrə mɛnɛn nɛ.»

¹⁰ Bɛ lɛ nɛ, minin kɛn Resini a zɔ́ɔn lɛa, Dɛnaa Lawa bɛn kaa Izirayeli minin ganaa. Á pàã kɔ ǹ zɔ́ɔn la,

¹¹ Siirii minin manə ǹ nyɛɛnɛ, Filisiti minin manə ǹ kio. Ǹ nə́ Izirayeli gána ziziɛ̃ lenlen. Sɛnɛ, bɛ tumaa kio, Dɛnaa Lawa a foo-yoo tɔn nya wa, a gɔn-munii n tɔn lon.

¹² Dɛnaa Lawa Izirayeli zaman dɛ. Sɛnɛ, bɛ tumaa kio, Izirayeli nə n bɔyaa á daa Dɛnaa Lawa Pàãyiidɛnaa li wa.

¹³ Bɛ lɛ nɛ, lɛawaa goon gɔ́ɔ̃ nɛ, Dɛnaa Lawa Izirayeli gána mìi laanka a mui kuru.

¹⁴ Min golen laanka kiãn man a mìi lɛa, Lawa a boo gii-dali soɛ-bɔlen kɛn man a mui lɛa.

¹⁵ Gána lɛ a nyɛɛnaandɛnan nə́ ǹ zaman sã, ǹ bɛ́ min mɛnɛn nyɛɛnɛ, ǹ nə́ bɛn bɔ̀n baa.

¹⁶ Bɛ lɛ taman yii, Dɛnaa foo a kɔɔ̃nɛ ǹ nɛ tenən li wa, a makara boe ǹ nɛ toenen laanka ǹ lɔ giɔɔrɔn ganaa wa. A giala, ǹ tumaa gɔ́ɔ̃ n tì, sii baraa-zɛnaalin lɛa. Ǹ lɛ gɔ́ɔ̃ ǹ boo tumaa n kɔɔsɛ. Sɛnɛ, Dɛnaa Lawa a foo yoo tɔn nya wa, a gɔn-munii n tɔn lon.

¹⁷ Sonbore, baraabaa n kuĩ ka tɛ bɛ́ lɔn, a n nyan tɔrɔ tumaa kuĩ daã gòã li ǹ da bisin tumaa nɛ, a tɛmaa n dii lon kurukuru.

¹⁸ Dɛnaa Lawa Pàãyiidɛnaa a foo-yoo gole taman yii, gána lɛ n kuĩ tɛ lɛa, a n ka tɛ n zaman lɛ kuĩ, min kɔn ba ǹ dɔɔ̃n makara doɛ̃ wa.

¹⁹ Maǹ pɔrɛɛ gusin, ǹ bòo dɔ a nyɛɛ wa. Maǹ pɔrɛɛ gɔsɛ, sɛnɛ ǹ ba kiɛ̃ wa. Didie n yui ǹ dɔɔ̃n gialaa:

²⁰ Manaasee tɔrɔn man yui Efrayimu tɔrɔn gialaa, Efrayimu tɔrɔn man yui Manaasee tɔrɔn gialaa. Ǹsɛn tɔrɔ màn paa kɛ sɛ n piɛ̃ Zudaa tɔrɔn ganaa. Sɛnɛ, bɛ tumaa kio, Dɛnaa Lawa a foo-yoo tɔn nya wa, a gɔn-munii n tɔn lon.