Izayii 63 - LAWA A BOO SONBORE

Dɛnaa Lawa n kiri we tɔrɔn ganaa

¹ Die n ke boe Edɔmu gána nɛ, boe a kiwi Bozira kɛ nɛ? Á mɔnaa tãtãn wɔ. Á mɔnaa sonboren wɔ, a n tɔ we ka din narɛɛ nɛ, a foo n doa nɛ a din ganaa. Dɛnaa Lawa pɛ: «Ma din ni kiri pepere we. Pàã tá ma lon ma ka kirisibaa.»

² Wàa na á baa n dɔnkɛn nə́ tataã. Wàa nɛ n mɔnaan tá ka rezɛ̃ tɔrɛ wole a mɔnaan manɛ.

³ Taãn nɛ, ma dinsɔɔ̃ n má rezɛ̃ tɔrɔ yala-n. Min kɔn goã kun ma-n tɔrɔn bii wa. Bɛ lɛ nɛ, maa foo yoo taman yii, má ǹ yɔyɔrɛ, maa kakaarɛbaa gɔ́ɔ̃ nɛ, má tɔrɔ ǹ la. Ǹ mà paparɛ, á kaa maa mɔnaan ganaa, á ǹ tumaa taã.

⁴ A nà á goã ma gɔ́ɔ̃ nɛ, máa ma gɛ̀ dòo bɔ. Maa zaman lɛ a si a kaa lɛ̀ na á dɔ.

⁵ Má ga, min kɔn banban á n doe ma lɛ wa! Bɛ́ ma tɔwaa parsiini. Min kɔn banban á ma foo taɛ̃ wa! Má yoo kəni máa ma din nə die sii zɛnɛɛ. Maa foo-yoo kɛ na á pàã kɔ ma la.

⁶ Maa foo-yoo lɛ gɔ́ɔ̃ nɛ, má tɔrɔn yɔyɔrɛ ma gòã li. Má ǹ kã ka maa foo-yoo kɛ nɛ, má ǹ mà kaa tán furu-n.

Dɛnaa Lawa bǐɛ̃baa a zaman la

⁷ Man ka yiri gisĩ Dɛnaa Lawa a bǐɛ̃ nɛ, ka sii mɛnɛn bɛ́ re ka diɛ a tɔ laakalaa ganaa: A sii mɛn tumaa zɛnaa wɔ nɛ, a bǐɛ̃ gole mɛn baa Izirayeli a zaman nɛ, a màn mɛn tumaa zɛnaa a kɔn-narɛɛ gole kɛ gɔ́ɔ̃ nɛ, ka a bǐɛ̃ damata kɛ nɛ á zɛnaa.

⁸ Izirayeli minin paǹ li, Dɛnaa Lawa pɛ: «Maǹ maa zaman lɛa taãn-taãnɛ, maa nɛnyaanan manɛ. Ǹ ba re ma yiri siɛ̃ wa.» Á n baa ǹ kirisibaali lɛa.

⁹ Ǹ nɔmaan kɛn tumaa gɔ́ɔ̃ nɛ, a dɔ nɔmaa. Lawa a dia dí-a wole mɛn bɛ́ golee ne a yɔrɔ-a, bɛ lɛ dinmaa na á ǹ kirisibaa. A kɔn-narɛɛ laanka a makara-doɛ̃ kɛ taman yii, á ǹ si á ǹ kaa. Ǹ sii tumaa gɔ́ɔ̃ nɛ, á n dɔ ǹ lɛ, á goã kunun ǹ ni lɛawaan kɛn tumaa gɔ́ɔ̃ nɛ ǹ nə́ kiɛ̃.

¹⁰ Sɛnɛ, ǹ nə́ piã-wɔlen baa. Ǹ nə́ n Yiri sonbore kɛ foo ziziɛ̃. Dɛnaa Lawa nə́ n bɔyaa á ǹ zɔ́ɔ baa, a n zia biɛ ǹ ganaa.

¹¹ A zaman lɛ yiri gisĩ ka lɛlɛ ǹ nɛ, biikoo mɛn bɛ́ Muizu goã kunun ǹ ni: «Min mɛn yìsi mu kuru ka a zaman nɛ kɔnlɛ ka ǹ tɔɔn laanka ǹ lɛduə̃lin ni, ǹ dɛnaa n maa? Min mɛn na a Yiri sonbore gisĩ ǹ la, bɛa dɛnaa n maa?

¹² Ǹ zii tɔ wɔ gɔ́ɔ̃ nɛ, a din na á pàã kɔ Muizu la. Á yìsi mu yu kɔn ǹ nyɛɛnɛ, màn mɛn bɛ́ toɛ, a tɔ goã yǎa duduu.

¹³ A din na á toa ǹ nə́ yìsi mu zuzulu kuru, ka sùi bɛ́ diə kuri lɔn, ǹ nə́ ǹ mɛnaa wa.

¹⁴ Ǹ kɔnboe n ka tɔɔ kuru ni, woe nyankɔrɔ basa nɛ. Dɛnaa Lawa Yiri n miɛ ǹ nyɛɛnɛ, woe ǹ ne susu ǹ bǎã nɛ.» Taãn nɛ Dɛnaa Lawa, bɛa yɔrɔ lɛ la, n mɛ n zaman lɛ nyɛɛnɛ, màn mɛn bɛ́ toɛ, n tɔ golebaa yɛ.

Zaman lɛn Dɛnaa Lawa nyankoe

¹⁵ Dɛnaa Lawa, n toa lon n giã ǹ bǎã sonbore siĩn-siĩn kɛ nɛ, n ga sii kɛ ganaa die wɔ gialaa. N kɔn-narɛɛ gole ke wɔa paǹ li, bɛ á maa kəni? N pàã gole kɛ á maa? Wɔ yii ba n makara doɛ̃ laanka n bǐɛ̃baa kɛ ganaa wɔa paǹ li doo wa.

¹⁶ A da yaa, n din ni wɔa díi lɛa! Wɔa díi gole Abrahamu ba sii kɔn doɛ̃ wɔa paǹ li wa. Izirayeli ba wɔ doɛ̃ wa. Sɛnɛ, Dɛnaa Lawa, nsɛ n wɔa díi lɛa. N din nə wɔ «si sii la wole lɛa.» Bɛ lɛ nə n tɔ lɛa yǎa duduu.

¹⁷ Dɛnaa Lawa, wàa na á baa ń toa wɔ papaã sɔsɔɔ n zii kɛ ganaa. Ń toa wɔ n foo lɛ tã n boo nyɛɛnɛ, wɔ́ n piã wɔ n guguru kɔ wa. Bɛ n siɛ lɔn kəni? Wusoo n daa n kɔn-narɛɛ taman yii, wɔsɛn taman yii n dí-nyalin lɛa, Wɔsɛn kɛn, n din a zaman lɛa.

¹⁸ Wɔsɛn, n zaman sonbore ke, gána lɛ na á goã wɔa wɔ lɛa biikoo boɛɛn dinsɔɔ̃ li. Wɔa zɔ́ɔn nə́ n bǎã sonbore lɛ ziziɛ̃.

¹⁹ Haalɛ bibi, n ba wɔa kii lɛa doo wa, n tɔ ba wɔ ganaa doo wa. E! Bɛ̀ ma nə ń lon toɛ̃, ń daa gisĩ tán! Kelen tá re bìn diɛ n nyɛɛnɛ!