Izayii 62 - LAWA A BOO SONBORE

Zeruzalɛmu n die tɔ dii yii

¹ *Siɔn, ma a re n lɛ tiɛ̃ wa, a giala ma á n narɛ, Zeruzalɛmu, ma a re n toɛ bíi-a kooro má n maa sii zɛnɛɛ wa, a giala ma á n narɛ, ma nə n yii diɛ yǎa n peperebaa kuĩ ka wɔlɔ fúlu bɛ́ lɔn, yǎa n kirisibaa kɛ tɛ pii ka bolon tɛ bɛ́ lɔn.

² Bɛa biikoo li, tɔrɔn tumaa á re n peperebaa yii. KIIN tumaa á re n gugurubaa yii. Dɛnaa Lawa tɔ dii mɛn bɔ, ǹ tá re bɛ koe n ganaa kəni.

³ Ma n die goɛ̃ ka kii bafolo bɛ́ lɔn Dɛnaa Lawa gɔn, ka kii mɔnaa gɔn siĩn-siĩn bɛ́ lɔn n Lawa gɔn.

⁴ Ǹ ba re n bíi doo mà «Kiwi mɛn bɛ́ ǹ nə́ n la bɔ a ganaa» wa. Ǹ ba re n gána kɛ bíi doo mà «Kɛbɔlɔ» wa. Sɛnɛ, maǹ die n bíi «min mɛn bɛ́ kɔɔ̃n Dɛnaa Lawa ganaa.» Ǹ tá re n tán bíi: «Kɔn-wɔle sonbore.» A giala, n tá re kɔɔ̃n koe Dɛnaa Lawa ganaa, n tán lɛ dɔ á re zuũ yii.

⁵ Ká tɔntɔraa bɛ́ kɔn we ka a nɛniɛ-n lɔn, min mɛn bɛ́ n doe, bɛ lɛ n die n zuũ biɛ. Ka lɔ tii bɛ́ n zuũ foo kɔɔ̃n koe lɔn, n dɔ n die Dɛnaa Lawa foo kɔɔ̃n koe miɛ̃.

⁶ Zeruzalɛmu, má bǎã-lɛduəlin koa n kungɔnɔn la. Penleen ka tèlò-n, ǹ ba re n lɛ tiɛ̃ wa. «Kasɛn lɛ̀ waa ma yii n koo wolen lɛn, ka ǹ Dɛnaa Lawa yiri gisĩ Zeruzalɛmu ni, ka nyan nə n susu duduu wa!

⁷ Ka nyan toa a susui yɛ wa, yǎa a Zeruzalɛmu zɛnɛɛ a nyɛɛ, yǎa a tɔ boe tán tumaa la.»

⁸ Dɛnaa Lawa nə n liɛ kɛnɛn: «Maa Lawa Pàãyiidɛnaabaa kɛ taman yii, ma a re toɛ n zɔ́ɔn nə n *belee kɛ bii wa. N nɔmaa duvɛ̃ mɛn taman yii, tiin ba re bɛ mii wa.

⁹ Sɛnɛ, min mɛnɛn bɛ́ re belee lɛ goɛ, ǹ dininmaan man die bii bɛ̀ ǹ tá Dɛnaa Lawa tɔ boe ka loe ne. Min mɛnɛn bɛ́ re rezɛ̃ lɛ niɛ̃, maǹ die duvɛ̃ mii maa kion sonbore kɛa sumu-n.»

¹⁰ Zeruzalɛmu minin, ka soo! Ka soo kiwi kɛ-n fufuu! Ka zii bũ maa zaman nɛ! Ka zii zɛnaa, ka a kɔlɔn waa! Ka sii giala pɛ ǹ màn zumu, tɔrɔn wɔ lɛa!

¹¹ Á ke, Dɛnaa Lawa lɛ n boe yǎa tán lɛ dan ganaa. Ka pɛ Siɔn kiwi ni: «N kirisibaa wole á ke yii die. A màn mɛn yɛ a n die ka bɛ nɛ. A n die ka a dí a saraa nɛ.»

¹² Ǹ tá re ǹ bíi mà «Tɔrɔ sonbore» «Dɛnaa Lawa min mɛnɛn si á ǹ kaa». Nsɛ Zeruzalɛmu, ǹ tá re n bíi: «Lawa foo sii kiwi», «kiwi mɛn bɛ́ ǹ nə n la bɔ a ganaa wa».