Izayii 58 - LAWA A BOO SONBORE

Lɛ sɔɔ sonbore

¹ Dɛnaa Lawa pɛ: Paraa ka lɛn gole ne, n nyan nə n lɛ tã wa. Toa n lɛn nə bɔ ka bɛn wɔ bɛ́ lɔn! Maa zaman lɛ a sii baraan pɛ ǹ nɛ, n Zakɔba tɔrɔn siɛ̃n pɛ ǹ nɛ.

² Lɛawaa tumaa li, maǹ nɔ̀n diɛ maa taasiɛn nɛ. Maǹ giɛ li ǹ ma foo siin dɔ̃. Maǹ nə́ kɔnbɔ ka tɔrɔ mɛn nə́ ke, koe peperebaa lɛ, ǹ nə́ ǹ ba ǹ Lawa a dí-pɛn tii wa. Maǹ kiri pepere li. Maǹ li ma goã mɔrɛɛ nɛ ǹ ganaa.

³ Sɛnɛ, maǹ pii: Wɔ n siɛ lɔn wɔ n lɛ sɔɔ n yii ná a ba a ganaa wa. Wɔ n siɛ lɔn wɔ n dinin gisĩ n nə́ n ba n yiri koɛ li wa. Má ǹ lɛ si kɛnɛn kəni: Sɛnɛ, ta ka n lɛ sɔɔ ǹ mɛn pinaa, ka n ka dinin gɔn tɔ dí nyɛɛ, ka n kaa dí-nyalin kuĩ baraa!

⁴ Hiĩ, bɛ̀ ka n lɛ sɔɔ, ka n zia diɛ. Ka n kɔn dii ka gɔn munii ni. Bɛ̀ ka á n lɛ soɛ ka bɛa yɔrɔ kɛ nɛ, kaa nyankɔ á doe ma li lon wa.

⁵ Ma bɛ́ lɛ soɛ mɛn narɛɛ, bɛ kɔnbɔ ka kɛ nɛ? Kasɛn din gisĩ ǹ gɔn nə ka kɛ-n ma yɔrɔ-a? Ka n mìi kuməə ka bùruu bɛ́ lɔn, ká gɛ̀ koa ǹ mɔnaa wɔ, ka n dinin tuturu tán tii li, ka n bɛ lɛ bíi "lɛ soɛ"? Bɛ n lɛawaa lɛa kɔɔ̃n Dɛnaa Lawa ganaa?

⁶ Lɛ sɔɔ mɛn bɛ́ kɔɔ̃n ma ganaa, á ke: Ǹ mɛnaa min mɛnɛn la, ka bɛn si ka ǹ kaa. Zǔu mɛn bɛ ǹ wìi li, ka bɛ bɔ ka bɔ ǹ ganaa. Ǹ bɛ́ min mɛnɛn nɔmɛɛ, ka bɛn si ka ǹ kaa. Sii mɛn tumaa bɛ́ ǹ biɛ bɛ̀rɛn lɛa, ka bɛ yii sàabaa.

⁷ Ka kaa màn-bii gii kɔn ka bòonaa nɛ, ka kiɛnlɛ bũ doobaan manɛ, ǹ mɛnɛn kion bɛ́ a banban ka mɔnaa wɔ mɔnaa wɛɛnaa ganaa, ka nyan nə n dɔ̀ɔ̃ wɔ ka dɔɔ̃n nɛ wa.

⁸ Ka bɛ nɛ, n wɔlɔ fúlu n die yui tán ka baayɛlɛ a wɔlɔ fúlu bɛ́ lɔn. N baayɛrɛ lɛ á re nyɛɛ fufuu. N peperebaa á re n nyɛɛnaan boe, Dɛnaa Lawa a gugurubaa kɔ n kio lɛ.

⁹ Bɛ̀ n lɛ dia, Dɛnaa Lawa á re n lɛ sii. Bɛ̀ n dɔmalɛ nyankɔ, á re pii n ni: «Ma á die.» Màn mɛn bɛ́ nɔmaa diɛ n zaman mìi ni, sii zɛnaan mɛnɛn bɛ́ nyɛ́ɛ diɛ, ka boo baraan nɛ, bɛ̀ ń boo la n bɛn sàabaa,

¹⁰ bɛ̀ n tá n màn-bii gii kɔn ka bòonaan nɛ, bɛ̀ n ga nɔmaa-wɔlen walan, ka bɛ-n kəni, n tɛ fúlu á re boe tèlò-n, nsɛ a wɔlɔ tì n die goɛ̃ ka penleen bɛ́ lɔn.

¹¹ Dɛnaa Lawa n die n nyɛɛnaan boe biikoo yii li. Haalɛ diə bii, á re màn-bii koe n la, a pàã kɔ n la. N nə n die goɛ̃ ka dù gɔrɔ mɛn bɛ́, ǹ nə́ mu kiɛ a ganaa parsiini, ka mu yala mɛn bɛ́ a mu n baa sii duduu.

¹² Kɛbɔlɔ zizin kɛn, n zaman lɛ tá re bɛn doe. N tá re kion doe kɛ gòã zizin kɛn la ǹ nə́ n la bɔ ǹ ganaa haalɛ bibi. Ǹ tá re n bíi: «Tɔrɔ mɛn bɛ́ kɛ kolon tiɛ̃, a n wusii kiwi a ziin zɛnɛɛ.»

Susu ǹ pii koa ǹ gɔn

¹³ Bɛ̀ n nə n piã n dí nya *susu ǹ pii pinaa wa, ma lɛawaa mɛn bɔ má koa maa wɔ lɛa, bɛ n dí nya li wa, bɛ̀ ń susu ǹ pii lɛ bíi "là nyantoro", bɛ̀ ń Dɛnaa Lawa a lɛawaa sonbore lɛ bíi "guguru kɔ ǹ lɛawaa" bɛ̀ n ná a guguru kɔ, ń dí kɔn nya li wa, bɛ̀ n pii kɔ li, n nə́ n din foo sii zɛnaa wa, bɛ̀ n liere kooro kɔ wa,

¹⁴ ka bɛ-n kəni, n tá re yii-nyɛɛ yii Dɛnaa Lawa barka nɛ. Ma á re toɛ n dii gána lɛ a kelen mìi ni. Ma á re toɛ n là yɛ n digolo Zakɔba a tán kɛ ganaa má kɔ la. Hiĩ, Dɛnaa Lawa na á pɛ miɛ̃.