Izayii 57 - LAWA A BOO SONBORE

¹ Maǹ min peperen nyin boe, min kɔn dɔ ba n yiri koɛ li wa. Min sonboren man papaɛ̃, min kɔn ná a doɛ̃ mà maǹ nə́ papaã ǹ nə́ n bɔ nɔmaa li wa,

² ǹ tá re woe là nyantoro ne. Min mɛnɛn bɛ́ koe zii pepere lɛ, bɛn tá re nyuù sonbore we.

Dì guguru-kɔlen gɔn-waa manɛ

³ Sɛnɛ, kasɛn kɔnkoã nɛn lɛn, ka n zɔ̃ ka da kànaa. Ka tumaa n naarɛbaali laanka kɔrɔbaali nɛn lɛa.

⁴ Ka ǹ yaa we die ganaa, ka nə n lɛ buĩ banabana die li? Ka ǹ ka lɛwɔn boe die li? Ka ǹ nɛnyaan bɔlɔ tii wolen lɛa, ka ǹ soɛ-bɔlen dɔn lɛa.

⁵ Dan mɛnɛn bɛ́ kɔɔ̃n ka ganaa, ka n kɔrɔbaa zɛnɛɛ bɛn giulun, ka da mɛn tumaa bɛ́ ǹ luu n kɛkɛ. Ka n kaa nɛnyaanan koe *wúlu màn lɛa mu ziin ganaa, ka gɛ̀fu yalan nɛ.

⁶ N wɔ gii n ka mu zii kɔlɔ zɔzɔnɔn kɛn nɛ. Bɛ n doe n ganaa. Ma n duvɛ̃ zumii ǹ dinin lɛn ganaa wúlu màn lɛa, ka dì gɔ ǹ màn nɛ n nə́ wúlu màn koe ǹ la. Dɛnaa Lawa n nɔ̀n diɛ: «Ma á siĩn ma lɛ kɔ bɛ ganaa?»

⁷ Kele sasa mìi ni, ń waa ǹ bǎãn zɛnaa. Walan lɛ nɛ n tá dii bɛ̀ n wúlu bɔ.

⁸ Ń nə́ n dì yii n kiɛnlɛ-a ǹ goo kio. Ma nə n duri masɛ la, n nə n mɔnaa sɔlɔ ń dii n waa ǹ bǎã lɛ nɛ. Ń lɛ kɔ kɔn la wɔ ka n tɔntɔraan nɛ. A n kɔɔ̃nɛ n ganaa, n waa kunun ǹ ni, n nə́ giɛ ǹ tontoro ganaa.

⁹ Ń woo kii li, ka nyɔɔ laanka màn giĩ kɔɔ̃n gigiã nɛ. Ń dia dí-a wolen dia bǎã sɔsɔɔ nɛ. Ń gisĩ n woo yǎa geren piɛ.

¹⁰ Ma nə́ n tɔ wɔ á la yii ni, bɛ lɛ na á n nɔmaa. Sɛnɛ, n pɛ dɔn mà «kɛ là banban wa.» N pàã dii yɛ, n nə́ n nɔmaa lɛ sawaa nɛ.

¹¹ Die na á goã nyɛ́ɛ gole diɛ n ganaa n soɛ bɔ ma nɛ, n yiri bɔ ka ma nɛ. N ba n yiri koɛ ma li doo wa? Man má goã n lɛ tiɛ̃ haalɛ bibi. Bɛ lɛ na á toa n ba ma guguru koe wa.

¹² Sɛnɛ, ma á re n peperebaa kɛ nyɛɛ foaã nɛ. N sii mɛn zɛnaa, n ba re a là goon yii wa.

¹³ Bɛ̀ n gú da ǹ mɛn pinaa, n dì bɔbɔnɛɛn lɛn nə n si sii la kəni. Piɛ̃ á re ǹ tumaa goɛ, kurunkurun tá re woe ǹ ne. Sɛnɛ, min mɛnɛn bɛ giɛ mìi duru ǹ bǎã li masɛ li, bɛn tá re gána lɛ yii ǹ wɔ lɛa, maa kele sonbore kɛ nə ǹ wɔ baa.

Dɛnaa Lawa á re a zaman a busu nyɛɛ

¹⁴ Dɛnaa Lawa pɛ: Ka zii zɛnaa fufuu, ka zii bɔ. Màn mɛn tumaa bɛ́ min nə boe la a n gòã na a ganaa, ka bɛ bɔ ka bɔ maa zaman a zii la.

¹⁵ Min mɛn bɛ́ ǹ ná a guguru koe ǹ ná a laakalɛɛ, a ná a tan duduu, a tɔ n "Sonbore", a bɛ́ boo mɛn pii á ke: Man giã-n bǎã sonbore ne, lon sɔsɔɔ, Sɛnɛ, man kun ka nɔmaa-wolen dɔn nɛ, ka foo ziziɛ̃ wolen ne. Man yiikoonaabaa koe nɔmaa-wɔlen la, ka foo ziziɛ̃ wolen ne.

¹⁶ A giala, ma ba zoɛ̃ li máa ma minin zɛ̀rɛbaa biikoo yii li wa, hinlaa ma foo goã yoo-n duduu wa. Bɛ bie wa, ma min mɛnɛn zɛnaa, bɛn yiikoonaabaa á re n sii ǹ la.

¹⁷ Izirayeli a zɛ̀rɛ laanka a din foo siin kɛn nə́ ma foo yoo, bɛ lɛ nɛ má dɔlɔ da la. Ma ba li ma yɛ doo wa. Sɛnɛ a too kakabaa taman yii, a n tɔn koe a din foo siin lɛ.

¹⁸ Má a giã ǹ gɔn yɛ, sɛnɛ, ma á re a kaka koe, ma a foo taã, asɛ nɛ ka min mɛnɛn bɛ́ gɛ̀ koɛ.

¹⁹ Ma á re foo kɔɔ̃nbaa ǹ loe we ǹ lɛ-n. Min mɛnɛn wɔlɔ bɛ́ sɔsɔɔ, ka min mɛnɛn wɔlɔ bɛ́ kunu foɛɛ̃ nɛ, yii-nyɛɛ n bɛn wɔ lɛa. Hiĩ, man die maa zaman lɛ kaka koe. Dɛnaa Lawa mà miɛ̃!

²⁰ Sɛnɛ, min baraan man ka Yìsi mu gole bɛ́ lɔn, bìn diɛ, a ná a golee wa, bɛrɛɛ laanka yisi tɔrɔ tumaa n soe a mu li.

²¹ Maa Lawa pɛ: «Yii-nyɛɛ goon din banban min baraan wɔ lɛa wa.»