Izayii 56 - LAWA A BOO SONBORE

Tɔrɔn tumaa a Lawa nyankɔ ǹ kion

¹ Dɛnaa Lawa n kɛ pii: «Ka kɔ sonborebaa lɛ, ka peperebaa zɛnaa. Ma bɛ́ die ka kirisibaa mɛn nɛ, á dɔ á nya. Kànaa ka boɛɛnɛ ka á re maa peperebaa yii.

² Maa boon kɛn máa ǹ diɛ, min mɛn bɛ́ koe ǹ lɛ ka a parsiini bɛa dɛnaa á re foo kɔɔ̃nbaa yii. Ǹ dɛnaa á re foo kɔɔ̃nbaa yii taãn-taãnɛ, asɛ mɛn bɛ́ *susu ǹ pii koɛ, a nə́ n nyɛnɛɛ sii baraa nɛ.»

³ Tii mɛn bɛ́ paraa-n Dɛnaa Lawa ganaa, bɛ nyan pɛ mà sàabaa ba la wa mà Dɛnaa Lawa á re asɛ lui, a na asɛ bɔ a zaman bii! Min mɛn bɛ́ giĩbaa ná a ba a lon wa bɛ nyan pɛ mà asɛ n da gere lɛa wa!

⁴ Sonbore, Dɛnaa Lawa n kɛ pii: «Giĩbaa bɛ́ a ba min mɛnɛn lon wa, ǹ nə́ maa susu ǹ piin koɛ, ǹ nə́ ma foo siin zɛnɛɛ, ǹ nə́ n gɔn parɛɛ maa lɛ kɔ kɔn la ǹ boon kɛn ganaa,

⁵ á bǐɛ̃ kɔ, maa kion lɛ gɔ́ɔ̃ nɛ, ka a kigiala gɔ̀nɔn ganaa nɛ, ma á re bǎã koe ǹ la ka tɔ dɔ nɛ. Bɛ là á re yii ǹ ganaa, a la nɛgiĩn laanka nɛlɔn manɛ. Ma bɛ́ re tɔ mɛn koe ǹ la, bɛ n die goɛ̃ yǎa duduu, a ná a ba n tuturi wa.»

⁶ Tiin mɛnɛn gɔn paraamaa bɛ́ Dɛnaa Lawa ganaa, ǹ ná a dí nyɛɛ, ǹ ná a tɔ narɛ, ǹ ná a dí-nyalin lɛa, min mɛnɛn tumaa bɛ́ susu ǹ pii koɛ sɔnbɔraa nɛ, ka bɔlɔgoondɛnaabaa nɛ, ǹ nə́ n gɔn parɛɛ maa lɛ kɔ kɔn la ǹ boon kɛn ganaa,

⁷ ma á re die ǹ ne maa kele sonbore kɛ la, ma ǹ kã ka foo kɔɔ̃n nɛ ma nyankɔ ǹ kion kɛ nɛ. Ǹ bɛ́ re *wúlu màn tiɛ̃n mɛnɛn koe ma la ka wúlu mànan kɛn nɛ *wúlu bɔ ǹ bǎã nɛ, ma á re ǹ sii. Sonbore, maǹ die maa kion lɛ bíi, «Tɔrɔn tumaa a Lawa nyankɔ ǹ kion.»

⁸ Dɛnaa Lawa mɛn Izirayeli a wo bɛ̀rɛbaa ǹ bǎã n wolen sɔkɔn, bɛa da ǹ boo á ke: «Má minin sɔkɔn má ǹ lɛpɛnɛ nɛ. Man die wusii ma kɔsɔn sɔkɔn kunun ǹ ni doo.»

Kiã sonboren ba zaman lɛ la wa

⁹ Ka dinin tumaa, wuru gɔ́ɔ̃ nɛ ǹ tɔɔn, ka daã gòã li wɔn nɛ, ka da màn bii!

¹⁰ Izirayeli a wɔlɔ-lɛduə̃lin tumaa n yii tere-an lɛa. Ǹ ba sii kɔn doɛ̃ wa. Ǹ tumaa n gin lɛ tere-an lɛa, ǹ ba boe la ǹ tá gisĩ dinin wa. Maǹ waa-n tán ǹ nə́ n narɛ. Nyuù n kɔɔ̃nɛ ǹ ganaa.

¹¹ Maǹ kuruun lɛa, ǹ ba màn kɔn toɛ wa. Ǹ ba kiɛ̃ wa. Wɔlɔ-lɛduə̃lin manɛ, ǹ ba sii kɔn giala miɛ wa. Maǹ nə ǹ dinin foo siin zɛnɛɛ. Ǹ didie n giɛ a din a là li.

¹² Maǹ pii: «Ka daa wɔ n tan wɔ ga duvɛ̃ li, wɔ yɔ kakaarɛn mi a wɔ yii kũ. Biɛ̃ ǹ nə die goɛ̃ ka pelo ǹ bɛ́ lɔn: Duvɛ̃ gigiã goã.»