Izayii 54 - LAWA A BOO SONBORE

Dɛnaa Lawa Zeruzalɛmu toa walan wa

¹ Zeruzalɛmu, n nyɛnyɛɛ, nsɛ mɛn bɛ́ nɛ goã n lon wa! Nsɛ mɛn bɛ́ n ba nɛ yɛ lɛ doɛ̃ wa, gɔ̀lɔ̀baa ǹ lɛ-dɛ wɔ, n foo kɔɔ̃nbaa ǹ lɛ-dɛ wɔ! Dɛnaa Lawa n pii n ni: Nsɛ mɛn bɛ́ ǹ nə́ n la bɔ n ganaa, n tá re nɛ gigiã yii a la lɔ mɛn din bɛ́ ǹ zuũ ná a tan.

² N zìã lɛ bɔ, n màn da a golebaa li. N nyan ga n wɔrɔ ziziɛ̃ ganaa wa. Màn da n zìã lɛ a biɛn sasabaa li, n na a kiɛn dere tán ǹ paraa.

³ A giala, n tá re n lɛ boe la paǹ yii li. N nɛgiĩn tá re n miãkɛnɛn gánan sii, ǹ nə n kɔ lɛ. Ǹ tá re wusii ǹ giã kiwi gɔ́ɔ̃ kooraan kɛn nɛ.

⁴ N nyan nyɛ́ɛ baa wa. Sìi á re n kuĩ doo wa. N yiri nyan nə n lɔlɔkɔn wa. Ǹ ba re sɔ koe n ganaa doo wa. Sìi mɛn goã n ganaa n tenmaa waáraa, n yiri á re boe ka bɛ nɛ. N yiri á re boe ka sɔn kɛn nɛ ǹ nə́ goã kiɛ n la bɛ̀ n bɛ́ giɔɔrɔ lɛa.

⁵ A giala, min mɛn nə n zɛnaa, a tɔ n Dɛnaa Lawa Pàãyiidɛnaa, bɛ lɛ nə n zuũ lɛa. Min mɛn bɛ́ n kanbiɛ, bɛ n ka Izirayeli a Lawa sonbore kɛ nɛ, ǹ bɛ́ ǹ mɛn lɛ bíi mà «tán tumaa a Lawa.»

⁶ N foo na á goã ziziɛ̃-n taãn-taãnɛ, ka lɔ mɛn bɛ́ ǹ nə́ n la bɔ a ganaa. Sɛnɛ, Dɛnaa Lawa lɛ dia n la. Hiĩ, n Lawa n kɛ pii n ni: Min tá boe la sonbore a na a tɔntɔraabaa waáraa lɔ loo?

⁷ Má goã má n la bɔ n ganaa biikoo boɛɛn gɔ́ɔ̃ nɛ, sɛnɛ, ka foo basiɛ̃ nɛ, man li ma wusoo ma n saa.

⁸ Ma foo goã á yoo n li parasii ni. Biikoo boɛɛn gɔ́ɔ̃ nɛ, ma goã li ma yii mɛ n ganaa wa, sɛnɛ, man maa foo basiɛ̃baa nyɛɛ n nɛ kɔn-narɛɛ gɔ́ɔ̃ nɛ, dan ná a ba la wa. Masɛ Dɛnaa Lawa n bɛ pii n ni, ma din kɛ lɛ nə n si sii la wole lɛa.

⁹ Man die sii zɛnɛɛ ka Nowee a waáraa bɛ́ lɔn. Má goã má lɛ-kɔ wɔ máa mu á re tán bii doo wa. A din goon ne, man lɛ kɔ we pelo, máa ma foo á re yui n li doo duduu wa, máa ma a re parɛɛ n li doo wa.

¹⁰ Kelen tá boe la ǹ bìn da, tentenen tá boe la ǹ nə n zɔ̃. Sɛnɛ, kɔn-narɛɛ mɛn bɛ́ ma foo ne n wɔ paǹ li, bɛa re n bɔyɛɛ duduu wa. Ma lɛ kɔ kɔn la mɛn wɔ ka n nɛ, là nyantoro a paǹ li bɛa re bìn diɛ wa. Ma din Dɛnaa Lawa n kɛ pii n ni, maa foo basiɛ̃ gɔ́ɔ̃ nɛ.

Dɛnaa Lawa á re wusii a Zeruzalɛmu dɔ

¹¹ Zeruzalɛmu, nɔmaa wole, piɛ̃ gole nə n gialaa, min kɔn ba n foo doɛ wa. Masɛ Dɛnaa Lawa n die wusii ma n dɔ ka kɔlɔ nɛ, ǹ nyaǹ nə koe ne. Man die n goã daɛ ka kɔlɔ giɔ̀mɔ kakaan nɛ, bɔlɔn lɛa.

¹² N kungɔn lalan nə die goɛ̃ kɔlɔ giɔ̀mɔ kakaa tã lɛa. N kiɛnlɛn man die goɛ̃ kɔlɔ tɛ-pɛlen lɛa ǹ nə́ la damalen ne. Kungɔn mɛn tumaa bɛ́ kiwi lɛ lɛnpɛnɛ, a yii n die n doe ka kɔlɔ giɔ̀mɔ kakaa nɛ.

¹³ Masɛ Dɛnaa Lawa á re n nɛnyaanan tumaa darɛɛ. Ǹ tá re goɛ̃ yii-nyɛɛ gole gɔ́ɔ̃ nɛ.

¹⁴ Peperebaa n die pàã koe n la. Giã tìãlɛa mɛnaa ma la ganaa, nyɛ́ɛ ba re n kuĩ doo wa. N wɔlɔ sɔsɔɔ kɔ nyɛ́ɛ ganaa, a ba re n mɔrɛ n ganaa doo wa.

¹⁵ Á ke, bɛ̀ ǹ nə́ yoo n gialaa ka zia nɛ ma gòɛ̃ ba bɛ-n wa. Min mɛn bɛ́ yui n gialaa, ǹ dɛnaa á re mɛnɛɛ n nyɛɛnɛ.

¹⁶ Ga, ma din ni ma fuũ zɛnaa, asɛ mɛn bɛ́ tɛ pii nyɔɔ fuu belenbelen ganaa, a n ziabaa ǹ màn tɔrɔ tumaa zɛnɛɛ. Min mɛn dɔ bɛ́ boe la a bɛa ziabaa ǹ mànan kɛn lɛn ziziɛ̃, ma din ni má a dɔ zɛnaa.

¹⁷ Ziabaa ǹ màn mɛn tumaa nə n zɛnaa n tɔ ganaa, ǹ kɔn ba re boe la a màn kɔn zɛnaa n ganaa wa. Min woo min yoo n ganaa ka kiri ni, n tá re a siɛ̃n nyɛɛ nɛ. Maa dí-nyalin gii bɛ́ ka màn mɛn nɛ má koa ǹ nɛ, ma bɛ́ peperebaa mɛn koe ǹ la, bɛ n ka kɛ nɛ. Masɛ Dɛnaa Lawa a da ǹ boo ne.