Izayii 50 - LAWA A BOO SONBORE

Lawa n sɛ̀ pii a zaman ganaa

¹ Dɛnaa Lawa n kɛ pii: Ka ǹ pii mà má kaa náa Zeruzalɛmu loo, ka a loo ǹ sɛ́wɔ nyaa ma-n kəni! Ma ka sã min mɛn la, má maa giɔ̀mɔ saraa nɛ, ka ǹ dɛnaa pɛ ma-n kəni! Á ke, bɛ̀ n yaa ǹ nə́ ka sã, kaa siɛ̃n lɛn lɛa nɛ. Bɛ̀ ǹ nə́ kaa náa loo, kaa sii baraan lɛn lɛa nɛ.

² Ma bɛ́ ma daa, wàa na á baa ma da min kɔn yaa wa? Má lɛ dia, min kɔn ma lɛ si wa. Wàa na á baa kəni? Ka ǹ taasɛ mà maa boe la ma ka si ma ka kaa wa? Kaa kirisibaa ǹ pàã na a ba ma lon wa? A da yaa, maa paraa-mali dinsɔɔ̃ n yìsi mu piɛ̃ ka daɛ̃. Man tà bɔyɛɛ ma baa diə lɛa. Mu wɛɛ taman yii, zɔ̀nɔn man giɛ̃, ǹ bɔɔ̃.

³ Man wɔlɔ tì koe lon lɛ, ma gɛ̀ koa ǹ mɔnaa wɔ a ganaa.

Foo doa Lawa-a fuu gɔ́ɔ̃ nɛ

⁴ Ma bɛ́ má kɔnbɔ ma boo mɛn da, ma pàãwɛɛnaa foo taã nɛ, Dɛnaa Lawa n ma darɛɛ bɛ ganaa. Baraabaraa baayɛlɛ, a n ma yii kiɛ, man too kɔ ka kialandɛnaa sonbore bɛ́ lɔn.

⁵ Dɛnaa Lawa má toon bũ, man piã wa, ma wusoo ma kio-n wa.

⁶ Min mɛnɛn bɛ́ ǹ nə́ goã ma duwii, má n dɔ̀ɔ̃ dia ǹ la. Má n lɛtoro dia ma lɛtoro ka woɛ̃ wolen la. Min mɛnɛn bɛ́ ǹ nə́ goã sɔ kiɛ ma la, ǹ nə́ sɛ̀ kiɛ ma ganaa, man yɔrɔ duru bɛn la wa.

⁷ Dɛnaa Lawa n die maa gú ganaa, bɛ lɛ nɛ, ma yii puusə kɔ wa. Bɛ lɛ nɛ, má n yɔrɔ laa ka kɔlɔ bɛ́ lɔn, ma á doɛ̃ máa sìi á ma kuĩ wa.

⁸ Dɛnaa Lawa n mɔrɛɛ-n ma ganaa, asɛ mɛn bɛ́ sonbore koe ma la. Die yii n we a kiri wɔ ma ganaa? Wɔ n ta kiri wɔ ǹ bǎã-n kəni. Die n li a ma zɛ̀rɛ baa? Ǹ dɛnaa nə n zɔ̃ a dɔ ma li.

⁹ Hiĩ, Dɛnaa Lawa n die maa gú ganaa. Die n boe la a kiri da ma la? Á ke, maa zɔ́ɔn tumaa n die pɔpɔsɛ, ka mɔnaa bɛ́ lɔn, nimii kũ.

¹⁰ Die n nyɛ́ɛ biɛ Dɛnaa Lawa yii-n ka bii? Bɛa Dɛnaa doamaa nɛ a n too kɔ a dí-nyali lon. Die n tɔ we tèlò-n, tɛ fúlu goon ná a banban? Bɛa Dɛnaa doamaa nɛ a golee Dɛnaa Lawa li, a n foo doa a Lawa ganaa.

¹¹ Sɛnɛ, kasɛn man tɛ koɛ ka n ka dinin lɛnpɛnɛ ka kiɛ tɛdɛnan nɛ. Á bǐɛ̃ kɔ, ka wo bɛa tɛ lɛ nɛ ka kaa kiɛn tɛdɛnan lɛ nɛ. Dɛnaa Lawa din nə die bɛ zɛnɛɛ, ka n die wɛɛ tán fuu gole gɔ́ɔ̃ nɛ.