Izayii 5 - LAWA A BOO SONBORE

Dɛnaa Lawa a rezɛ̃ da

¹ Ka toa ma loe goon lɔ maa giaára giĩ wɔ lɛa. A n maa giaára giĩ lɛ wɔ lɛa ka a rezɛ̃ wuru ni. Maa giaára giĩ a rezɛ̃ wuru lɛ n tenten la, bǎã sonbore ne.

² Á wuru lɛ kɔsɔ. Kɔlɔn mɛnɛn bɛ́ a nɛ, á bɛn waa, á da tɔrɔ sonboren zumu a nɛ. Á sanabolo dɔ a nɛ, bǎã-lɛduəlin wɔ lɛa, á rezɛ̃ mu bɔ ǹ bǎã fɔ̃. A na á goã n yii diɛ rezɛ̃ nɛ sonbore la. Sɛnɛ, *rezɛ̃ da lɛ nɛ mɛn kɔ, nɛ pipiã nɛ.

³ Maa giaára lɛ tɔn pɛ kəni: Zeruzalɛmu ka Zudaa minin lɛn, ka bǐɛ̃ kɔ ka kiri kuru ma laanka maa rezɛ̃ wuru lɛ bii.

⁴ Má n parsii tumaa bɔ maa rezɛ̃ wuru kɛ taman yii, ma ba boe la ma kiɛ̃ kɛ la doɛ̃ doo wa. Má goã n yii diɛ rezɛ̃ nɛ sonbore la, sɛnɛ, rezɛ̃ da lɛ na á nɛ pipiã kɔ. Bɛ giala n ka wàa-n kəni?

⁵ Sisia, ma bɛ́ re màn mɛn zɛnɛɛ maa rezɛ̃ wuru lɛ nɛ, bɛ á ke: Gɔ̀rɔ mɛn bɛ́ a lɛnpɛnɛ, man die bɛ wurii ma bɔ a ganaa, tɔɔn nə sɔ̃. Kungɔn mɛn bɛa lɛnpɛnɛ, man die yala boe bɛ́ ganaa, kiɛ̃ wolen nə tɔtɔrɔ.

⁶ Man die biɛ don lɛa. Min kɔn ba re a da gùrùn boe wa, min kɔn ba re a buu woɛ̃ wa. Nyɛn dan tá re boe a nɛ. Ma á re labaran kurii ǹ baran la kaa a ganaa wa.

⁷ Dɛnaa Lawa Pàãyiidɛnaa a rezɛ̃ wuru n ka Izirayeli ni. Dan mɛnɛn nə goã kɔɔ̃nɛ a ganaa parsiini, bɛ n ka Zudaa a zaman nɛ. Dɛnaa Lawa nə n yii diɛ peperebaa la, sɛnɛ bǎã tumaa nɛ, peperebaabaã nɛ. A nə n yii diɛ sonborebaa la, sɛnɛ bǎã tumaa nɛ, sonborebaabaã nɛ.

Bɔ̀n sɔrɔ, Zudaa gána a kiãn wɔ lɛa

⁸ Kaa wɔ n ka bɔ̀n nɛ kasɛn mɛnɛn bɛ́ kion sii ka da ǹ miã li. Ka wuru si ka da ǹ miã li. Ka bǎã tumaa si ka n kɔ lɛ, yǎa ka dininsɔɔ̃nɔn nə goɛ̃ gána lɛ nɛ!

⁹ «Ma liɛ ǹ boo mɛn ma Dɛnaa Lawa Pàãyiidɛnaa lɛ-n, bɛ á ke: Kion dadara sonbore gigiã tá re kɛbɔlɔ biɛ, min kɔn ba re giɛ̃ ǹ nɛ wa.

¹⁰ Rezɛ̃ wuru hɛktara sɔɔ din ba re duvɛ̃ litiri posooro boe wa. Min mɛn bɛ́ re *belee kilo paabiɛ diɛ, bɛ n die belee kilo fù dinsɔɔ̃ kuri.»

¹¹ Min mɛnɛn bɛ́ baa sii yɔ kakaarɛn kio baayɛlɛ yiisoone, wasamiɛn nɛ, ǹ nə n gù fore ka duvɛ̃ nɛ yǎa làan nə koe, bɛn wɔ n ka bɔ̀n nɛ!

¹² Maǹ yɔ mii kɔnkoɛ̃nɛn wuu li, tùtu ni, maà nɛ ka pìi ni. Sɛnɛ, ǹ ba doɛ̃ mà Dɛnaa Lawa á sii zɛnɛɛ wa, a bɛ́ sii mɛn yɔrɔ boe, ǹ yii ba bɛ ganaa wa.

¹³ Bɛ lɛ nɛ, Dɛnaa Lawa á kɛ pii: «Ǹ tá re maa zaman goɛ, ǹ wo ne bɛ̀rɛbaa ǹ bǎã nɛ, a giala, ǹ ba màn kɔn giala miɛ wa. Bòo tá re ǹ min dadaran dii, mu boro nə ǹ zaman dɛ.»

¹⁴ Geren piɛ yɔrɔ boemaa nɛ, a lɛ buĩmaa-n banabana. Zeruzalɛmu a min yii guguru-an, laanka a zaman tumaa tá re kiɛ walan ǹ zɔ́nən kɛn gòã wuu li.

¹⁵ Sìi á re minbuiin nɛ kuĩ, minbuiin nɛ tumaa á re n mìi kumii. Min mɛnɛn yii bɛ́ lon, bɛn tá re n mìi kumii.

¹⁶ Dɛnaa Lawa Pàãyiidɛnaa á re gugurubaa yii a kiri wɔ gɔ́ɔ̃ nɛ. Lawa sonbore na a sonborebaa nyɛɛ, a peperebaa zɛnaa gɔ̀ɔ̃ nɛ.

¹⁷ Sèren tá re buu soɛ̃ a nɛ ka ǹ buu sɔ̃ ǹ bǎã wɔ bɛ́ lɔn, ǹ bɛ́ sère pian mɛnɛn toe, bɛn tá re buu soɛ̃ a kɛbɔlɔn la.

¹⁸ Kaa wɔ n ka bɔ̀n nɛ, kasɛn mɛnɛn bɛ́ paraa-n kaa sii baraan ganaa, ka kaa soɛ boon ne! Kaa sii baraan man ka kio, ka wotoro bɛ́ lɔn!

¹⁹ Ka n pii: «Dɛnaa Lawa, n baa fufuu n sii zɛnaa wɔ yii ni wɔ yɛ. Izirayeli a Lawa sonbore sii mɛn yɔrɔ bɔ, wɔ ǹ li bɛ nə n zɛnaa, wɔ dɔ̃!»

²⁰ Kaa wɔ n ka bɔ̀n nɛ, kasɛn mɛnɛn bɛ́ pii mà sii baraa n siĩni, mà sii sonbore n baraa. Ka n penleen bɔyɛɛ ka baa tèlò lɛa, ka tèlò bɔyaa ka baa penleen lɛa. Màn mɛn bɛ́ kɔɔsɛ, ka n bɛ bɔyɛɛ ka baa kɔɔ̃nɛ. Màn mɛn bɛ́ kɔɔ̃nɛ, ka n bɛ bɔyɛɛ ka baa kɔɔsɛ.

²¹ Kaa wɔ n ka bɔ̀n nɛ, kasɛn kɛn ka dinin biɛ sii-dɔ̃lin lɛa, ka n ka dinin biɛ yiridɛnan lɛa!

²² Yɔ-mili zanbian lɛn, kaa wɔ n ka bɔ̀n nɛ! Yɔ kakaarɛ mili lɔlɛkɔn wolen, ka dɔn wɔ n ka bɔ̀n nɛ!

²³ Lɛ pii ǹ màn taman yii, ka n zɛ̀rɛdɛnaa toɛ walan. Sɛnɛ, ka nə n piɛ̃, ka sonbore kɔ min pepere la nɛ.

²⁴ Bɛ lɛ nɛ, làpaa á ke kuĩ tɛ-n lɔn, tɛ á ke buu gere kuĩ lenlen lɔn, ka n die boɛ̃ ka da gòon bɛ́ boɛ̃ lɔn. Kaa yii gugurubaa kɛ n die papaɛ̃ ka da buũ bɛ́ lɔn, piɛ̃ li. A giala, ka n ka Pàãyiidɛnaa Lawa a dí-pɛn tii, ka n piã ka Izirayeli a Lawa sonbore a boon ne.

Dɛnaa Lawa a foo yoo

²⁵ Bɛ lɛ taman yii, Dɛnaa Lawa foo n yoo ne a zaman li. Á n gɔn munu ǹ li, á ǹ dɛ. Kelen man bìn diɛ, geren man tán bǎã yii ni ka yisi bɛ́ lɔn. Bɛ tumaa kio, Dɛnaa Lawa foo tɔn basã wa, a gɔn munii lɛ n tɔn lon.

²⁶ Dɛnaa Lawa gòon yiɛ tɔrɔn ganaa. Maǹ boe gána sɔsɔɔn nɛ. A n lɛ pii pii, a n lɛ diɛ goon la, kanaa lɛ dan ganaa. Á ke die ka baa nɛ.

²⁷ Bɛa tɔrɔ lɛ bii, min kɔn nɔmaa wa, min kɔn ba tatalɛɛ wa. Nyuù ba min kɔn yii-a wa. Min tumaa gù kiɛmaa nɛ. Min kɔn na a maabɛlɛ fore wa, ǹ tumaa a kɔsɔ biɛn yiimaa nɛ.

²⁸ Ǹ kiɛn lɛn man pɛpɛnɛ, ǹ san maǹ dii ni. Ǹ sùin gòon tɔnɔn maǹ kaka ka kɔlɔ bɛ́ lɔn. Ǹ ziabaa ǹ wotoron yii n fuu ka la piɛ̃ bɛ́ lɔn.

²⁹ Yàran bɛ́ wɔɔsaa we lɔn ǹ sɔraasin man wɔɔsaa we miɛ̃. Maǹ lɛ biɛ ka yàra nɛn bɛ́ lɔn. Maǹ gini ka don màn nə́ ke, á màn kũ lɔn, á woe ne, min kɔn ná a doe-n dɔn a si la wa.

³⁰ A da yaa, ǹ kɔn pinaa, yìsi mu á ke gini lɔn, ginii wuu n die boe tɔrɔ kɛ ganaa miɛ̃. Bɛ̀ ń giɛ gána lɛ ganaa, á ke, tèlò laanka koe n die n koe lɛ. Labara dadaran tá re n koe lɛawaa a wɔlɔ fúlu lɛ.