Izayii 48 - LAWA A BOO SONBORE

Dɛnaa Lawa n sii soreen pii

¹ Ka n too kɔ Zakɔba a zaman, kasɛn mɛnɛn nə yɛ Zudaa gána nɛ, Izirayeli tɔ n ka ganaa! Ka nə n liɛ ka Dɛnaa Lawa tɔ nɛ, ka n Izirayeli a Lawa nyankoe, sɛnɛ, ka parsii bie wa, ka a pepere wa.

² A da yaa, ka nə n dinin bíi "kiwi sonbore a minin". Ka nə n doɛ Izirayeli a Lawa ganaa, asɛ mɛn tɔ bɛ́ Lawa Pàãyiidɛnaa.

³ «Sii bibinaan kɛn, má ǹ boo da ka nɛ haalɛ bibi, má a boo da ka nɛ, ka ma. Bǎã goon ne, má siin zɛnaa, ǹ nə́ yɔrɔ dɔ yɛ.

⁴ Ma á doɛ̃, ka ǹ tɔrɔ too kakaan lɛa. Ka wìi n fɔlɔ bàlà lɛa, ka mìi n laa nɛ ka zan bɛ́ lɔn.

⁵ Bɛ lɛ nɛ, má kɛa boon kɛn pɛ ka nɛ haalɛ bibi. Ǹ laan bɛ̀ ǹ nə n zɛnaa, má ǹ pɛ ka nɛ. Ma ba li ka pɛ mà kaa dì lɛ na á ǹ tumaa zɛnaa wa, mà kaa gɔn màn nyín sɛlɛ hinlaa kaa fɔlɔ màn nyín zɛnaa kɛ lɛ na á sii tumaa yɔrɔ bɔ wa.»

⁶ Ma boo mɛn da, ka too ma. Sii mɛn nə n zɛnaa, ka yii yɛ; Ka a re lɛ koe ǹ ganaa wa? «A kũ sisia ganaa, man sii soreen pii ka nɛ. Sii duriin manɛ, ka a ǹ doɛ̃ bɔrɔ wa.

⁷ Ǹ bie sii zizin lɛa wa. Sisia nɛ, ma á re ǹ zɛnɛɛ. A da pelo yaa, ka bin tɔ nə ǹ boo ma wa. Má goã li ka pɛ mà a boo tá ka too-n lɛlɛ ǹ dun wa!»

⁸ Haayii, a boo ba ka too-n wa, ka a màn kɔn doɛ̃ wa. Kaa yiri koa sii li baã belebɔ. Ma á doɛ̃, ka n yiri siɛ̃ wolen lɛa. Maǹ ka bíi piã-wɔlen a kũ kaa yɛ waáraa ganaa.

⁹ Sɛnɛ, ma tɔ taman yii, má maa foo-yoo lɛ da. Ma doamaa bɛ́ ka tɔ bɔ nɛ, bɛ lɛ nɛ, má n foo kũ ka li, màn mɛn bɛ́ toɛ, ma nyan ka papaã wa.

¹⁰ Má ka *yoreen kɔ, sɛnɛ a bie ka wɔrɔ wɔ bɛ́ lɔn wa. Má n da ka gɔ́ɔ̃ li ka là papara ǹ tɛ nɛ.

¹¹ Sonbore, bɛ̀ n yaa má zɛnaa miɛ̃, ma din tɔ taman yii ni! A giala, ma a lɛ koe sɔ ganaa wa. Golebaa mɛn bɛ́ maa wɔ lɛa, ma a re toɛ bɛ dɔ min kɔsɔ ganaa wa.

Dɛnaa Lawa n kii Siirusu diɛ

¹² Dɛnaa Lawa pɛ: «N too kɔ ma lon, Zakɔba, nsɛ Izirayeli mɛn bɛ́ má n bíi. Ma bɛ́ yɔrɔ mɛn la, man miɛ̃ duduu. Man sii tumaa a giala kɔ lɛa, man sii tumaa giala nyɔmiɛ lɛa.

¹³ Ma din ni ma tán giala koa. Ma din ni ma lon lɛ bɔ. Bɛ̀ má ǹ bíi lɔn, maǹ die kun.

¹⁴ Ka tumaa nə n sɔkɔn, ka n too kɔ! Die n ka bii á bɛa boon kɛn da. Dɛnaa Lawa bɛ́ min mɛn narɛ, a bɛ́ li mà a sii mɛn zɛnaa *Baabilonii ni, asɛ n die bɛ zɛnɛɛ, á n die n pàã nyɛɛ Kaldee minin manɛ.

¹⁵ Ma dinsɔɔ̃ n ma a boo da. Má lɛ dia giĩ lɛ la, má daa nɛ. A sii zɛnaan man bǐɛ̃ koe.»

¹⁶ Ka n zɔ̃ ka dɔ ma li ka n too kɔ. A kũ kanaa giala kɔ waáraa ganaa, ma tɔn boo durii da wa. Siin giala kɔ waáraa, bɛ̀ ma tan. Sisia kəni, Dɛnaa Lawa n ma diɛ, a yiri n ma la.

Dɛnaa Lawa nə gɔn wɛɛ a zaman nɛ

¹⁷ Dɛnaa Lawa, n si sii la wole, Izirayeli a Lawa sonbore n kɛ pii: «Masɛ Dɛnaa Lawa, n Lawa lɛa. Màn mɛn là bɛ n ganaa, ma nə n darɛɛ bɛ-a. Ma din ni n nyɛɛnaa ǹ boe zii kɛ la, n tá tɔ we la.

¹⁸ Bɛ̀ ma n nə́ n yiri koa maa dí-pɛn kɛn li, bɛ̀ n yii-nyɛɛ n goɛ̃ ka tà mu bɛ́ lɔn, n peperebaa goã ka yìsi mu gole bɛ́ lɔn,

¹⁹ bɛ̀ n tɔrɔ n die mɔnɛɛ ka yìsi mu lɛ-a ǹ nyɔɔsɔ̃ bɛ́ lɔn, bɛ̀ n nɔ̀ɔnɔn tá re mɔnɛɛ ka nyɔɔsɔ̃ bɛ́ lɔn, bɛ̀ n tɔ á re n tuturi a n bɔ ma yɔrɔ-a duduu wa.»

Dɛnaa Lawa a zaman nə soe Baabilonii

²⁰ Ka soo ka n bɔ Baabilonii! Ka baa si *Kaldee minin nyɛɛnɛ, ka foo kɔɔ̃nbaa ǹ lɛ dɛ nɛ. Ka bɛa kibərə kɛ pɛ, ka pɛ kanaa paǹ tumaa ganaa, ka pɛ: «Dɛnaa Lawa ná a dí-nyali Zakɔba kirisibaa.»

²¹ Á woo ka Izirayeli minin ni diə bǎã nɛ, mu boro nə ǹ kũ wa. Ǹ dinin lɛa, á gɛ̀fu da mu bɔ ganaa. Á gɛ̀fu lɛ wɔsɔ, mu baa si tán.

²² Sɛnɛ, Dɛnaa Lawa pɛ: «Yii-nyɛɛ banban min baraan wɔ lɛa wa.»