Izayii 42 - LAWA A BOO SONBORE

Dɛnaa Lawa na a dí-nyali nyɛɛ

¹ «Maa dí-nyali á ke: Man kuĩ a gɔn ganaa. Má bɔ ka foo kɔɔ̃nbaa nɛ. Má n yiri da la, má a peperebaa nyaa tɔrɔn manɛ.

² A ba re n lɛ dii wa, a re parɛɛ wa. Min ba re a lɛ miɛ zii gialaa wa.

³ Buu mɛn nə n pusu, a re bɛ yiɛ wa. Tɛ buə̃ mɛn pàã puusə kɔ, a re bɛ nimi wa. Sɛnɛ, á re peperebaa nyɛɛ ka sonborebaa nɛ.

⁴ A foo a re ziziɛ̃ wa. A gù a re giɛ̃ wa, yǎa peperebaa yii tán tumaa la. Gánan mɛnɛn bɛ́ mu nə́ ǹ da bii, bɛn man giɛ a daraa li.»

⁵ Lawa, Dɛnaa Lawa n kɛ pii asɛ mɛn lon zɛnaa, a ná a lɛ bɔ. Á tán lɛ bɔ ka a gɔ́ɔ̃gɔ́ɔ̃ ǹ màn tumaa nɛ. Tɔrɔn mɛnɛn tumaa bɛ́ tán la, a n yiikoonaabaa koe ǹ la, a piɛ̃ kɔ a giã man wolen la.

⁶ «Masɛ Dɛnaa Lawa-n má n bíi wɔ peperebaa a lɛa, ma n kũ n gɔn ganaa; Ma á die n tamɛɛ, ma n koa máa n maa lɛ kɔ kɔn la kɛ yɔrɔ bɔ ka tɔrɔn nɛ, n kanaa tumaa a wɔlɔ fúlu baa.

⁷ N tá re yii tere-an yii buĩ, n kòso nɛn kaa n nə ǹ bɔ kòso ne. Min mɛnɛn bɛ́ wɔlɔ tì li kòso kion, n tá re bɛn woɛ n soo ǹ ne.

⁸ Man Dɛnaa Lawa lɛa. Bɛ lɛ n ma tɔ lɛa. Maa gugurubaa ke, bɛa doe min kɔn ganaa wa. Ma ba maa tɔ golebaa kɛ toɛ dì nyínin kɛn manɛ wa.

⁹ Á ke, sii bibinaan nə́ n zɛnaa ǹ nə́ kiɛ̃. Kanna, man sii soreen boo diɛ. Ma nə ǹ pii ka nɛ, ǹ laan bɛ̀ ǹ nə n zɛnaa.»

Kanaa tumaa Dɛnaa Lawa tɔ bɔ

¹⁰ Ka loe tii lɔ Dɛnaa Lawa nɛ. A kũ tán lɛ dan ganaa, ka a tɔ bɔ, kasɛn mɛnɛn bɛ́ yìsi mu zii tɔ we, ka màn mɛn tumaa bɛ́ yìsi mu li, ka kasɛn dɔn nɛ, mu gánan mɛnɛn da bii, ka loe lɔ ka Dɛnaa Lawa tɔ bɔ nɛ.

¹¹ Diə gole laanka a kiwin lɛn, Kedaara a kiwi bisinin lɛn ka loe lɔ! Selaa minin nə n lɛ dɛ ka foo kɔɔ̃n nɛ, ǹ nə n toa kelen mìi ni, ǹ foo kɔɔ̃nbaa ǹ lɛ-dɛ wɔ.

¹² Dɛnaa Lawa tɔ nə n bɔ, mu gánan mɛnɛn da bii, bɛn na a tɔ bɔ ka lɛn gole ne.

¹³ Dɛnaa Lawa nə n zoɛ̃ woe ka sɔraasi foo kaka-a bɛ́ lɔn. Foo tãbaa na a nɛ ka zia-baali zanbia bɛ́ lɔn. A n gɔ̀lɔ̀baa ǹ lɛ-dɛ we, a n ziabaa ǹ lɛ dɛ gole we, a n boe a zɔ́ɔn la.

Dɛnaa Lawa sii mɛn taasɛ, a n die bɛ zɛnɛɛ

¹⁴ Haalɛ bibi, má n lɛ tã. Ma boo kɔn da wa. Má n din kũ ka sii zɛnaa nɛ. Sɛnɛ, sisia, ma nə n lɛ dii, ka lɔ mɛn bɛ́ nɔɔrɔ koe. Ma nə n lɛ dii, má gini, maa piɛ̃ lɛ n zoɛ̃ mà a kuru.

¹⁵ Man die kelen laanka tentenən wurii. Màn mɛn tumaa bɛ́ boe la, ma bɛ laa. Man die tàn bɔyɛɛ ma baa bǎã gere lɛa. Ma pɛrɛ dadaran mu piɛ̃ ka daɛ̃.

¹⁶ Yii tere-an bɛ́ ǹ ba zii mɛn doɛ̃ wa, man diɛ ǹ kiɛ bɛ la. Man die ǹ kiɛ tɔ wɔ ganaa zii la, zii mɛn bɛ ǹ ba doɛ̃ wa. Man die tèlò bɔyɛɛ ma baa wɔlɔ fúlu lɛa ǹ nyɛɛnɛ. Ǹ bɛ́ n gòã niɛ̃ màn mɛn ganaa, man bɛ boe ma bɔ ǹ nyɛɛnɛ. Ma sii mɛn taasɛ, a din nə ke. Ma a re wusii ma kio-n wa.

¹⁷ Sɛnɛ ǹ tá re wusii ǹ kio ne, sìi á re ǹ kuĩ, ǹsɛn mɛnɛn foo bɛ́ doa-n dìn ganaa, ǹ nə́ pii màn nyínin manɛ: «Wɔa lawa n ka ka dinin ni.»

Izirayeli minin ba li ǹ lɛ si wa

¹⁸ Kasɛn, too tere-an lɛn, ka n too kɔ! Kasɛn yii tere-an lɛn, ka n yii bũ, ka yii wɔlɔ yɛ!

¹⁹ Die n yii tere-a lɛa bɛ̀ maa dí-nyali kɛ bie wa? Die n too tere-a lɛa ka dia dí-a wole kɛ bɛ́ lɔn má dia? Die n yii tere-a lɛa, ka min kɛ bɛ́ lɔn má bɔ má koa, yii tere-a lɛa ka Dɛnaa Lawa a dí-nyali kɛ bɛ́ lɔn?

²⁰ Nsɛ, Izirayeli a zaman, n sii gigiã yɛ, sɛnɛ n nə n yiri koa màn kɔn li wa. N nə́ n toon bũ, sɛnɛ n boo kɔn ma wa.

²¹ Dɛnaa Lawa a peperebaa taman yii, a na á goã li a na a dí-pɛn baa gole, a ǹ siĩn kɔ.

²² Sɛnɛ, á ke, ǹ nə́ ka kokoo, ǹ nə́ màn tumaa sii ka la. Ka tumaa lɛ tiɛ̃maa-n nyankɔrɔ zuzulu ni, ka n durii-n kòso ne. Kaa zɔ́ɔn nə́ ka kokoo ka ǹ bɛ́ naforo goɛ zia la lɔn. Min kɔn dɔ da n dɔ ka lɛ wa. Ǹ nə́ màn tumaa si ka la, min kɔn dɔ pɛ mà ǹ ka toa walan wa.

²³ Die n ka bii, a n li a n too kɔ taãn-taãnɛ? Die n ka bii, a n die n yiri koɛ bɛ li biɛ̃ ǹ a lɛa?

²⁴ Min mɛnɛn nə Zakɔba a zaman gɔn mànan si, die na á ǹ wɔ bɛn gɔn? Min mɛnɛn nə Izirayeli kokoo, die na á ǹ wɔ bɛn gɔn? Dɛnaa Lawa bie wa? A giala, mà wɔ n wɔ́ sã a ganaa. A zii mɛn nyaa a zaman nɛ, ǹ kɔ bɛ lɛ wa, a dí-pɛ mɛn kɔ ǹ la, ǹ kɔ lɛ wa.

²⁵ Bɛ lɛ nɛ, Dɛnaa Lawa na a foo yoo baraa kɛ kaa ǹ la, ka zia baraa nɛ. Bɛa zia lɛ tɛ da ǹ paǹ yii ganaa a ná a lɛnpɛnɛ nɛ, sɛnɛ, Izirayeli na a giala ma wa; á kũ, sɛnɛ a baa a parsii lɛa wa.