Izayii 39 - LAWA A BOO SONBORE

Baabiloniin dia dí-a wolen man die kii Ezekiasi li

¹ Bɛa waáraa, Baabiloniin kii, Balaadan a nɛgiĩ Merodaki-Balaadan ma mà Ezekiasi goã lon wa, sɛnɛ mà á kaka kɔ. Bɛ lɛ nɛ, á minin dia mà ǹ da sɛ́wɔ kɔ la, ka bǐɛ̃baa ǹ mànan nɛ.

² Ezekiasi nə́ n nyanyaa ka ǹ daa nɛ. A gɔn màn sonboren kɛn, a bɛ́ bɛn koɛ maa, sana nɛ, wɔrɔ nɛ, dù kɔɔ̃n kɔ ǹ mànan nɛ, nyɔɔ gìĩ kɔɔ̃nɔn kɛn nɛ, á ǹ kũ, á woo bɛ nyaa ǹ nɛ. A ziabaa ǹ mànan bɛ́ koa-n kionən mɛnɛn nɛ, á bɛn nyaa ǹ nɛ, ka a naforon tumaa nɛ. A màn kɔn duru ǹ la wa: A din a kion ne ka a gána gɔ́ɔ̃ tumaa nɛ.

³ Bɛ kio, Lawa a boo gii-dali Izayii daa kii Ezekiasi li, á nɔ̀n da la: «Minin kɛn man nə́ wàa boo da n nɛ? Maǹ boe maa?» Ezekiasi ná a lɛ si: Maǹ boe *Baabilonii, gána sɔsɔɔ nɛ, ǹ nə́ daa n yii kɔ ma ganaa.

⁴ Izayii wusoo á pɛ doo: «Maǹ nə́ wàa yɛ n kii kion lɛ nɛ?» Ezekiasi ná a lɛ si: «Ǹ nə́ màn tumaa yɛ. Má maa naforon tumaa nyaa ǹ nɛ. Ma màn kɔn duru ǹ la wa.»

⁵ Izayii tɔ́n pɛ Ezekiasi ni: «N too kɔ Dɛnaa Pàãyiidɛnaa a boo li:

⁶ Á ke, ǹ kɔn pinaa, màn mɛn tumaa bɛ́ n kii kion lɛ nɛ, n din nə màn mɛn tumaa sɔkɔn n nyɛɛnɛ, ǹ tá re a yii goɛ ǹ wo ǹ ne Baabilonii. Màn kɔn ba re goɛ̃ kànaa wa. Dɛnaa Lawa na á pɛ.

⁷ N nɛnyaanan mɛnɛn yɛ, ǹ tá re bɛn tumaa goɛ ǹ wo ǹ ne. Ǹ tá re ǹ biɛ dí-nyalin lɛa Baabiloniin kii a kii kion.»

⁸ Ezekiasi Izayii lɛ si: «Ń bɛ́ Dɛnaa Lawa a boo mɛn diɛ, boo kɔɔ̃n nɛ.» A n taasɛ mà asɛ a yiikoonaabaa gɔ́ɔ̃ nɛ, mà maǹ die goɛ̃ yii-nyɛɛ laanka là nyantoro la.