Izayii 38 - LAWA A BOO SONBORE

Ezekiasi a busu kɔ laanka a kaka kɔ

¹ Bɛa waáraa, gɛ̀ busu kɔn na á kii Ezekiasi kũ. Lawa a boo gii-dali Amɔsi a nɛgiĩ Izayii woo n yii kɔ li, á pɛ nɛ. Dɛnaa Lawa n kɛ pii: «Sisia, n gɔ́ɔ̃ pɛ n kion minin manɛ. A giala, busu lɛ a re n toɛ wa, n tá re giɛ̃.»

² Ezekiasi nə́ n yɔrɔ bɔyaa á dia kigiala la, á Dɛnaa Lawa nyankɔ.

³ Á pɛ: «E, Dɛnaa Lawa! Baalaa wɔ, n nə n yiri kɔ: Má bɔlɔgoondɛnaa baa n yɔrɔ-a, ma foo ná a talɛɛ-n paa wa. Sii mɛn bɛ́ siĩni n yii li, má bɛ zɛnaa.» Ezekiasi wuu pɛ parsiini.

⁴ Dɛnaa Lawa tɔn a boo dia Izayii la:

⁵ – Wo pɛ Ezekiasi-n kɛnɛn: «Masɛ Dɛnaa Lawa, n di Davida a Lawa, má n nyankɔ ma, má n yii mu yɛ. Á ke, ma á re lɛ̀ fulusooro kiɛ n lɛawaan li!

⁶ Ma á re n kirisibiɛ kɔnlɛ ka kiwi kɛ nɛ, Asiiriin kii ganaa. Ma á re kiwi lɛ tamɛɛ.»

⁷ Dɛnaa Lawa á re nyɛɛ n nɛ mà asɛ a wusii a boo kio wa. A bɛ́ re sii mɛn nyɛɛ n nɛ, á ke:

⁸ «Dɛnaa Lawa n die wusii ka wúlu ni a kio ne yǎa gòã yii fù.» Wúlu goã á n kɔ gòã yii fù mɛn lɛ lɛ, wasa wusoo á bɔ bɛn la doo.

Ezekiasi a Lawa nyankɔ a busu a nya kio

⁹ Zudaan kii Ezekiasi a loe á ke: A na á kiɛ̃ a busu a nya kio.

¹⁰ Man má goã pii ma din ni: Maa yiikoonaabaa a talɛɛ dinsɔɔ̃-n má zɛnaa, ma doamaa-n ka woo ne, ma doamaa-n ma maa yiikoonaabaa gialakun zɛnaa geren piɛ.

¹¹ Má goã pii dɔn: Ma a re Dɛnaa Lawa yii doo yiikoonaan tán la wa. Ma a re minbuiin nɛ kɔn yii kanaa minin bii doo wa.

¹² Maa yiikoonaabaa nə́ n si ma la, a wɔlɔ lui ma ganaa ká tɔɔ-lɛduə̃lin zìã bɛ́ lɔn. Ká kɔ̀rɔ-tãli bɛ́ doe a mɔnaa wusu munii lɛ dan ganaa lɔn, má dɔ maa nyin sasabaa lɛ dan ganaa, a gɛ̀sɛn nə́ nana. Kànaa ka boɛɛn, Dɛnaa Lawa, bɛ̀ ń nya kɔn ka ma nɛ.

¹³ Lɛ̀ laan bɛ̀ a waa, bɛ̀ maa màn kɔn lɛa doo wa. Dɛnaa Lawa ma we tumaa yɔyɔrɛ, ka yàra bɛ́ lɔn. Kànaa ka boɛɛn, Dɛnaa Lawa, bɛ̀ ń nya kɔn ka ma nɛ.

¹⁴ Maa lɛ-dɛ n goon ka leere bàan a lɛ baa nɛ. Maa purii n goon ka kɔlɔ wɔ nɛ. Má nɔmaa ka ga lon ganaa nɛ. Dɛnaa, ma gù gã. N dɔ ma lɛ.

¹⁵ Man die wàa boo diɛ Dɛnaa Lawa nɛ, a giala, a din na á boo da ma nɛ, á kɛ zɛnaa. Ma á re tɔ we ka foo ziziɛ̃ nɛ maa yiikoonaabaa tumaa gɔ́ɔ̃ nɛ.

¹⁶ Dɛnaa, yiikoonaabaa n yii, n sonborebaa kɛ barka nɛ, ma yii n koo doo a din lɛ taman yii. Ń pàã kɔ ma la, ń ma yii toa koo.

¹⁷ Á ke, maa foo-ziziɛ̃ gole nə́ n bɔyaa á là nyantoro baa. Hiĩ, n maa yiikoonaabaa narɛɛ á la yii ni yǎa n ma kanbaa gɛ̀ ganaa, n maa sii baraan tumaa zũ n kio sɔsɔɔ.

¹⁸ Geren piɛ, ǹ ba boe la ǹ tá n tɔ guguru koe wa, geren ba loe loe ǹ nə n tɔ bɔ wa. Min mɛnɛn bɛ́ yala-n tán, bɛn foo a doa nɛ n bɔlɔgoondɛnaabaa ganaa doo wa.

¹⁹ Yiikoonaan, hiĩ yiikoonaan dininsɔɔ̃nɔn manə n tɔ boe, ka masɛ á ke lɔn pelo. Díin tá re n bɔlɔgoodɛnaabaa nyɛɛ ǹ nɛnyaanan manɛ.

²⁰ Dɛnaa Lawa, n ma kirisibaa. Bɛ lɛ nɛ, wɔ á re tùtun dii wɔa yiikoonaabaa tumaa gɔ́ɔ̃ nɛ, n din a kion Dɛnaa Lawa.

²¹ Bɛ lɛ nɛ, Izayii goã á pɛ mà ǹ da ka gɔ́rɔ mɔ̀mɔ kɔn nɛ, ǹ da kii a busulɛ lɛ ganaa màn mɛn bɛ́ toɛ a kakabaa yɛ.

²² Ezekiasi tɔn nɔ̀n da mà sii a kɔnboe mɛn nə die nyɛɛ mà asɛ re boe la a wusoo a wo Dɛnaa Lawa a kion.